ISAIAH 44 - Sumi Naga CL (Re-edited) Bible (BSI)

Israel ye Ampeu w Kishekiphe

¹ “Itehi inilo, O I qeu Jacob, I no kisheluve keu Israel!

² O lhokeu Ampeu, khuu no atita lono o lho eno o kuphu nani keno Pa no ishi piani: O I qeu Jacob, msa kevilo, I no kisheluve keu Jeshurun.

³ Kughengu I no tüghüthi akeu yeghi lo azü leqhitsü nani, eno qhaike yeghi shou azüpuki qopipe tsü nani; o tianuliqo shou I no I ghungu lepuku nani eno o lagha shou Iw kükümgha puku tsü nani.

⁴ Panongu no atsüni dolono ishe ipeghi nani aghoki zü qowu akeu phelo mulosübo aketoi nani.

⁵ Timi hipau no pinani, ‘Ni ye Ampeuw ke,’ milakhiu no Jacob lau ighamku nani, lakhiu no pa u lo ‘Ampeuw’ ipi yepuku nani, eno pa je Israel ipi ku nani.”

I Nguno Alhou Kütau Kühae

⁶ Ampeu, Israel kükau eno pa Xachilekuluu, aqokitikhi Mpeu no ishi piani: “Ni ye atüghüu eno ashekhau; I nguno alhou kütau kühae.

⁷ I toike khuu ani kea? Pa pelo sheshu pelo. I no khaghi lomi lhoke ghuloki lono ishi kutolo, panongu pelo sheshu pelo eno I zülo süghiju pelo. Panongu pelo asheazü vehu piputoju pelo.

⁸ Msa kevilo, Ni ye khaghino nongu vilo pive ake kumo? Nongu ye Iw thopimi ke! I nguno alhou kütau ani keshea? Atuqu kütau kühae: Ni ye lakhimu mthae.”

Ajulho Kümlla Nikha

⁹ Ajulho mlaphe chekemi kümtsü ame kühae, eno panongu no azüvü chekeqo ye ala kühae. Panow thopimi ye ithulu eno chilu chemoe, ikehu panongu ye kujove nani.

¹⁰ Khuu no ala shimla keu lhou julho mlaphe cheni kea?

¹¹ Julo, tipau mlla chekemi kümtsü shikujove nani, ti mla chekeqo ye timi ke. Panongu pelo ighi no kimchiju pelo; panongu ye thüghüive eno kujove nani.

¹² Ayi kiyiqimi no heküthayi pesü ami lono piti cheni. Pa u kumto pesü ayihesü peqhe no ayi hepha pesü akoghe kughulho cheni. Pa ye müzüthi kelauno akulho shive cheni.

¹³ Asü kümlau no asü mighi no yesüta pesü hetha puku cheni. Pa no tipau koghe mighi no akimghipu pesü amichi shino küxü cheni. Pa no tipau pesü timi ju koghe kivi shino aki lo qhi cheni.

¹⁴ Pa no cedar sübo yeqhi cheni, momu cypress sübo eno aphisübo kishepe aghasü lo asübo kumtoqo gholo thuwu lupe cheni. Pa no cedar sübo shosü cheni eno tsütsüghu no tipau aghüma tsü cheni.

¹⁵ Tishino tino timi ghenguno no süküghüpu sü shino pa ampi vapülü cheni; pa no ami shino asho ghu cheni. Pa no itaghi asü tipau pesü ajulho shisü no mlla cheni; Pa no ajulho mla no tipau zülo pishiqhope mlla cheni.

¹⁶ Asü tüxa pesü pa no ami shino ashi ghuchu cheni eno aghapiqilu cheni. Pa no ami pügha no picheni, “Ah, kiutoi lüvüi eno alo kela, ni ye ami ithulu ani!.”

¹⁷ Asü tüxa pesü pa no ajulho shisü no tipau zülo pishiqho no mlla cheni. Tipau vilo pa no inikhu, “I xalulo kughengu no ye I lhou ke!”

¹⁸ Timi tipaqo ye panongu no kiu shi ani keno mthae eno vethalu chemoe; kughengu panongu nhethi nhavetsü kehu ithumla eno panongu kükümsü nhavetsü kehu vethamla ke.

¹⁹ Khunomu kümsüju chemo momu tsaqüi ishi kümsükutoju chemoe, “I no asü tüxa süghü no asho eno ashi ghuchu; Imaye ni ye tipau sü tüxa pesü ajulho shisü no mllani keshea? Ni ye ti asülu zülo pishiqho no mllani keshea?”

²⁰ Pa ye ayevu chu auvae; aghüzünikha no pa saküghüzü auvae eno pa ampi xaphemla momu ishi pimlae, “I u ajeu akimki kühave akeshea?”

Ampeu no Israel Xachilelu

²¹ O Jacob eno Israel, avehu hipaqo kümsülu lo, kughengu no ye I qeu ke; I no o lhoe; no ye I qeu O Israel, Ni ye o kümsümave monani.

²² I no khüngküsü toi o kipimi nuxave tsü nani eno akimhi toi o xine pevetsü nani; I lau ideighi lo kughengu I no o xachile luvae.

²³ O atsütsü, ale phelo kughengu Ampeu no hi shivae; O aqokutho, ighamku lo! O naghuto, O aghasü eno asübo kümtsü alokivi le phelo! Kughengu Ampeu no Paw timi Israel xalu eno ajekipi shinani.

²⁴ Ampeu khuu no atita lono nongu lhophe keno, nongu Xachilekuluu no piani: “Ni ye Ampeu, I no thokha kümtsü lhophe ke, I likhi no atsütsü sükhope qhi, I likhi no ayeghi xakhope qhie.

²⁵ I no kimkimi sakiqhi vehu shipüsave tsü cheni eno tumumi pesü mbomzümi shivetsü cheni, I no alokütsümi tuchile cheni eno pano kighithi pesü mbomzü shivetsü cheni.

²⁶ I qemi no asheazü tsa pikeu I no iqhikumto tsü cheni, eno I tsapemi mijekütsü shikupu tsü cheni, I no Jerusalem vehu ishi pi, ‘Tile timiqo küghünauve nani,’ Judah lo mishighünaqo vehu ishi pi, ‘Tipaqo ye shiqheve nani, I no ixapinyi akeqo shiqhe nani’;

²⁷ Khuu no akuthoku vilo, ‘Qhaivelo; I no o züghi chethove tsüni’ ipi kea?;

²⁸ Khuu no no Cyrus vehu lo, ‘Pa ye I mbekheu, pa no I kimji kupulo kümtsü shikupu tsü nani’; eno Jerusalem vehu lo, ‘Li ye shiqheve nani,’ eno achineki vehu lo, ‘O boqha ye qhave nani,’ ipi kea?”