ISAIAH 33 - Sumi Naga CL (Re-edited) Bible (BSI)

Ningu Küpüqhiyi Tsülo

¹ Khunomu o theqhive mphi keu, no kütsakungo kicheu, khunomu o thechuve mphi keu, no thekuchuu ghenguno ahae! Kughou nono kütsakungo taveni keno o küghape kütsave nani; eno kughou nono thechu taveni keno o pesü thechuve nani.

² O Ampeu, nino O laju anike ni lau küpüqhiyi tsülo. Ina atsütsü ni kumtou shitsülo, aveküsa ghuloki lo ni xalu tsülo.

³ Kughou Nono iqhaighu ithughini keno shiyeqo no pokhave cheni;

⁴ eno tülhaqu no külhü chuve keshi pano küakini hakholuve tsü nani.

⁵ Ampeu ye qhemghaike-a lo ani; Pa no kuchou xakütha ngo achipiu mikucho pesü Zion shepichhitsü nani,

⁶ eno nongu boqha kumtopu shino xakulupu, alokütsü, eno akighithi pofushi tsü nani; Ampeu sükümsa no Zion küakinie.

⁷ Aghütomi eno külakishi ghinimi ye alaghi lono mloqa anike julo.

⁸ Kicheghüzümi kühave no alaghila ye küghüvae. Puloshoqhiqo hexavae; thopimi jukünatha auvae; khunomu khuu kihi movae.

⁹ Ayeghi no itamjui mloqa ani; Lebanon ghasü no kujoqhiyi hailovae; Sharon no asayeqha toivae eno Bashan ngo Carmel no ighiqivae.

¹⁰ Ampeu no piani, “Itehi ye I no ithuni, itehi ye I no chhosüni eno I küka kumto pephe piyeni.

¹¹ Nongu no amuu mishipu ke aghijini punuqhi cheni; nongu kichi lono nongu pitini keu mi shephe cheni.

¹² Ashiayeqo ye asahubo michepe pitive keshi ayevu shi pitive nani.”

¹³ Nongu putou eno aphivilo akeqo, I kümla eno I kumto ghili ithilo.

¹⁴ Zion lo axinemi, mithekumomi ye thüthüshi akümsa no tshüluvae. “Ningu khuu no ami lo ngoluni kea? Khuu no alhomi lo xüluni kea?”

¹⁵ Khuu no amikucho la lo cheghi eno athotsa picheghini keno, khuu no süxa pesü ala shini keu milive cheni keno, khuu no külügho luve nosa kehu au kukhu qhive cheni keno, khuu no aji peleni keu kukughu ini tsümoni eno alhoksa lono pa nhethi miyi luveni keno,

¹⁶ pa no qhemghaike-a lo xü nani; atuqu liwo no pa sükusho-a shi nani; eno pa sala chuqu-kusho ye püqüve mo nani.

¹⁷ Nongu no akükau jukivi eno no yeghi qhakuchho ithulu nani.

¹⁸ Nongu shithüghüive chekeu nongu no kümsüchilelu nani: “Sükusho süqha kihi eno huju chekeu eno aqoghe kikihiu ye khile ani akea?”

¹⁹ Angü angüshi nongu no mtha keu tsa kipimi ayiküsa shiaye huye nongu no ithumlave nani.

²⁰ Niw tiqhetini phughi Zion julo! Nongu no Jerusalem ithulu nani, ti ye iqüghai eno pekiqemla keu phiki ke, tipau yishu ye khilemu sülamla momu akighi mu sütha mlae.

²¹ Aghüshi zükilu eno ashuka kije no wumla keu ghoki toi Ampeu no Pa kumto lono ni sasü tile anani.

²² Kughengu Pa ye niw Xaküthau, Azakütsüu; Akükau ke; Pa no ni xalu nani.

²³ Nongu kighi ye ichonhei ani; tino ashuka tsükucho mtotoi mlano fusawu kepu phi xakholu amoe. Tishino hakhokulu thimeqo pofushi kije no kulhokughomi ghi pano saje ithulu nani.

²⁴ Aghakhu lo küami khumu, “Ni ye sü ani” ipimo nani; tile akemi kipimi pevetsü nani.