ISAIAH 42 - Sumi Naga CL (Re-edited) Bible (BSI)

Ampeu no Kishelu keu Qeu

¹ Julo, I no süqhe chekeu I qeu, I no kisheluve keu khuu shou I ngulho no alovi cheni keno, I no I ghungu pa shou shepichhivae; eno pa no ashiaye kümtsü lau achipi xakütha süghi nani.

² Pa ye ighamkumo nani momu pa sütsa süqhemo nani, momu pa sütsa alaghila lo chilu pemo nani.

³ Pa ye ayeghü iho akeu hechhevemo nani, momu inhemimi akeu mi pinhevemo nani. Pa no kümtsü lau achipiu xakütha süghi nani.

⁴ Pa no ayeghi lo achipiu xakütha süsü moke kutolo, pa ye angu iqevemo momu aghüthi süvemo nani; eno azüghi mkülo akemi no pa yezah khekulhoshi nani.

⁵ Ampeu Alhou, atsütsü lhophe eno tipau sükhope qhikeu, ayeghi xakhope qhino tile aküxü kümtsü tsükeu; timi kümtsü atuthu tsü, eno aghungu pesü xüküami tsükeu huno ishi pi ani:

⁶ “Ni ye Ampeu; I no achipiu mikucho lono o kuluvae, I no o u sünhepe no o sasü chenani; I no o pesü puloshoqhi shi ghi timiqo lau tsü nani, shiyeqo ghenguno aküvü shitsü nani,

⁷ anhethi kighichemi nhethi khaqhitsü nani, aküzü kughuki lo akughu shi akemi saipeghi nani; aküzü lo iqa akemi khaqhiphe nani.

⁸ Ni ye Ampeu, tino I je ke; I juküvü ye khumu tsümo nani, momu I sheqhe keu pesü ajulhoqo tsümo nani.

⁹ Julo, wovekeu vehuqo ye shikupuvae, eno itehi ye I no akithe vehuqo shuphe ani; tipaqo no ipeghi mphi lono, I no nongu vilo piani.”

Ampeu lau Ale Kithe

¹⁰ Ampeu lau ale kithe phelo, ayeghi shekhauno Pa sheqhelo, nongu azüghi lo chekeqo eno tile lhoxü akeqo kümtsü, azüghimkü lo xüküami kümtsü no Pa sheqhelo!

¹¹ Asayeqha eno tile mishiphughiqo pelo asütsa süqhe pelo, Kedar no xüsüpe akeu phuqo, Sela lo küghüna akemi pelo alokivi le phe pelo, panongu pelo naghuto kütsüqa lono ighamku pelo.

¹² Panongu pelo Ampeu lau ajuküvü tsü pelo; eno azüghimkü yeghi lo Ampeu sheqhelo.

¹³ Ampeu no aghütomi lakhi toi chewu; Pa no aghütomi toi khekulhoshi kutope ngoke; Pa no aghüle ku, eno aghüshi ghügha ighae; eno Pa ghümi shou Pa kükakumto pephe.

¹⁴ “Ado kushuo lono Ni ye inaqhoi ngovae; Ni ye inaqhoi I likhi Ni süchile pesü ngovae; itehi ye totimi no apunu küsü lo igha aketoi I no igha nani; I no atuthu shekukuno muqhu nani.

¹⁵ I no atoghi ngo naghutoqo kütsaküngo nani; eno tile atsüni ngo asüboqo ighüivepe nani; I no aghokiqo pesü züdoyeghi shivetsü nani; eno ayizükuchoqo pelo qhaivepe nani;

¹⁶ eno I no anhechemi sasü panongu no khilemu püla chemo keu laghi lo sawu nani. panongu no ithimo keu laghi lo I no panongu la kichetsü nani; I no panoqo zülo aküzü pesü aküvü shivetsü nani; eno kipekuloi keu yeghiqo külaqavetsü nani. I no thime hipaqo shini cheni, eno Ni ye panongu phevemoe.

¹⁷ Khunono ajulho pükhü cheni, eno ayi julho vilo, “nongu ye ni lhouqo ke” ipi cheni keno, tipaqo ye sünheqhive eno shikujove nani.

Israel no Inimo eno Ithulumoe

¹⁸ ‘Inilo, nongu akini kughupomi, nongu anhechemi, ithulu kepushi julo!

¹⁹ I qeu nguno anhethi kighicheu khuu ani kea? I tsapeu nguno akini kughupou khuu ani kea? Iw kishekiphe nguno anhecheu khuu ani kea? momu Ampeu qeu nguno anhecheu khuu ania?

²⁰ Pa ye thime kutomo ithulu cheni kemu chheju chemoe; pa kini ye xukhope ani kemu chilu chemoe.

²¹ Ampeu no Pa chipiu mikucho ghenguno amlo kiqishi Pa yezah süqhe eno ajuküvüpu shike.

²² Ikemu timiqo ye xüle puwuve kemiqo ke; Panongu ye akighipeqo lo khathasüpe ani, eno akughuki lo küsüpe qhivae; panongu ye xülepe khunomu xaphelu movae; panongu ye khetsüshi lakhi shivae eno khunomu panongu “athoputhotsü mlavae”

²³ Nongu gholo khuu no hipau ini nani kea? Hinguno hilau ye khuu no tsaqüi inini kea?

²⁴ Khuu no küpükami u lo Jacob süve kea? eno Israel pesü xülepuwu kemi u lo süve kea? Ti ye Ampeu khuu shou nino axine shive keno, Pa no ke kumo? Pa laghi lo panongu no wumove, eno ningu no Pa yezahqo gholumove ke.

²⁵ Tighenguno Pa no Pa xukighide ngo aghükishi ghime pesü panongu shou lepukue; tino panongu homxape iqü, ikemu panongu ye vethamlae; tino panongu piti, ikemu panongu no alomsümoe.