ISAIAH 35 - Sumi Naga CL (Re-edited) Bible (BSI)

Xapheluve kemi no Ideighi

¹ Yenguyi eno qhaike yeghi no alovi nani eno axamunu toi pule nani;

² asayeqha no amlokiqi shi ale phe eno axamunu kupu toi juvi nani. Tino Lebanon eno Carmel ngo Sharon nguno alau juvive nani. Timiqo no Ampeu juküvü eno ni Lhou kükanguagha ithulu nani.

³ Au miqemlei akemi eno akhonhe khokhoshi akemi shikumto tsülo.

⁴ Amlo süsüshi akemi vilo pilo, “Akumto shilo eno msa kevilo! Julo, nongu Lhou no tsüchile kepu, amkhükulu pesü ighi nani. Pa no ighi no nongu xalu nani.”

⁵ Tileno anhethi kighichemi nhethi xükhove tsü nani, eno akini kughupomi kini khaqhive tsü nani;

⁶ apukhu kinitave kemi no ashe toi kakashi ilhe eno atsa pikümlami no alovi ale phe nani. Kughengu qhaike yeghi, asayeqha lono azü puipeghi no qowulu ke;

⁷ asaye külü lono azükikhe ipeghive nani, qhaike-a lono azüpuki auve nani; tüngtügha no acheke-a lono asalebo ngo amtübo ipeghive nani.

⁸ Tile alaghila auve no tipau pesü Akimthe Laghi ipi ku nani; mithekumomi ye ti pülamo nani. Ti ye Alhou timiqo sala shinani; mbomzümi mu tipa la vezüve monani.

⁹ Abongshuu momu ayiküsa tüghashi mu tilehi ighimo nani; tipaqo lakhimu ithumla nani ikemu xachile luve kemi no ti püla nani.

¹⁰ Ampeu no xachile luve kemi no ale phesü Zion lo ideighi nani; pülhapuju lokivi no panongu kütsü qhopu no amlokiqi shi alovi nani; eno küqa kumlo ye hauve nani.