ISAIAH 41 - Sumi Naga CL (Re-edited) Bible (BSI)

I no Nongu gholo anike Msa Kevilo!

¹ Oh Azüghi mkülo küamiqo, inaqhoi shino I no pikeu inilo, timiqo pelo panongu shikumto kithelu pelo; panongu pelo ighino atsa pipelo; ningu küghakütha ghenguno kumqoni nolo.

² ‘Kipelau no aghütou saighikeu hiye khuu no kea? Pa nepa kümtsü lo tokulu no pape keu huye khuu kea? Pa no shiyeqo kütsakungovepe, tishikeu lono kükamiqo nedaqoda ke; pa zütakikihi no panoqo pesü ayeghimkhu toi shivetsü, eno paw shexilika no panoqo aghijini toi shivetsü ke.

³ Pa no panoqo hawu eno kiumu küpüna mono heche wuve, eno pa pukhu ye ayeghi nemoke.

⁴ Khuu no alagha lakhi abothu lono kulu kea eno khuu no hikithipu shi püani kea? Ni, Ampeu ye abothu lono anike, eno ashekhami gholo ghi ni ye Ampeu ke.

⁵ Azüghi mkülo küami no ithuluve no msa ani; ayeghi shekhau akemi no khokhoshi ani; panongu ye kumqope ighivae.

⁶ kümtsü no pütüta kisüghüu kuphu ani eno pa thiküzüu vilo ishi piani, “Akumto shilo!”

⁷ Asü kümlami no ameshoyi küiqümi shikumto ani, eno hekümüdü chekeu huno hepha chekeu shikumto ghi ishi pike, “Hi ye alo anie”; eno panongu no tipau ithapemo niye ayishu pesü yetsave.

⁸ Ikemu no, Israel I qeu, Jacob, khuu I no kishelu keno, Abraham polokiqi, no ye I poshuu ke.

⁹ I no ayeghi shekhauno o saighi; eno tipau cheku shekhauno, I no o kulu eno o vilo ishi pike, “No ye I qeu, I no o kishelu eno o milive mphie”;

¹⁰ I no o sacheni ke msa kevilo; aghüthisü kevilo kughengu Ni ye o Lhou ke; I no o shikumto eno o kuphu nani, I chipiu mikucho pesü I no o süqhe nani.

¹¹ Julo, khunoqo no o shou amloide ani keno, panongu kümtsü kujovepe nani; khunono o sasü kumgho cheni keno, panongu ye kiumu kumove nani eno püghave nani.

¹² Nongu no nongu mjochile chekemi phu nani kemu phumla nani; nongu sasü aghüshi chekemi ye kiumu kumono hauve nani.

¹³ Kughengu Ni Ampeu, o Lhou no, o u ajeu sünhepe anike; I no o vilo hi piani, “Msa kevilo, I no o kuphu nani.”

¹⁴ Ampeu no piani, “Msa kevilo, akulotiu Jacob, Israel timiqo o kuphu chekeu ye Ni ke, Ampeu no sheshu; o xakuluu ye Israel Lhou akimtheu ke.

¹⁵ Julo, I no o pesü ashu kithe, mtsüsüi eno tsüghaminhei keu athi kütsüghütu shi nani, nono naghutoqo tsüghü eno kubopinyi nani, eno atoghiqo amuu toi shivetsü nani;

¹⁶ nono tipaqo fule nani eno amülhü no tipaqo fusawuve nani; eno pasapagha no tipaqo apanagha fuleve nani. Tileno nono Ampeu lau alovi nani; nono Israel Lhou akimtheu juküvü shinani.

¹⁷ ‘Kughou kumlhomi ngo kühakemi no azü phuwu, eno azü kühave kehu, panongu kughoki no tüghüthi kelauno qhaiveni keno, Ni Ampeu no panongu khochiletsü nani. Ni, Israel Lhou ye khilemu panoqo qhivemo nani.

¹⁸ I no naghuto qhemghaike-a lono aghoki qopipe nani, eno akhila lo azüpuki ipeghipe nani. I no asayeqha pesü ayizükucho shivetsü nani, eno qhaike yeghi pesü azüpuki kughulhotsü nani.

¹⁹ I no asayeqha lo cedar sübo, acacia sübo, myrtle sübo eno olive sübo ipeghipe nani. I no asayeqha lo cypress sübo, chenabo, plane sübo ngo asahubo kümtsa ipeghipe nani,

²⁰ tishikeu lono timiqo no ithulu no ithi peni, tsaqüi kümsükutoju no vethalu peni, tishikeu lono Ampeu u no hi shikepi ithi peni, eno Israel Lhou akimtheu no hipau lhophe kepi ithi penie.

Ajulhoqo ye Adou

²¹ Ampeu no piani: atsa kükügha lo nongu chipiu süghilo; Jacob Kükau no piani, nongu chipiu süghilo.

²² Panongu pelo süghi pelo eno kiu shiniye ani keno ni vilo piju pelo. Ni vilo wovekeu lo panongu ye kiutoi keno piju pelo, tishianguno ningu no panoqo ikhiluni, eno hithiu kishive nani keno ningu no ithinie; momu ni vilo ighinikeu vehu pilo.

²³ Hipa thiu kiu shiveni cheni keno ni vilo pilo, tishianguno nongu ye alhouqo kepi nino ithini; akivi momu kütsakungo keu shijulo, tishikeu lono ni pelo aghüthisüve momu msaichive pelo.

²⁴ Julo, nongu ye kiumu kumoe, eno nongu kümla ye kümsa ke; khuu no nongu kishe keno pa ye aphikümqhüpue.

²⁵ I no ahuu no milakhi hakutho eno pa ye ighivae, pa ye khetsünhe kipelau no ighi, eno pa no I je ku nani; alikümlau no aghani qoda keshi, pa no yepemi qoda nani.

²⁶ Khuu no abothu lono hi sheshu, momu azüuno pi kea? Tishianguno ningu pelo, “Pa ye achipie” ipi peniye ke. Khunomu sheshumo, pikülhamo, nongu no pikeu chilu püamoe.

²⁷ Ni, Ampeu no atüghüushi Zion vilo, “Julo panongu hilau cheni” ipike! I no Jerusalem vilo asütsa kithe pi puwue.

²⁸ Ikemu kughou I no ju keno, tile khumu kühave aghi; Hipaqo dolo, I no ighiju kelo, khochileni kemi mijekütsümi lakhimu kühae,

²⁹ Julo, panongu kümtsü adoue; pano kümlaqo ye kiumu kumoe, pano julhoqo ye amülhü kümsae.