ISAIAH 45 - Sumi Naga CL (Re-edited) Bible (BSI)

Ampeu no Cyrus Kishelu

¹ Ampeu no Paw nukikishe Cyrus vilo ishi piani, I no pa pelo shiyeqo qhasü penike pa u ajeu tsüqü luvae, kükami pokha xaluve tsü, pa zülo ahukikhaqo khaqhi tsü, eno khaghoqo khapemo nike pi:

² “I no o züuno wuno qhemghai ke-aqo külaqave tsü nani, I no alazayi hukikha kubovetsü eno ayi khadu hephovetsü nani,

³ I no zümoike-a lo kinikülü achekeu o tsü nani eno tuqhou-a lono akughupu nhemgha o tsü nani, tishikeu lono Ni ye Ampeu kepi nono ithi nani, eno Israel Lhou no o je kughi o kulu kepi ithi nani.

⁴ I qeu Jacob, Iw kishekiphe Israel ghenguno I no o je shuphe no o kulue, nono I mtha namu I no o je kutsü ke.

⁵ Ni ye Ampeu; alhou kütau khumu kühae, I nguno kütau lhou kühae; nono Ni ithimo kemu, I no o shikumto cheni,

⁶ tishianguno kipelau no kulolau kutolo I nguno kütami ye khumu küha kepi timiqo pelo ithi peniye ke; Ni ye Ampeu, eno kütami ye khumu kühae.

⁷ I no aküvü ngo aküzü lhoke; I no kükümgha ngo amhekiqi lhophe ke; Ni Ampeu no hi kümtsü shicheni.”

⁸ “O atsütsü, tsüghuqhilo, khüngküsü pelo achipiu-mikucho ghuqhi pelo; ayeghi pelo xakulu ngo achipiu-mikucho lhophe pelo; ayeghi pelo hi küma lhoipeghi pelo; Ni Ampeu no lhophe ke.”

⁹ “Khuu no pa lhokeu sasü mtoni keno ahasapue, pa ye ayeghi li dolo lakhike! Aghani ye ali kümlau vilo, ‘No ye kiu mla ani kea?’ momu ali ye akümlau vilo, ‘O kümla ye akixi kühae’ ipi luni keshea?

¹⁰ Timi khuu no papu vilo, ‘No ye kushiye ishi I lho kea?’ momu aza vilo, ‘No ye kiu ghenguno ime ani kea?’ ipini keno pa ye müsüinivae.”

¹¹ Ampeu Israel Lhou Akimtheu, O lhokeu no ishi piani, “Ighini keu vehu I vilo inijulo; no ye I nuli vehu lo eno I kümla vehu lo azah tsü kulupu ani keshea?

¹² I no ayeghi pulhosü eno tile timi jeli lhosüe; kungugha xachho keu ye I u noke, eno atsütsü lo yepu-yesü kümtsü I zakütsü qholo ani.

¹³ I no achipiu-mikucho lono pa xukuthovae; pa laghi kümtsü I no shikümzüve tsü nani; Pa no Iw mishighüna shiqhe nani eno Iw timi haphe sawuve kemi khaqhiphe nani, ame momu asaxü ghenguno pa ye hi shimo nani,” ipi aqokitikhi Mpeu no piani.

Ampeu Likhino Xakuluu

¹⁴ Ampeu no ishi piani: “Egypt küakini ngo Cush lhidi, eno Sabeami sübosüghimi ye o lau ighive no ow shive nani; panongu ye o pape nani; panongu ye ayikichhe no tshüpe o zülo pishiqho nani. Panongu no ishi o qhüiniju nani: ‘Mtsüqheino Alhou ye O gholo ani, kütami khumu kühae, Pa nguno alhou kütau kühae.’”

¹⁵ Kuchou No ye Alhou, No ampi küghütshü chekeu, O Xakuluu, Israel Lhou.

¹⁶ Ajulho shisü chekeqo kümtsü shikujovae; panongu ye kümtsü avehu izü khavae.

¹⁷ Ikemu Israel ye Ampeu no shekhaha xakulu pesü xalue; nongu ye lhokta kutolo khilemu kujo mzave pemo nani.

¹⁸ Kughengu Ampeu no ishi piani, khuu no atsütsü lhophe keno (Pa ye Alhou ke!), khuu no ayeghi lhophe keno (Pa no iqhikumto, eno kümsa qhiniye lhophe moke, ikemu küghüna peniye lhophe ke!): “Ni ye Ampeu, eno kütami khumu kühae.

¹⁹ Ni ye aküzü yeghi lono tuqhou no pi püanike kumoe; Ni ye Jacob kughukomi vilo, ‘Adou lono I phulo,’ ipimoe. Ni Ampeu ye kuchou tsa picheni; Ni ye kiu no achipi keno ti sheshu cheni.

²⁰ “Nongu hekumqope ighilo, shiye lo nongu ghükulumi, kümtsa kupunu ighilo! Ajulho pesü kulobide chekemi ye akighithi alokütsü mu kühae, panongu ye xamlani keu lhou lau inikhu cheni.

²¹ Sheshu no no chipiu tsa pilo; panongu dolo kighinikile pelo! Khuu no asheazü shi pikea? Khuu no khaghino sheshu kea? Ti ye Ni Ampeu noke kumo? I nguno alhou kütau kühae; I nguno amikucho Lhou eno Xakuluu khumu kühae.

²² “Ayeghiqha kümtsü no I lau tsüghü ighi no xakulupu shilo! Kughengu Ni ye Alhou, eno kütami khumu kühae.

²³ Ni ampi no tushoqhivae; I kichi lono achipiu-mikucho shilo pivae atsa tipau ye ideighi monani: ‘Timi kümtsü no I zülo qhoqhünhe nani, eno amili kümtsü no I laumi shinike piqhi nani.’

²⁴ “I ghili ishi pinani, I lau likhi no achipiu-mikucho eno aküka ani; khunono I mjo cheni keno, tipaqo ye ighi no kujove nani.

²⁵ Ampeu launo Jacob kughukomi kümtsü shou, achipi kepi xathabe nani eno ajuküvü ithulu nani.”