ISAIAH 43 - Sumi Naga CL (Re-edited) Bible (BSI)

Israel Xakuluu

¹ Ikemu itehi ye Ampeu no ishi piani, Pa no o lhoke, O Jacob, Pa no o koghe mla tsüe, O Israel: “Msa kevilo, kughengu I no o xaphe luvae; I no o je ku ghi o kuluvae, no ye Iw.

² Kughou nono azüghi katha wuni keno I no o gholo anani; nono aghoki katha kelo, tino no yipe wuvemo nani; kughou nono ami katha wuni keno o pitive monani; ami mili ye o pitiqhi monani.

³ Kughengu ni ye Ampeu o Lhou, Israel Lhou akimtheu, o Xakuluu ke. I no o xaphe nike Egypt pheve ani; Cush ngo Seba pesü o theli lo tsüve ani.

⁴ Kughengu no ye I nhethe lo akughupu; gihu küzüpu, I no o kimiye cheni eno o theli lo timiqo pheve cheni, o küxü ghenguno ashiaye kütami pesü atheli shi cheni.

⁵ Msa kevilo, Ni ye o gholo ani; I no kipelau no o tikughuko saghi nani, eno kulolau no nongu hekütsü saghi nani.

⁶ I no ahuumi vilo, Phevelo, ipi nani eno apeumi vilo, Khatha püa kevilo, ipi nani; I nuli putou akeqo saghilo, I ngaqo ayeghi shekhauno saghilo,

⁷ panongu ye I je ku püani, I juküvüpu shi peniye I no pano koghe lhophe tsüke.”

⁸ Khunono anhethi ani kemu ithulu chemo, akini ani kemu chilu chemo keno, panongu saipeghilo!

⁹ Shiye kümtsü no hekütsü, ashiaye kümtsü no kumqo ke. Panongu dolo khuu no wove keu vehu pilu eno ni vilo tipa vehuqo pilu nani kea? Panongu pelo pano chipiu gholo thopimi saghi pelo, panongu pelo ti chilu no, Hi ye kuchoue, ipi pelo.

¹⁰ “Nongu ye Iw thopimi,” ipi Ampeu no sheshu ani, “eno I qemi I no kisheluve keqo, tishikeu lono nongu no Ni ithi eno I pülülu, eno Ni ye Ampeu kepi ithi peniye ke. I nguno kütau lhou kiumu kühae; momu I thiu mu küha nani.

¹¹ I likhi no Ampeu ke, I nguno xakuluu kütau kühae.

¹² Nongu gholo kütau lhou lakhimu küha aphi lono, I no shuphe, xalu eno pikülha, nongu no Iw thopimi ke,” ipi Ampeu no sheshu ani, eno “Ni ye Alhou ke.

¹³ Hinguno hilau ye, I no Pa ke; khunomu I u lono xaphemlae; I no mlave keu khuu no tuchile kulupu kea?”

¹⁴ Ampeu Israel Lhou akimtheu, nongu xachilekuluu no ishi piani: “Nongu xalu niye I no Babylon lo ghüshimi puwuni, eno tile küami kümtsü kügha süghi peni, Chaldeami, pano zükilu lo alokivishi chekeqo ghi saghi peni.

¹⁵ Ni ye Ampeu akimtheu, Israel lhokeu, nongu kükaue.”

¹⁶ Azüghi lo alaghi mlakeu, azü kutho lo alaghi mlakeu Mpeu no ishi piani,

¹⁷ I no khurkulu ngo khurshi, ghüshimi eno aghütomi kütsapinyive ke; tipaqo ye ikiqive no ithughi mlave, eno akulu fupinheve ketoi panongu ye hauve:

¹⁸ “Wovekeu vehu kümsüchile auve kevilo, momu khaghi vehu kümsükutoju akevilo.

¹⁹ Julo, I no avehu kithe shi ani; ti ye ipeghi ayae, nongu ye ti pimhelu ani kema? I no timi küghünamo ke-a lo alaghi mla nani eno asayeli lo aghoki mla nani.

²⁰ Tüghashiqo no I gihu nani; aghalo tsü ngo ostrich no I gihu nani; kughengu Iw kishekiphe timiqo pelo yelu penike I no timi küghünamo ke-a lo, eno asayeqha lo azü tsüke.

²¹ Timi tipaqo ye I no I sala shi lhophe keqo, tishianguno panongu pelo I sheqhe shipili peniye ke.”

²² “Ikeghi O Jacob, nongu ye I lau ighamku moe; eno I ju angaghai auve ke.

²³ Nongu ye I lau akipti kümllagho shi nongu mbe tsümoe; eno aghashi pesü I gihu moe. Ni ye akümllagho tsülopi nongu pünaqhi püamoe, momu müsüghüta tsülopi nongu züpüzü püamoe.

²⁴ Nongu ye I ghenguno tsüngqüi keu ta qhümphie, momu now lhoxü tha pesü I ghapiqi tsümphie. Ikemu nongu xine pesü I qaqhie; nongu no akumou shikeu no ingaqhi püani.

²⁵ “Ikeghi Ni ye khuu I likhi I ghenguno nongu xine pevetsü cheni keno Pa huke, I no nongu xine kümsümave tsü nani.

²⁶ I kümsüchilelu lo eno ningu küghaki lo wuni nolo; nongu no achipi ipi penishi aye, nongu chipiu süghilo.

²⁷ Nongu puasü atüghüu no axine shive; eno now aghinimi no I zülo axine shive.

²⁸ Tighenguno I no akimthe-a lo sakiphemi shipütha nani, Jacob shou kütsakungo pinyikeu süghi nani, eno Israel shou küthakügha süghi nani.