ISAIAH 28 - Sumi Naga CL (Re-edited) Bible (BSI)

Ephraim ngo Jerusalem shou Küghatha

¹ Aha, Ephraim küka kütsükuqho xapusü shomzü chekemi, aghüma khila lo aji no theqhive kemi kütsü lo jukighilepu xamunu achekeu ye ighüivae!

² Julo, pasapagha lo mürasü qikeu no kütsale chekeshi, tsüqhu-tsüghu keu züno aqha kuchopu kuchole ighi keshi, Ampeu no aküka kumtomi lakhi puwu no pa u no panoqo pesü ayeghi lo vedape nani.

³ Ephraim küka kütsükuqho xapusü shomzü chekemi ye ikhipe ayeghi lono nedaqhi nani;

⁴ aghüma khila kütsü lo ighüive keu jukighilepu xamunu huye, tsüka tsala züuno amsüu shi nive keu mubuthi toive nani: kughou milakhi no ti ithulu keno pa u lo iloghi khavino chuve.

⁵ Tipa tsala lo aqokitikhi MPEU no Paw timi ghükulumi ghenguno agigihupu eno jukivi kütsükuqho shinani,

⁶ kuchou xakütha nguagha pesü küghatha chekemi tsü nani, akumto pesü khagho lo aghümi tuchile chekemi tsü nani.

⁷ Tungkupmi ngo achinemi ghi aji kümka shopusü nanashi cheni; atsaijiu no panoqo munove akehu panongu ye anhetsü ghi zazashi, eno küghakütha lo ghi izüvui ke.

⁸ Aghulhu lüpa kümtsü akumghu no niqhinilaipe a-a mu kühavae.

⁹ “Pa ye khuu shika niye ani, khuu lau atsape hepho piye nani kea? Anga anileshi khoveno akeqo lau keo?

¹⁰ Kughengu anga ye akiqi küküha tsa hule-hile kititi pini keu likhie.”

¹¹ Kughengu Ampeu no inaghami, paküta keu tsa kipimi vecheo Paw timiqo pütsa nani,

¹² panoqo vilo Pa no khaghi no pi, “Hino akulhokiqhi eno iqünhei keu ke; qeinaive kemi kulhoqhi tsülo”; ikeghi panoqo no ini tsümoe.

¹³ Pano müzülo Ampeu tsa ye anga no akiqi küküha tsa hule-hile kititi pi akeshi nani, tishianguno panoqo no chewu kelo athiuno ikiqive eno alichhe lono meluve no akughu lo sawuve peniye ke.

Zion lo Atsükucho Tuqu

¹⁴ Ikehu nongu thoküghami khunoqo no Jerusalem lo timi hipaqo shou ayepe cheni keno Ampeu tsa inilo!

¹⁵ Nongu no pike, “Ningu ye akithi sasü puloshoqhi shivae, eno Kithigha sasü puloküqhavae, aghümi no züqozü toi yimi ighimu nino akimki eno pishikiqhi lono sükusho qholo ngove akeke ningu shou kiumu shilumo nani”;

¹⁶ ikehu Ampeu Alhou no hitoi piani: “Julo, Zion lo aboqha shi ghi atuyitu sho püakeu huye I no ke, ti ye akughupu tsükucho, thebeike boqha: ‘Khukhumu pülü keu ye lhelheivemo nani.’

¹⁷ I no kuchou xakütha pesü akimghipu kighi shi nani, achipiu mikucho pesü akimghipu tu shi nani; akimki sükusho-a ye mürasü no jole sawuve no atshünazü no akicheqho-a yimive nani.”

¹⁸ Tileno now puloshoqhi akithi sasü shikeu ye xave nani, eno Kithigha sasü puloküqha keu ghi pemlave nani; aghümi no züqozü toi jole ighi kelo nongu ye yipe wuve nani.

¹⁹ Panongu no inaqhe atsütsü, puchou eno putho lo ika ighike kümtsü lo nongu küghape wuve nani; eno hipa tsape vethalu kelo thüghüi nani.

²⁰ Kughengu aphiau xachho nike azüa no ighono ikholoe, eno uküzüphi no müghülo ke aphimpi nhakhamlae.

²¹ Perazim Toghi, Gibeon Khila lo toi Ampeu no paküta keu eno thosülo shichemo keu kümla shinike axuide ithughi nani!

²² Ikehu itehi ye thogha akevilo, tikumo aye nongu yikichhe ye mishishei kithe niae; kughengu aghakhu kuchopu kütsani keu xaküthaza I no aqokitikhi MPEU launo chiluvae.

²³ Amlo tsüqhiyi shino I tsa inilo.

²⁴ Alukichiu ye apiti yisüni kehu ayeghi likhi hokide auveni kea?

²⁵ Pa no ti külaqave kethiu napa ngo pülakhü, ashothi ngo akithi pesü ajoshi süve no kütau piti no apheu sücheni ke kumo?

²⁶ Kughengu pa ye achipishi pa Lhou no kütsüshika püani ke.

²⁷ Napa ngo pülakhü lothi ye athi qole chekeu süpa no hechemoe, ikemu pa lothi qhemi lono asüta no hecheni.

²⁸ Asho mlanie pi athi kuboveni keshea? Moe, alukichiu ye qole auve chemoe, ikemu paw khurkulu no nephomla kepushi sawu cheni.

²⁹ Hi ghi aqokitikhi MPEU launo ighi, Pa lokütsü ye akighiche eno Paw mijekütsü ye akümzapue.