ISAIAH 26 - Sumi Naga CL (Re-edited) Bible (BSI)

Kupukülai keu Lokiqi

¹ Tipa ghuloki lo Judah yeghi lono ale hipau phe nani: “Ningu ye aphughi kumto ani; aliwo eno sükusho-a toi Alhou no xakulupu pesü ni süshoke

² Amikucho shiye, O pülü kemi no ilo penike khagho khaqhilo.

³ O shou pükhübelu kehu amlo itha mono O gholo ache kemi ye Nono kupukülai keu lokiqi tsücheni.

⁴ Alhokuthu Ampeu lau pükhülo; kughengu Ampeu Alhou ye lhokta tuquke.

⁵ Kughengu Pa no aqheküza phughi, akiqhe-a lo küami sünheqhipe chuninhei ayeghimkhu shivetsüe.

⁶ Itehi ye kumlhomi ngo küha kemi pukhu no ti nedasü chewu ani.”

⁷ Amikuchomi laghi ye müdüniyi; Nono pano laghi külaqa tsüke.

⁸ O Ampeu, Ow küghakütha laghi lono nino O laju khe ani; O je eno O kümsüchilelu keu no ni ngulho no mine chekeu ke.

⁹ Putho lo I ngulho no O laju cheni; I lolo no müamzü O phu cheni. Kughou ayeghi lo Ow küghakütha ighini keno, tile akemi no achipiu mikucho shikalu nani.

¹⁰ Kixikilami saphuuve aye, pa ye achipiu mikucho ghili ithimoae; akümzümi yeghi lo thotsü pa ye akumou shinani, eno Ampeu kükanguagha ithulumo nani.

¹¹ O Ampeu, Nono O u peqhepe ani, ikemu panongu ye ithulu amoe. Ow timi ghenguno Nono müamzü keu panongu pelo ithulu no kujove pelo. O ghümi ghenguno ami akeu pesü panongu pitilo.

¹² O Ampeu, Nono ni ghenguno aloinokeu puthuphe tsünani, kughengu Nono ni ghenguno thokha mlave tsüake.

¹³ O Ampeu, ni Lhou, O nguno ampeu kütami no ni shou ayepe, ikemu nino O je likhi kümsülu cheni.

¹⁴ Panoqo ye thivae eno xülu moae; aghawu shive ake ithughi moae; Nono kütsakungo keu pesü panoqo xuju no pano juaje nuxave tsüe.

¹⁵ Ikemu Nono ni shiye kughuko tsüe, O Ampeu, Nono alughi kümtsü pekhope O jekipipu shivae.

¹⁶ O Ampeu, Ow timiqo ye aveküsa lono O phucheni, kughou Nono pano sakiyi keno panoqo no itamjui O lau inikhu.

¹⁷ Totimi no apunudo touve kelo aküsü lono ighamku ihi keshi, nino O zülo tishike, O Ampeu;

¹⁸ nino mishipu, aküsü xapu ihi, ikemu amülhüu punue. Ayeghi lo niw tokulu ye kiumu küha aphie, eno ni vecheo khumu punu mphi.

¹⁹ Ow timi thive keqo ye pano phimpi no xüthughive nani. Nongu ayeghimkhu lo akeqo, ithu alokivishi ale phelo! Kughengu O tsüzü ye inaqhe tsüzü, tino ayeghi vepüxüpe kithimi lau aküxüpu tsünanie.

²⁰ Ighilo, Iw timiqo, nongu chebo lo ilove no ahukikha khavelo; Aloghu no hechesü wuve moke kutolo ado hami itshü aghilo.

²¹ Kughengu julo, ayeghi lo küami xine ghenguno panoqo ghime nike Ampeu ye Pa kungo-a qhive no ipecheae, ayeghi no pa shou aji pele püakeu, eno chhuqho püakemi küsü mono lhaphevetsü nani.