ISAIAH 30 - Sumi Naga CL (Re-edited) Bible (BSI)

Egypt lo Iqi Kevilo

¹ Ampeu no pivae, “I kukughu lumono kughu chekemi eno axine küpha ghi I Ghungu no pulomo keu visho shi, kuthovi chekemi hasapue;

² Pharaoh sükusho qholo ngo niye eno Egypt kicheqho phuwu niye khunono I kükümsü lumono Egypt lo iqi cheni keno ahaküsapue!

³ Ikemu Pharaohw sükusho huno nongu kukujopu shive nani, eno Egypt kicheqho huno nongu tichetighepu shive nani.

⁴ Kughengu Judahw hiyampemi ngo lashikami no Zoan ngo Hanes lo aghi namu,

⁵ panongu no ijepe akeu shiaye no akukujopu eno atichepu thono kiumu pano kuphu luni chemo kehu kümtsü no kujove nani.”

⁶ Negeb lo tüghashi akeqo shou pimhelu keu tsape. Judah lashikami no akümsapu-a, khile abongshuu, athicho pighi, eno yewukiche pighi ani keno ti kathasü khurha ngo sayeshi mqa lono aküakini xapu pano kuphu mlani kemi shiaye tsücheni.

⁷ Ikemu Egypt kukuphu ye ameküha eno abokümsae, tigheno I no li pesü “A-a lo kungou Rahab” ipi kuve tsüae.

Hekibidemi

⁸ Itehi ye wulo, timiqo küa lono atupha eno kaku lo yepuku lo, tishianguno tino alholo thopi shi ighini keu tsala kutolo ache peni.

⁹ Kughengu panongu ye Ampeu kükütsütsa ininishi chemo kemi, hekibidemi eno kimkimi;

¹⁰ tungkupmi vilo ishi picheni, “Juchho kevilo,” momu, “Ni vilo achipiu tsa pi kevilo; akishekütsü, kümsükuju tsau pesü ni vilo pilo,

¹¹ alaghi lono ithauvelo, Israelmiw Akimtheu ghili ni vilo pi kevilo.”

¹² Ikehu Israelmiw Akimtheu no ishi piani: “Nongu no atsa hipau phimove no nedaqoda keu ngo pishikiqhi shou pükhü ani kehu,

¹³ qhemghai keu tupi ipo ipeghi no züleno ilaqighive keshi nongu lau hipau xine no titoi ighi nani;

¹⁴ tino ilaqi keu ye ayeghi li lakhi vepho pinyive keshi nani, ti ye atachu shikhave kehu amibalu pelu kepu momu azü shophelu kepu qhemi litsa ghi aghi move nani.”

¹⁵ Kughengu Ampeu, Israel Lhou Akimtheu no ishi pi, “Xaide no pükhübelu keu lono nongu xalu ani; iqüghai pükhübe keu no nongu kumtopu shinani.” Ikemu nongu no pulomo

¹⁶ no pie, “Moe! Ningu ye khurshi lono poveni”, “Khurshi kümthü sasü poveni”, ikehu nongu no ponani ikemu nongu hani kemiu no akümthüu shinani.

¹⁷ Milakhi no kichi kelo qhethonhe no kuhapo; mipungu no kichi kelo kümtsü no kuhave nani, nongu ye naghuto lo michiphi sü toi, atoghi lo amchipu toi pülalaive nani.

Ampeu no Küpüqhiyi nani

¹⁸ Ikeghi Ampeu no nongu küpüqhiyini ke khe ani, Pa no nongu lau kimiyekini piyeni ke ithughi ani. Kughengu Ampeu ye kuchou xakütha Lhou ke; khunono Pa lajukhe acheni keno panongu kümtsü kümghapue.

¹⁹ Nongu Zionmi, Jerusalem lo küami ye mloqa moae. Nongu no kuchou no Ampeu lau ighamku kelo Pa no küpüqhiyi nani. Pa no ti chilu kemtsa nongu khochile nani.

²⁰ Ampeu no kukhukimji chuqupu ngo aghime zü pesü nongu tsü namu nongu Shikükau ye itshü moae eno nongu nhethi no Pa ithulu nani.

²¹ Kughou nongu no ajeu momu piyiu tsüghüveni keno, nongu thiu no, “Ala ye hike, hipa la pülalo” ipikeu sütsa nongu kini lono chilu nani.

²² Tishino now ghükayi ngo ameshoyi no shikeu julhoqo vilo nongu no, “Chevelo” ipi shipünha nani. Nongu no tipaqo ikhipe mithekumo thime paphishi peve nani.

²³ Nongu no apiti yisü kelo Ampeu no tsütsüghu puwutsü nani, eno ayeghi lo pekighi no kinikülü eno pofushi achuqupu tsü nani. Tipa ghuloki lo now pichepighi no achu kümza-a kije lo mzachu nani,

²⁴ eno alu kümla mishitsü ngo khurhaqo no aghijini kivi aniqa lono asüküba no xukütsü keu ithulu nani.

²⁵ Ghikiqhi tsala kijelo kughou no aghümi liwo qogheqo ikiqiveni keno, naghuto kuchuqu eno atoghi kiqhe kümtsü lo aghoki no qowu nani.

²⁶ Itaghi, kughou Ampeu no Paw timi ghime kelono azaku pipekeu khavetsü eno shipivini keno, tipa tsala lono aqhi küvü no khetsünhe küvü toive eno khetsünhe küvü huno ghulo tsüni küvü peküqha keshi ghuthu tsüni piqi alaushi vüqaive nani.

²⁷ Julo, Ampeu ye axukighide no amchhi phochighi ghi cheni; aloghu no Pa kichi chhitoi eno Pa mili no pitimaha keu mi toi ani;

²⁸ Pa tuthu ye aghoki zü no akuo kutolo vesü ikughive ketoi ke. Pa no kütsakungo keu pesü shiyeqo ijoni ke sükuchoqhi cheni, eno panoqo sabide nike khurshi toi akichi lo ayi sütsü cheni.

²⁹ Akimthe tiqhetini ikhiluke ji lo toi nongu no alovi ale phe nani, eno milakhi no Ampeuw naghuto lo, Israel Tuqu lau fulili ighasü iqho cheke toi, nongu no amlo qiqhiyi nani.

³⁰ Ampeu no timiqo pelo Pa sütsa kümgha chilupe nani, eno Pa xukighide lono amiküqü, tsütsüpha tsütsüghu, pasapagha eno mürasü piqi keu ithulupe nani.

³¹ Ampeu sütsa chilu kelo, Pa qheküsü pesü küzaqhi kelo Assyriami ye thüghüive nani.

³² Ampeu qheküsü no panongu shou hepuku keu kiqi lono qüqüpu ngo küghaküsü lebo ghi küigha nani. Pa u kumto pesü Pa no panoqo küpüghü nani.

³³ Kughengu amikishi-a ye khaghi no kutope qhivae, mtsüqheino ti ye akükau piti nike mla püani, akiptia ye thonhei eno kije kusho shipe asü no kupukuno shi püani; eno Ampeu tuthu no amichu ghoki toi tipau küiqü püacheni.