ISAIAH 31 - Sumi Naga CL (Re-edited) Bible (BSI)

Egypt lo Iqiche kemi Hasapue

¹ Israelmiw Akimtheu, Ampeu pükhümo momu inijumo no Egypt lo khurkulu kutomo aghikeu eno khurshimi no ighono mtotoi aghikeu pükhüpe akukuphu lakuju lono tilau iqi kemi hasapue!

² Tishimu Pau no alokütsüu kehu küsakusho süghive cheni; Pa ye Pa tsa süchile chemo eno küsaküghami ngo pano kuphu chekemi mjochile ithughi cheni.

³ Egyptmi ye Alhou kumono timi, panow khurshi ghi ashi phimpi kethono aghungu kumoe. Ampeu no Pa u chhopuwo kelo akukuphu tsü akeu ngo ithulu akeu kinikujo ikiqi pühave nani.

⁴ Ikehu Ampeu no I vilo ishi pie, “Abongshuu no lhoxü tsüpe akelo ambekhemi no igha anamu pa kichimla momu hapupo mla ketoi, Aqokitikhi MPEU ghi aghü shini kehu Zion Toghi lo iqighi nani.

⁵ Aghau no yeiqho-iqi ache keshi, aqokitikhi MPEU no Jerusalem süshope anani eno xachilelu nani; Pa no ti pükhape püxü nani.”

⁶ O Israelmiqo, nongu no shisheno khuu mjochileve akeno, Pa lau tsüghü ighilo.

⁷ Kughengu tipa tsala loye milakhikhi no axinepu shi au lono ghükayi ngo ameshoyi julho mlakeqo kümtsü peve nani.

⁸ “Eno Assyria ye timiw kumokeu zütakikihi lono ikiqi thive nani; ghüshimi no aghü zülono pove nani, lhothemi ye aqüaxe lo süve nani.

⁹ Pano sükushou ngo kijemi no msa kelauno amchipu qhive no atuthu küha kuhave nani,” ipi Ampeu, khuu miküqü no Zion lo acheni keno, Jerusalem lo küau no shuphe ani.