ISAIAH 29 - Sumi Naga CL (Re-edited) Bible (BSI)

Jerusalem Khasüve

¹ Ariel, Ariel, khikhi David no khasü keno aphughi huye ahae! Ampe atsütsü tiqhetini jeli pini alo.

² Ikemu I no Ariel khasüve nani, tile amloghuju eno akumlo anani, tipau ye aghakishi-a toive nani.

³ I no o bothasüpe aqoghe shiqhe puku no o khasüve nani.

⁴ O sünheqhive nani; aghawu toi nono ayeghi alouno atsa pi nani, ayeghimkhu lono nono chhuchhushi pikeu sütsa ipeghi nani.

⁵ Ikemu no ghümi aqokitikhi timi kichiqhi chekeqo ye amkhu eno amuu fupe cheke toive nani. Eno paikhavi, züleno,

⁶ tsütsüküsü, ayeghi küghütha, aghügha kuloghi, pasapagha ngo miyitsü, eno piti-maha chekeu miküqü lono aqokitikhi MPEU no nongu xuju ighi nani.

⁷ Eno shiye kitikhi khijeno Ariel sasü küpüghü no aliwo hepho ilo khasüpe ani keno, ti kümtsü putho lo pumolu keu samo toi haukhave nani.

⁸ Müzüthi akemi no asamou no chu apüzü amzü ghapiqi mlano ithughi keshi, momu tüghüthi akemi no asamou no azü ye apüzü atüghü ghapiqi mlano ithughi keshi, Zion Toghi sasü aghüshi akeqo shiye kitikhi ghi titoive nani.

⁹ Aghüji no veve keshi izüvui alo, nongu nhethi kighiche alo! Atsaiji shomomu shomzü alo; aji kümka shomomu nanashi alo!

¹⁰ Kughengu Ampeu no züchei keu ghungu nongu shou pukuvae, nongu tungkupmi nhethi kiyikhave tsüno nongu kütsü nhave tsüae.

¹¹ Nongu ghengu ye kungunhetsü hi kümtsü mekha püakeu liküküzü kaku lo akeu tsa toivae. Tipau pesü phithi kemi tsüno, “Hi phijulo,” ipi aye pa no, “Hi ye mekha püanike ni ye phimlae,” ipi nani.

¹² Ikemu kughou no phimtha kemi tsüno, “Hi phijulo,” ipini keno, pa ye, “Ni ye phimthae,” ipi nani.

¹³ Ampeu no pi, “Timi hipaqo mlo ye putou animu akichi-amili loye I gihu eno I phivilo akeshi cheni, panongu no I sümsa chekeu ye timi no shika keu yezah ke,

¹⁴ tighenguno julo, I no itaghi timi hipaqo lau ishokibe akichiqhipu kümla shini; eno panongu gholo alokütsümi lokütsü pühave tsüni, vethakulumi lotsü küsüve tsüni.”

¹⁵ Ampeu launo nongu kukughu küsüpe aküzü lo qhive no, “Khuu no ningu ithulu ani kea? Khuu no ningu ithi ani kea?” ipiche kemi haküsapue!

¹⁶ Nongu no thokha akütsü no aqhoshi tukideve cheni! Alikümlau pesü aghani ipilu nanio? Ali ye akümlau vilo, “Nono I mlake kumoe” ipiluni keshea? momu lhophe keu thime ye lhokipheu vilo, “No ye mla mthae” ipini keshea?

¹⁷ Ado kushuo kumo lo Lebanon pesü axathili shive tsüno axathili no aghasü toive tsünani ke kumo?

¹⁸ Tipa ghuloki lo akinikughupomi no kaku lo akeu tsa chilu eno anhethi iche kemi no aküzü züchiyi keu lono pano nhethi xükhope ithulu nani.

¹⁹ Aqhokighemi no alokivi kithe Ampeu launo ithulu nani, kumlhomi no Israelmiw Akimtheu lau amlokiqi shi nani.

²⁰ Kughengu ayiküsami ngo thoküghami eno alhoksa kughu chekemi qhoi kütsaleve nani,

²¹ alatsa pesü pimimo kemi kitime, küghaküthau laghi lo alichhe shi, akimki pesü achipiu tuchighive chekemi kümtsü kütsave nani.

²² Tighenguno Khuu Abraham xachilelu keno, Ampeu huno Jacob lagha ghenguno ishi piani: “Jacob lagha ye kujomza moae, pano gi ye phalai kithemae.

²³ Kughengu panongu no pano tianuli I u no lhokeqo ithulupe akimtheshi I je ikhilu nani; panongu no Jacob Lhou Akimtheu eno Israel Lhou zülo agigihupu shi puthugho nani.

²⁴ Izüichoi kemi no vethalu nani, eno muchho munu chekemi no akükütsütsa ikhiluve nani.”