ISAIAH 48 - Sumi Naga CL (Re-edited) Bible (BSI)

Israel Thakütsüghü

¹ O Jacob laghami, hi inilo, nongu ye Israel je vecheo ku kemi eno Judah züghi lono ighi kemi ke, nongu no Ampeu je lono tushoqhi eno Israel Lhou je piphe cheni, ikemu kuchou eno achipi lono tishi chemoe.

² Kughengu panongu ye akimthe phughi je lono kucheni, eno Israel Lhou qholo xücheni; Pa je ye aqokitikhi Mpeu.

³ “I no khaghino pichho tsüe; I kichi lono I no sheshue; paikhavi tipaqo ye shikupuve.

⁴ Kughengu nongu ye kishi kuthovi keno I no ithi ani, nongu kuo ye ayikichhe toi nongu kishe no alazayi toike,

⁵ I no khaghino nongu vilo pike, tipaqo shimphi lono I no nongu vilo pike, ti ye nongu pelo ishi pipemo niye ke, ‘I julho no hipau shike, I süatu julho eno ayi julho no azah tsüke.’

⁶ “Nongu no chiluvae; itehi hipaqo julo; nongu ye hipaqo vehu pikülha moni keshea? Hinguno hilau ye I no thime akithe küsüpe püakeqo khikhi nongu no mtha keno, tipaqo nongu vilo pinani.

⁷ Tipaqo ye itehi no lhophe ke, ado kushuo kumphi; ishi tsala züu nongu ye hipaqo vehu chilu mphi, tikumo aye nongu no ishi pi nosae, ‘Ni ye hipaqo ithiae.’

⁸ Nongu ye khilemu chilu mphi, khilemu ithi mphi, khaghi nomu hipatsa nongu kini lo iloghi mphie. Kughengu I no ithi ake nongu ye pishikiqhimi eno nongu punu mphi lonomu nongu ye hekibidemi ipi kuche ke.

⁹ “I je ghenguno, I no I mlo kighide süchile cheni; I je sheqhe penike I no süchile ani, tishianguno nongu kütsaleve moniye ke.

¹⁰ Julo, I no nongu thakütsüghüvae ikemu ghükayi toimoe; I no aghime kitikhi miphoki lono nongu pejuvae.

¹¹ I je ghengu likhino I no tishie, kughengu kishino I je shipüthave peni kea? Ni ye I juküvü pesü kütami tsümo nani.

Ampeu no Israel Kue

¹² O Jacob, eno Israel khuu I no kulu keno, I tsa inilo, Ni ye Alhou ke; Ni ye atüghüu eno ashekhau ke.

¹³ I u no ayeghi boqha qhae, eno I u ajeu no atsütsü sükhope qhike; kughou I no tipaqo kuni keno, tipaqo no kümtsa puthughope ngoluve cheni.

¹⁴ “Nongu kümtsü kumqope inilo! Hipaqo dolo khuu no avehu hipaqo sheshu püani kea? Ampeu ye pa kimiye ani; Pa no pa kukughu Babylon shou shi nani, Pa u Chaldeami shou iku nani.

¹⁵ Ni ampi no pi eno pa kulue; I no Pa saighi, pa ye thokha lo kinikülü shi nani.

¹⁶ I kupunu ighilo eno hi inilo: abothu lonomu Ni ye tuqhou lono pi püamoe, atsa tipau no I lau ighike ghuloki lono Ni ye tile ake.” Itehi ye Ampeu Alhou no ni eno Pa Ghungu puwu ani.

¹⁷ Israel Lhou akimtheu, nongu Xachilekuluu, Ampeu no ishi piani: “Ni ye nongu Mpeu Alhou, I no nongu pelo ala shipenike shika cheni, nongu laghi kichepiye cheni.

¹⁸ Nongu no I yezah papeke aye lae! Tishike aye, nongu lokughuno no aghoki toi qoighini cheke, eno nongu mikucho no azü fukukucho toini cheke;

¹⁹ nongu lagha no asaye jehi, eno nongu kughuko no athi toi aghini cheke; panongu je ye pühave moniche momu I zülono kütsave moni cheke.”

²⁰ Babylon lono ipevelo, Chaldea lono povelo, alokivi lono hipau sheshulo; ayeghi shekha kutolo ishi pilo, “Ampeu no Pa qeu Jacob xaluvae!”

²¹ Pa no panongu sasü asayeqha katha kelo panongu ye tüghüthi moe; Pa no atuqu lono panoqo ghenguno azü ipeghipe; Pa no atuqu hepho eno tipau lono azü qoipeghi peke.

²² “Kixikilami ghenguno aloino keu kühae,” Ampeu no pi.