ISAIAH 3 - Sumi Naga CL (Re-edited) Bible (BSI)

Judah ngo Jerusalem Küghakütha

¹ Kughengu julo, aqokitikhi Mpeu no Jerusalem ngo Judah lono timi no pükhüpe ache keu asho eno azü qhoi pewu cheae,

² aghütomi ngo ghüshimi, xaküthami ngo tungkupmi, asakiqhimi ngo layemi,

³ ghüshimi kepten ngo kijemi, mijekütsümi ngo küdüu shitsami, eno timi shou chini chekemi qhoi sawu cheae.

⁴ I no itimiqo pesü panow sakiphemi shitsü nani, eno angakughunuqo no pano shou ayepe nani.

⁵ Aküsami, akitomi, lakhino lakhi dolo nedaqoda kile nani, lhothemi no layemi phi-gihumo, eno kiumu kumo kemi no gihuküzümi thaigha nani.

⁶ Milakhi no pa lilo athiküzümi vilo pi nani: “Nono hebephi anike niw sakipheu shilo, eno hi kütsapinyi akeu shou ayepelo”;

⁷ ikemu pa no pi nani, “Ni ye shipivi lumo nani, I ki loye achuqupu na aphimini namu kühake no ye I küghape timiqow sakipheu shi kevilo.”

⁸ Kughengu Jerusalem ye küpxavae, eno Judah ye ikiqivae, kughengu panongu no Ampeu gihumo no pi-shi keu kümtsü lo Pa mjochile chenie.

⁹ Panongu gino pano shou thopi shi ani; Sodommi toi küsü mono axine shi ani. Pano hasapue! Kughengu panongu no pano ampi shou alhoksa süghi anike.

¹⁰ Amikuchomi vilo pano sala akivi anie pilo, kughengu pano ye pano kümla xochu nani.

¹¹ Kixikilami hasapue! Pa sala aghime anani, kughengu pa no shike toi pa lau shitsü nani.

¹² Angakughunuqo no Iw timi nedaqoda auvae, eno totimiqo no pano shou ayepe auvae. O Iw timiqo, now lapiyemi no nongu sabide ani, eno nongu laghi shiküghüzüve tsüae.

¹³ Ampeu no atsa kügha niye Pa-a lo ngovae; Pa ye timiqo shou küghathani ke puthugho ani.

¹⁴ Ampeu no küghaküthapu lo Paw timiqow layemi ngo mijekütsümi saghini cheni: “Atsailu külhü chuve keu ye nongu no ke, kumlhomiw hakholu keu no nongu ki chhitoi ani.

¹⁵ Kiu kiqi lono nongu ye Iw timi chunuqhi, kumlhomi gi nedape chisheqhi ani kea?” ipi aqokitikhi MPEU no sheshu ani.

¹⁶ Ampeu no pi, Zion limi no tsütsüngoju eno ghaghu nhethi xapusü akuo shohe iqhoiqi, alaunhe lo amqü süpusü qüqüshi igha ambo kulo piye ala checheni,

¹⁷ ikehu Ampeu no Zion limiqo kütsü lo apiyi puku tsü nani eno pano phimpi ghi kümsa shivetsü nani.

¹⁸ Tipa tsala lo Ampeu no pano kijivile chekeu thime hi kümtsü süwuvetsü nani: amqü, akütsükükha, chiku-chila;

¹⁹ akini kighi, aküsa, akuo küzüphi;

²⁰ akütsükuqho, asapu, apokha, axokütsüngü bohuqo, aghapu;

²¹ anguthi ngo anigi kighi;

²² akhoto vehulo pepu kepu phimini jeli, hebephi, eno pisabo;

²³ jupilikümsa phi, phepheike phi, akütsü küzüphi eno agikünha.

²⁴ Tsüngqüi keu züqhulo kütsü-küma anani; apokha züqhulo akighi khapu nani; asa pili punike züqhulo boghesho shi nani; aphimini kivi züqhulo yeqhiyephi pepu nani; eno jukivi züqhulo aghüzaku xapu nani.

²⁵ Now timiqo ye ghüyi lono wove nani eno aghütomi no aghüshi lono ikiqive nani.

²⁶ Aphughi khagho no mloqa iju nani; eno aphughi no aphikümsa ayeghi lo iqa nani.