ISAIAH 40 - Sumi Naga CL (Re-edited) Bible (BSI)

Alhouw Timi Lokughunopu

¹ Iw timiqo lokughuno tsülo, nongu Lhou no piani, alokughuno tsülo.

² Mükhano Jerusalem pütsalo, li ghime ye kishekhave no li kipimi peve tsüae, Ampeu no li xine jume küghüsü kini shino tsüve keu huno lukümkha shivae pi li vilo sheshulo.

³ Asütsa lakhi no piani: “Ampeu sala yenguyike-a lo alaghila kutolo; ni Lhou ghenguno asayeqha lo ala müzüchoi shitsülo.

⁴ Akhila kümtsü shepichhi no ato naghuto kümtsü kuchunive nani; kukokilei ke-a kümtsü jokümtsape müdüniyi külaqave nani.

⁵ Tileno Ampeu juküvü piye nani, eno timi kümtsü no tipau ithulu nani, kughengu Ampeu kichi no pivae.”

Alhou Tsa ye Alholo Acheni

⁶ Asütsa lakhino pi, “Sheshulo!” I no pi, “Kiu tsa sheshuni kea?” Timi kümtsü atsüni ke, panow jukivi ye agha lo xamunu toike.

⁷ Kughou Ampeu no tipaqo shou fupukuni keno, atsüni no ighüive, axamunu no hailove cheni; kuchou no timi ye atsüni ke.

⁸ Atsüni no ighüive, axamunu no hailove cheni, ikemu ni Lhou tsa ye alhokupuju ache nani.

Alhou Küka Kije

⁹ O Zion, asütsa kivi shekushuu, naghuto kiqhe lo iqholo; O Jerusalem, asütsa kivi shekushuu, akumtoshi o sütsa süqhelo; vekipighi asheshulo, msa kevilo; Judah phughiqo vilo pilo, “Nongu Lhou julo!”

¹⁰ Julo, Ampeu Alhou no Pa kükakumto lono ayepe nike cheni; julo, Pa no xaphelu keu timiqo, asaxü shi ghi Pa no sasü cheni.

¹¹ Pa no ambekheu toi aloji tucho nani; Pa u lono ambetiqo khape nani; Pa mla lo khadape xapu nani, agholau no ati pazaqo saphe nani.

¹² Khuu no au bokhu lono azüghi mighiju eno au küghüka lono atsütsü mighi juve akea? Khuu no ayeghimkhu pesü ashoghi lo süju momu ahu lono naghuto eno atoghiqo mighi juve akea?

¹³ Khuu no Ampeu kükümsü ithi khalu eno Pa mije luni kea?

¹⁴ Pa no thokha kighithiu shinike Pa ye khuu kükümsü lu kea? Khuu no kuchou xakütha laghi eno akighithi pesü Pa shika, momu vethakulu laghi Pa piye kea?

¹⁵ Julo, shiyeqo ye azütughuko lo kighiji lakhi toie, eno ahu lo ayeghimkhu lothi lakhi pepuku aketoie; julo, Pa zülo züdoyeghi ye amkhu lothi lakhi paphike.

¹⁶ Akipti kümlla shinike Lebanon ghasü eno tile lhoxüqo ye luzülae.

¹⁷ Pa zülo shiyeqo ye kiumu kumo, Pa ye tipaqo pe abokümsa nguno akimkheu shi kihi cheni.

¹⁸ Imaye nongu ye khuu momu kiu pesü Alhou kimhe tsüni kea?

¹⁹ Ajulho keo? Ti ye akümlami no mlaphepe ameshoyi no küzüve no ghükayi chi pesü xipipe cheni.

²⁰ Khuu no athokha lono titoi mlalu moni keno, pa ye mamo kepu sü kishepe ithamo keu julho mla niye kütshakügha kümlami phucheni.

²¹ Nongu ye mtha eno chimla keo? Inahuu ayeghi boqha ghüke lono nongu vilo pimo eno vethamla keshea?

²² Ayeghi bocho shou achekeu noke, ayeghi lo küami ye tülhaqu toie; Pa no nhaqhiphi toi atsütsü xachho eno aphiki toi tshüpe qhi cheni;

²³ Pa no kükami kuchunive cheni, eno ayeghi lo yepemi abokümsa shivetsü cheni.

²⁴ Panongu no shosü aphi lono, abo lho aphi lono, akuhu qüilo aphi lono kughou Pa no amülhü puwuni keno, tipaqo ye ighüive no ateni toi sawuve cheni.

²⁵ Imaye, I sasü kimhe kepu I toike khuu ania? Akimtheu no pi.

²⁶ Atsütsü lo jupukulo: khuu no hipaqo pulhosü kea? Khuu no aqokitikhi tijeje kihilu eno lakhikhi je ithi ani, khuu no pa kumto kije lono tipaqo lakhimu pühave chemo keno, Pa huno ke.

²⁷ O Jacob, O Israel, kushiye ishi muchho ghi pike likhi kea, “Ampeu ye ni launo itshüvae eno I Lhou no I chipiu ithitsü movae.”

²⁸ Nongu ye mtha eno chimla keo? Ampeu ye lhokta Lhou, ayeghiqha Pulhoküsüu ke. Pa ye qeinaive momu akulho shive chemo, Paw vethakulu lotsü ye lheilo tomlae.

²⁹ Pa no aküka pesü kulhokughomi tsü cheni, eno akumto küha kemi küka kughukotsü cheni.

³⁰ Lhothemiu ghi lhove no qeinaive püzü atuthu kühano ikiqive cheni;

³¹ ikemu khunono Ampeu lajukhe cheni keno aküka kithe ithulu nani; panongu no alhuqu toi achishibo xapu yewu nani; panongu no po namu lhomo nani; panongu no chewu nani ikemu akulho shivemo nani.