ISAIAH 32 - Sumi Naga CL (Re-edited) Bible (BSI)

Achipiu-mikucho Yepeu

¹ Julo, akükau no achipiu mikucho lono ayepe nani, eno yepemi no kuchou xakütha lono ayepe nani.

² Pama ye pasapagha lo akicheqho, amülhü lo aküghütshü-a toi nani, agha itsümoke-a lo atuqu ijelu ketoi, qhaike-a lo aghoki zü hutoi nani.

³ Tileno ti ithulu eno chilu kemi no ithikuthulu no amlotsü qhiyi nani.

⁴ Lhelhei kemi ghi vethaluve nani, eno angü-angüshi pikemi no mtsümishei piuve nani.

⁵ Mbomzüu pesü akhotomie pimoae, momu amqükiniu ye gihuküzüpue pimoae.

⁶ Kughengu mbomzümi ye anikha tsa picheni, pa ye Ampeu shou akumou pi-shiniye eno chuqu-kusho pesü müzü tüghü akemi ghapiqi tsümo niye pa mlo no akimighi shi axine kuchughu acheni.

⁷ Amqükiniu ghengu ye, pa mqü ye alhoksae; pa ye kumlhomi no achipiu shi apülaghi akimki tsa pesü pa ghesüqhi niye kixikila mqü kuchughu cheni.

⁸ Ikemu gihuküzümi ye agigihupu kukughu shicheni, eno agigihupu lo puthugho cheni.

Akuchhomami lau Küsakusho

⁹ Ithulo, nongu akuchhoma shi ililai akeu totimiqo, tsaqüi I tsa inilo.

¹⁰ Nongu akuchhoma totimiqo ye ampe lakhi dolo thüghüive nani; kughengu atsaithi ghile huni chemoe.

¹¹ Khokhoshi lo, nongu akuchhoma shi ililai akeu totimiqo; no phimini xape aphikümsa shino achita lono yeqhiyephi minivelo.

¹² Atsailu ghüma kivi ghenguno nongu mla kukhu amloiju lo,

¹³ iyei, Iw timiqo yeghi lo asahu ngo aghüsahu no ghüsüve keu, eno ahukülü phughi lo alokivi kiqo kümtsü ghenguno mloqa lo.

¹⁴ Kughengu kükaki ye yenguyive no mishighüna ye pighivae; akiqhe-a ngo qogheki ye alholo tüghashi ki ilhouve nani, khurha lokivipu eno pichepighi sala achu kümza-a shive nani.

¹⁵ Ni shou Aghungu lepuku tsümoke kutolo eno asayeqha no aghüma luza ilhouve no aghasü kimihi shimoke kutolo titoi anani.

¹⁶ Tishino kuchou xakütha no asayeqha lo auve nani, eno achipiu mikucho no aghüma luza lo auve nani.

¹⁷ Achipiu mikucho huno aloino keu, iqüghai keu eno alholo pükhükibe mlaphetsü nani.

¹⁸ Iw timiqo no aloino, iqüghai akulhoqhilu keu, sükusho-a lo küghünauve nani.

¹⁹ Aghasü lo mürasü qipuku no aphughi kütsapinyive tsü namu,

²⁰ nongu khuu no azü phivilo xusü eno amishi ngo khurha kuqhope kighilini keno alokivipue.