ISAIAH 47 - Sumi Naga CL (Re-edited) Bible (BSI)

Babylon Thogha

¹ O Babylonmi athathelimi, iqi ayeghimkhu lo iqalo; O Chaldeami ilimiqo, ayeghi lo kükalakhü kühakeu lo iqalo! Nongu ye hinguno hilau ye mtshaminhei ke pimoae.

² Athikütsüghü tuqu ikhipe asho kubolo, o gi künhaphi lhavelo, o phimini xave eno o pukhu küküzü ikhive lo, eno aghoki kathasü wulo.

³ O phikümsa pephe piye nani, eno o kukujopu ithulu nani. I no amkhülu nani, eno khuu kipimi mu qhitsümo nani.

⁴ Ni Xachilekuluu, aqokitikhi Mpeu no Israel Lhou Akimtheu ke.

⁵ Aküzü lo inaqhoi iqavelo, O Chaldeami ayiliu; kughengu no ye khilemu kükaqhaqo kükaliu ipi moae.

⁶ Ni ye Iw timi shou amloideve; I no I mheghi shikitiqeve ke; I no panoqo pesü o u lo süvetsüe, nono pano kipimi qhitsü moe; nono kitemi mghachhoi peithae.

⁷ Nono pi, “Ni ye alhokupuju kükaliu shi anani,” ikehu no ye hipaqo amlo lo qhimoe momu ashekha lo kishive nani keno kümsü moe.

⁸ Tighenguno itehi hi inilo, nongu aghakiqipu kimiye eno sükusho qholo ngono amlo lono ishi piche keqo, “I likhi ke, I nguno kütami khumu kühae; Ni ye chimemi toi iqamo nani momu atianuli pühave keu mloküsa ithimo nani”:

⁹ Atüqhüdo kini o lau ighi nani paikhavi no atsala lakhi lono ighi nani; nono küdüu jeli peithaju anamu eno asakiqhi kumto anamu atianuli thive keu ngo chimemi shive keu küma ighi nani.

¹⁰ Nono ow kixikila lono piche, “Khumu ni ithulu amoe”; o lokütsü ngo o kighithi no o sabidevae, nono o mlo lono ishi pike, “I likhi ke, I nguno kütami khumu kühae.”

¹¹ Ikemu alhoksa no o shou ikughi nani, no ye kishino tipau khonhaveni keno mtha nani; küsakusho no o shou ikughi nani, no ye tipau lochile mla nani; eno nono khilemu ithimo keu amhekiqi no paikhavi o shou ikughi nani.

¹² O sakiqhi shou eno ow küdüu jeli kutomo puthugho lo, tipaqo ye nono o lhothe lono peitha chekeu ke; tipaqo no o pelo toluvepe luvi; eno nono akümsapu süghi luvi.

¹³ No ye mijekütsü jeli kutomo no miqemileivae; tipaqo pelo ighi no o xalu pelo; atsütsü kothape qhiche keqo, ayepu ayesü chheju chekeqo; eno aqhi kithe lo o shou kiu ighi nani keno piche keqo pelo o xalu pelo.

¹⁴ Julo, panongu ye amihi toike; ami no panongu pitive nani; panongu ye amiküqü küka lono pano likhi pano xamla nani. Hi ye püghalu chekeu mi momu tipau zülo ngolu chekeu kumoe.

¹⁵ Nono kümtsa sasü mla ighi keqo ye hitoi ke, panongu ye o lhothe lono o sasü kümtsa ighivae; tipaqo ye pütüta laghi lo cheni; eno o xaluni kemi küha nani.