ISAIAH 36 - Sumi Naga CL (Re-edited) Bible (BSI)

Sennacherib no Judah Leighi

¹ Akükau Hezekiah küka mpe chighiabidiu lo, Assyria kükau Sennacherib no Judah ghakhu lo aliwo shipüakeu phughi kümtsü leighi no khasüve.

² Pa no Lachish lono Rabshakeh gholo ghüshimi aqo kije hape Akükau Hezekiah lau puwu. Panongu no Aphikighishimi Luza kuwula lo azükhe lashou züla lo ngove.

³ Tile kükaki jukükütsüu Hilkiah nu Eliakim, akiyeu Shebna, eno yekikithiu Asaph nu Joah no panongu lau ipeghi.

⁴ Rabshakeh no pi, “Hezekiah vilo pilo, ‘Assyria kükau akijeu no ishi piani: O mlo kumto hipau ye kiu shou bepe ani kea?

⁵ Akichi lo likhino pikeu tsa pesü no ye aghüshi kukughu shi ani keshea? Itehi no ye khuu pükhüpe I mjochile ani kea?

⁶ Julo, nono Egypt shou pükhü ani kemu ti ye ayeghü küsü icheve keue, tino pa mungu ighikeu u lo amihi phisüve tsü cheni. Egypt kükau Pharaoh ye pa shou pükhü kemi kümtsü lau hitoi shicheni.

⁷ Ikemu nono I vilo, “Ningu ye Ampeu, ni Lhou lau pükhübe cheni,” ipi aye, kishino Hezekiah ye Judah ngo Jerusalem lo küami vilo, “Nongu ye akiptia hipau zülo likhino mlla lo” ipi püzü Ampeuw keghi akiqhe-a eno akiptia kütauqo hephovetsü kea?

⁸ Ikehu Assyria kükau I mpeu sasü kilhisho luvelo: tsala o küdau no nono khurshimi 2,000 kutolu kepushi aye, I no khurshi tijehi o tsüni.

⁹ Imaye nono Egyptmiw khurkulu ngo khurshimi shou pükhü akeloye kishino I mpeuw kijemi gholo akimkheu kepten qhejomu hachile luni kea?

¹⁰ Tilikhi kumono ni ye Ampeu sümono no yeghi kütsave nike leighi ani keshea? Ampeu no, “Ayeghi hipau lewu no kütsavelo” ipi I vilo pike.’”

¹¹ Tile Eliakim, Shebna eno Joah no Rabshakeh vilo pi, “Ningu o qemiqo ghi ithi anike kimiyeno Aramaic tsauno ni pütsalo. Atupi ijepe akeqo no chiluve nosake Judahmi tsauno ni pütsatsü kevilo.”

¹² Ikemu Rabshakeh no pi, “Atupi lo iqa akeqo ghi nongu kümtsa pütütaw aba apujo chushoni ye akeno le I mpeu ye panoqo vilo pimono nongu eno no mpeu vilo likhi pi peniye I puwu keshea?”

¹³ Tishino Rabshakeh no puthugho püzü Judahmi tsauno ighamku pi: “Assyria kükau akijeu tsa inilo!

¹⁴ Pa no ishi pianie: ‘Hezekiah pelo nongu pishiqhipe kevilo, kughengu pa ye nongu xaphemla nani.

¹⁵ Pa no nongu pelo Ampeu lau pükhübe peniye, “Mtsüqheino Ampeu no ni xaphelu nani. Aphughi hipau ye Assyria kükau u lo phesüve tsümo nanie” ipikeu pülü kevilo.

¹⁶ Hezekiah tsa ini kevilo. Kughengu Assyria kükau no ishi piani: Nongu u peqhepe ipeghi no I sasü visho shivelo. Tishiaye nongu no pütüta tsaibo eno mububo lono xochulu nani eno pütüta zükikhe lono yelu nani,

¹⁷ I no ighi no nongu sasü no yeghi toikeu athi eno atsaizü ililai akeu, tilau wumoke kutolo nongu pelo hitoi apenani.

¹⁸ Tsükhüi lo tikumo aye Hezekiah no, “Ampeu no ningu xaphelu nani” ipikeu lono nongu saküghüzüve nosae. Shiyeqo lhou khuana no Assyria kükau u lono pano yeghi xaphe püanio?

¹⁹ Hamath ngo Arpad lo alhouqo ye khile ani kea? Sepharvaim lo alhouqo ye khilave akea? Panoqo ye I u lono Samaria xaphelu keshea?

²⁰ Aghakhu hipaqo lhou dolo khuu no I u lono pano yeghi hakholu püanie pi Ampeu no I u lono Jerusalem xaphelu nanie piani kea?’”

²¹ Tishimu panongu ye atsa lakhimu khochilemo no inaqhoive, kughengu akükau zakütsü ye: “Pa khochile kevilo” ipi püake.

²² Tithiu kükaki jukükütsüu Hilkiah nu Eliakim, akiyeu Shebna, eno yekikithiu Asaph nu Joah no aphimini süxü amloksa shi Hezekiah lau ighi no Rabshakeh tsa pesü pa vilo pive.