ISAIAH 46 - Sumi Naga CL (Re-edited) Bible (BSI)

Alhou Kuchou Lakhi

¹ Bel no pishiqho; Nebo no itsaqi; pano julhoqo ye tüghashi ngo pichepighiqo ke; thime hipaqo nongu no peche keqo ye lhoxüqo no aghime shi xapu cheni.

² Panongu no itsaqi eno kümtsa pishiqho cheni; panongu ye apekimshi makho xapu mlae, ikemu panongu ampi ghi akughumi shisü wuve.

³ “O Jacob kibolomi, I tsa inilo, Israelmi ghükulumi kümtsü, nongu punu mphi lono I no nongu tucho hiju ighi, eno atita lono I no nongu tuchosü ighike;

⁴ nongu no kitemi shiveke kutolo, I no nongu Lhou; eno nongu no asa mpaveke kutolo, I no tucho nani. I nongu lhoke eno tucho nani; I no nongu xapu eno xalu nani.”

⁵ “I sasü aphiphi shikeu nongu ye I pesü khuu kimheni, eno khuu qhemi shitsüni kea?

⁶ Khunono panow pisabo lono ameshoyi ikhiphe cheni, eno ahu lono ghükayi mighi cheni keno panoqo no ameshoyi kiyiqimi ajume tsüno alhou mlaphepe cheni; panongu no itsaqi ti mlla cheni!

⁷ Panongu no abighi lo tipau ikhiqhepe xapu cheni; panongu no a-a lakhi lo ti ghope qhive cheni; ti ye tipa-a lono ithauve mlae. Milakhi no tipau lau ighamku namu, ti ye khochile chemo momu pa küküpna lono xaphelu chemoe.

⁸ “Hi kümsülu no akumto shilo; nongu axinemiqo, hi kümsüchile lulo,

⁹ khaghi ghili kümsülu lo; kughengu Ni ye Alhou, eno kütami khumu kühae; Ni ye Alhou, I toike kütami khumu kühae.

¹⁰ I no abothu lono ashekha vehu sheshue, mulho lono shikupu mphikeu tsa ishi piqhi püani, ‘I kimji kupulo ye mtotoi ani, eno I no I kukughu kümtsü shikupu nani.’

¹¹ I no kipelau no ashikuchu ghau kusaghi peke, I kimji shikupu tsüni keu timi lakhi aghacheu no kue. I no pivae, I no ti shikupu nani; I no kughuvae, I no ti shinani.

¹² “Nongu kuthovi keqo, achipiu mikucho lono putosüu akeqo, I tsa inilo:

¹³ I no I chipiu tsala punukhoi süghi ani, ti ye kushuo lo amoe, eno Iw xakulupu ye süpushu monani; I no Zion xakulupu shitsü nani; Israel ghenguno I juküvü tsü nani.