ISAIAH 39 - Sumi Naga CL (Re-edited) Bible (BSI)

Babylon lono Züqhukishimi Ighi

¹ Tipa ghuloki lo, Babylon kükau, Baladan nu Merodach-Baladan, no Hezekiah ye süano viluve kepi chilu kehu züqhukishimi u lono yesü ngo agho pesü tsüpuwu.

² Hezekiah no amloqi qhiyi panongu sasü, eno pa küakini kilo ghükayi, ameshoyi, tsüngqüikeu mukhu, akughupu thazü, eno aghü nanu, tile akeqo kümtsü piyeve. Pa kilo eno aghakhu lo akeu thaqhü pa no piyemo keu kiumu kühave.

³ Tileno tungkupu Isaiah no pa lau ighi no pi, “Timi hipaqo ye khilano ighi eno kiu sütsa peighi kea?” Hezekiah no khochile, “Panongu ye aghache ghakhu Babylon lono I lau ighie.”

⁴ Isaiah no pi, “Panongu ye o kilo kiu ithuluve akea?” Akükau no khochile, “I kilo ake thaqhü ithuluvae eno I no panongu piyemo keu kiumu kühavae.”

⁵ Tile Isaiah no pa vilo pi, “Aqokitikhi MPEU tsa inilo:

⁶ Julo, o kilo akeu thime, eno o puasü no atsala hipau kutolo pekike tsükeu qhoi Babylon lo xapusü wuveni keu tsala cheae. Kiumu qhitsümo nanie pi Ampeu no piani.

⁷ Eno o polo kughukomi khami ye tilau sawuve no shoko shi ghi Babylon kükau kükaki lo qhi nani.”

⁸ Tileno Hezekiah no Isaiah vilo pi, “Nono Ampeu tsa pive keu ye akivipue.” Kughengu pa no ishi kümsü, “I küxü tivilo ye iqüghaikeu ngo süshokulu aniae.”