ISAIAH 38 - Sumi Naga CL (Re-edited) Bible (BSI)

Hezekiah Küsü eno Vikulu

¹ Tipa ghuloki lo Hezekiah ye süuve no akithi kumlho shive. Amoz nu Isaiah tungkupu no pa lau ighi no pi, “Ampeu no ishi piani, no ye thive niae eno athoputho lumo akehu kutokughoi luvelo.”

² Hezekiah no acheku lo pa gi kughosüve no Ampeu lau inikhu,

³ “O Ampeu, I no kishi O zülo pükhükulu eno amlo tsüqhiyi shi püzü O nhethe lo akivi shiche keno, kimiyeno kümsülu tsülo.” Eno pa ye amlo ghujushi qauve.

⁴ Tileno Ampeu tsa Isaiah lau ighi:

⁵ “Hezekiah lau wuno pilo, Ampeu, o sü David Lhou no ishi piani: I no o kighini chiluvae; I no o nhezü ithuluvae. Julo, I no o küxü lo ampe chighipungu süküpha tsüni.

⁶ I no Assyria kükau u lono no eno aphughi hipau xaphe no süshoni.”

⁷ “Ampeu ye Pa no piqhive ketoi shinanie pikeu kiqishi Pa launo amchipu hipau o tsü nani:

⁸ Julo, khetsünhe kusho no Ahaz dokiche kala lo anepa hecheve keu lo itaghi anepa chighi ideighive nani.” Ikehu akusho no akala lo anepa chighi ideighive.

⁹ Judah kükau Hezekiah no süano viluve kethiu ale hipau yeke:

¹⁰ I no pi, I küxü ahe lono ni ye cheve masavae; I küxü kupuju Kithigha khagho lo apeniye shivae.

¹¹ I no pi, ni ye küxümi yeghi lo Ampeu ithulu no mlla lumae; ni ye ayeghi lo küami ithulumae.

¹² Ambekhemi phiki xaqhivetsü ketoi I launo I ki xaqhive tsüae; aghikughou no aphi ghope tsatha keshi I küxü ghithape liküzüvae; I küxü ye Nono kishekhave tsü ani.

¹³ Puthotsü hi no I shikughujue; abongshuu toi Pa no I ghi tsaphove tsüno I küxü kishekhave tsü anie.

¹⁴ Akhalu momu azüghau toi I sütsa ye tsütsüshi ighauvae; amiqhi toi akulhoshi igha auvae. I nhethi no kunguu jukeno khoivae. O Ampeu, I qaqhipe akelo I xaphetsü kepushi tha-lo tsülo!

¹⁵ Pa no I pütsa, Pa ampi no hitoi shiveke ni ye kiu pini kea? I lolo kukhukimji akeu ghenguno ni ye I küxü tivilo asheshino checheniae.

¹⁶ O Ampeu, timi ye O tsa eno O kümla vecheo xülu cheni, eno I küxü ghi hipau lo anie; I shiaji putho tsüno I püxü tsülo!

¹⁷ Kuchou no I no kukhukimji kije sholu keu ye I kivipu akehu kena; Nono I kimiye kelauno akumo ki lono I küxü xaphe tsüno I xine kümtsü pesü O thiu vepuwove tsüe.

¹⁸ Kithigha ye O shikimthi chemo; momu kithimi ye sheqhe chemoe; tilau iqive kemi ye O shou pükhübe keu lo lajupu anie pi ithi chemoe.

¹⁹ Atsala hipau lo I no shi aketoi küxümi likhino O sheqhelu cheni; Apu no O pükhükulu ghili pesü anuliqo vilo pichenie.

²⁰ Ampeu no I xalu nani eno ningu no akighilebo pesü ni küxü tivilo Ampeu ki lono ale pheni.

²¹ Isaiah no akükau vilo pipüae, “Aqemi pelo mubuthi chisheve keu pesü amishe lo davetsü pelo.”

²² Hezekiah ghi ishi pipüae, “Ni ye Ampeu kilo iqholu nanie pikeu michipu kiu anani kea?”