ISAIAH 34 - Sumi Naga CL (Re-edited) Bible (BSI)

Shiyeqo shou Küghakütha

¹ O shiyeqo, ini kepushi amlo tsüqhiyi kupunu ighilo! Ayeghi eno tile aküxü küa thaqhü; ayeghiqha eno tipau lono ipeghi kemi kümtsü no ini pelo.

² Kughengu Ampeu ye shiyeqo eno pano ghüshimi kümtsü shou axuide ani, Pa no tipaqo kütsave penike ikhipe tsüvae.

³ Panoqo sükumo ye peve no tino muthu münashui nani; panoqo ji no naghuto lono qowu nani.

⁴ Atsütsü ye kaku toi liküzüve no aqhi ayepu kümtsü hailove nani. Tipaqo ye atsaibo, mububo nipa ighiqi keshi ikiqighive nani.

⁵ Atsütsü lono I zütakikihi kutope I no kütsani ye akemi Edommi shou küghathani ke iqi cheni.

⁶ Ampeu zütakikihi ye ambe ngo ane ji eno anetsü michilothi lo atha akeu no küzülu khavae. Ti ye Pa no Bozrah lo aghashi keu, Edom lo zaghishi kütsake lonoe.

⁷ Aviala no timi gholono thi nani, eno ashithetsü no amshitsü gholono ikiqi thi nani. Pano yeghi ye aji no pütsüve nani, eno atha no ayeghi iyivetsü nani.

⁸ Kughengu Ampeu no amkhü lutsü nike, Zion ghenguno tha-lo tsünike ado kughu püani.

⁹ Edom ghoki pesü tsübuta shive, ayeghi pe amichu shino aghakhu pesü tsübuta toi pitive nani.

¹⁰ Putho pucho ti ghapinhemo no alhokupuju eno alholo amchhi phoiku anani. Tiqheli no tiqheli lo khunomu tilau wumo no alholo pighive nani.

¹¹ Alhuqu eno achequ-a shive nani, aqhaqho ngo agha no tile anani. Alhou no akijelau akiqhelau ayeghi tipau mighipe kümsa qhive nani.

¹² Ghenimi eno sakiphemi kühave no kükaqha ipi kepu kühave nani.

¹³ Kükaki eno aliwo lo koghesahu, apüghü ngo ayemhi no itsüve nani, tüngtügha ngo ostrich ki shive nani.

¹⁴ Tüghashi jeli no atine gholo anani; aghalo ne no kukukile nani; putho ghütsü lhoxü ghi tile anani.

¹⁵ Aqhaqho no tile apüsü pesü püzü ati khope achishibo qholo qhinani; alhuqu ghi li tüna sasü tile ngo nani.

¹⁶ Ampeuw kaku phu no phijulo: Lhoxü hipaqo lakhimu pühavemo; momu atüna kühave monani. Kughengu Ampeu no azah tsüno Pa Ghungu no tipaqo hekütsü ke.

¹⁷ Pa no tipaqo sala asaqhi no Pa u no pütüta saje ayeghi mighi tsüe; ikehu ti ye alholo panow shive no tiqheli no tiqheli lo tile auve nani.