ISAIAH 49 - Sumi Naga CL (Re-edited) Bible (BSI)

Ampeu Qeu

¹ O azüghimkü yeghi, I tsa inilo, nongu putoumiqo, I tsa inilo. Ampeu no aza tita lono I kulue, I za po lono Pa no I je kutsüe.

² Pa no I kichi pesü azütakikihi kütsügha toi shitsü; Pa u kicheqho lo I küsüpe qhi; Pa no I küghape apiji phuphushi keu toi qhike; Pa pijibo lo I küghütshü ke.

³ Pa no I vilo ishi pi, “Israel, no ye I qeu, o vecheo I no I jekipipu shinani.”

⁴ Ikemu I no pi, “Ni ye adou lono aghimeshi mlaithavae; ni ye adou eno akiqi kühakeu lono I küka puwovae, ikeghi mtsüqheino I chipiu ye Ampeu gholo ani, eno I saxü ye I Mpeu gholo ani.”

⁵ Itehi Ampeu khuu no I no atita lo akelono Pa qeu shipeniye I lhoe, I pelo Pa lau Jacob saghipe, eno Israel pelo Pa lau hekütsü peniye shi keno— ni ye Ampeu nhethe lo agigihupu shi ani eno I Lhou no I kumto shive akehu— Pa no piani,

⁶ Pa no pi: “I no O pelo Jacob shiaye xaqhe eno Israelmi püxü püakeqo sachile saghi peniye I qeu shipekeu ye mthülo ke; ikehu I no o pelo shiyeqo lau aküvü ghi shipeni, tishikeu lono Iw xakulupu no ayeghi shekha tolu peni.”

⁷ Ampeu, Israel Lhou Akimtheu eno Xachilekuluu no shishe küthakügha shive keu, shiyeqo no mithi chekeu yepemi qemi vilo ishi piani: “Kükami ngo kükapumi no ithulu no ithughi püzü nongu zülo pishiqho nani; kughengu Ampeu ye pükhükulupu, Israel Lhou Akimtheu no nongu kisheluvae.”

Israel Athoputho Tsüni

⁸ Ampeu no ishi piani: “I no ado achipi lono nongu khochile tsüke; xakulupu tsalani I no nongu kuphuke; I no nongu khe eno süsho nani, nongu vecheo timi kümtsü sasü puloshoqhi shinani; eno pighive keu yeghi pesü amheghi shi tsüchile nani.

⁹ I no akughumi vilo pinani, ‘Ipeghilo,’ aküzü lo akeqo vilo pinani, ‘Ipeghive lo.’ Panongu no ambeqo alaghila lo achu kümza nani; eno qhemghaike-a kümtsü no pano chu kümza-a shinani;

¹⁰ panongu ye khilemu müzüthi tüghüthi monani, amülhü momu khetsünhe kushu no pano shipüsa monani, kughengu panoqo kimiye chekeu no pano sache nani, eno azüpuki phivi lono panongu sawu nani.

¹¹ I no Iw naghuto kümtsü alaghi kughulhove nani, eno I laghila shikithe nani.

¹² Julo, hipaqo ye aghacheu no ighi nani; ahuu eno kulolau no ighi nani; eno Syene yeghi lono ighi nani.”

¹³ O atsütsü, alovi ale phelo, O ayeghi, ighalo; O naghutoqo, alokivi le phelo! Kughengu Ampeu no Paw timi lopiqive tsüae eno aghime lo akemi shou Pa kikimiye puku tsüke.

¹⁴ Ikemu Zion no pi, “Ampeu ye I qhivae; I Mpeu ye I kümsümavae.”

¹⁵ “Aza lakhi ye li nga kughunu kümsümalu nani keshea? Li ye li no punu keu nga kimiye move nani keshea? Li no kümsümave namu, Ni ye khilemu o kümsüma monani.

¹⁶ Julo, I no nongu je I u mza lo yepe qhivae; nongu liwo ye I zülo acheni.

¹⁷ Nongu shiqhe akemi no mighimghai cheni, eno nongu kütsakungo kemi no nongu launo chevae.

¹⁸ Nongu nhethi tsükhope julo; panongu kümtsü kumqo ani eno nongu lau cheni. Ampeu no piani, ‘I no xüake toi, nongu no hupaqo kümtsü tünatunu pu akeshi pepu nani; külaliu no li chila tshüpu keshi nongu no tshüpu nani.

¹⁹ “Mtsüqheino no ye ixapinyi eno küghüvae eno o ghakhu ye kütsalevae. Ikemu itehi tile küghünani kemi ye ngozüla nani, eno nongu kütsakungo keqo ye putosüu wuve nani.

²⁰ Küqa kumlo dolono punu kemi no tianuliqo no nongu kini lo pisütsü nani: ‘Ni sala a-a hi ye ighono tülaloe; nino ngokepu-a kuto tsülo.’

²¹ Tileno nongu mlo lono pinani: ‘Khuu no ni ghenguno atianuli hijehi lhotsü kea? Ni ye amlo kighishi lo ache eno anuhami shiche, ni ye haphe sawuve kemi; ikemu khuu no hipaqo süghi kea? Julo, ni ye I likhi ake khilano hipaqo ighi kea?’”

²² Ampeu Alhou no ishi piani: “Julo, I no shiyeqo shou I u pesü kiche nani, eno panongu lau amchipu süqhe nani; panongu no nongu nuli au lono khapesü ighi nani, eno nongaqo abighi lono xapusü ighi nani.

²³ Kükami no nongu papu kishe shi nani; eno kükalimi no nongu paza shi nani. Panongu no pano gi pishiqhope nongu agigihu tsü nani; eno nongu pukhu lo ayeghimkhu mineve tsü nani. Tileno nongu no Ni ye Ampeu kepi ithi nani; khunono I khe cheni keno, tipaqo ye kujovemo nani.”

²⁴ Tsükuchupu lhoxü ye akumtou launo süxalu, momu mkamihi kemi launo akughumi xaphelu nani keshea?

²⁵ Kughengu Ampeu no ishi piani: “Akumtomi no akughu shipüa keqo ghi xapheve nani; mkamihi kemi no küghape püakeqo ghi xapheve nani; kughengu I no nongu mjo chekemi mjochile nani, eno nongu tianuliqo xalu nani.

²⁶ I no nongu qoda kemi pelo pano phiashi chupe nani; eno aji sho akeshi pano jih shope nani. Tileno timi kümtsü no Ni ye nongu Xakuluu Ampeu, nongu Xachilekuluu, Jacobw Akumtou kepi ithi nani.”