ISAIAH 25 - Sumi Naga CL (Re-edited) Bible (BSI)

Alhou no Akithi Munove nani

¹ O Ampeu, No ye I Lhou; I no O süqhe eno O je sheni, kughengu Nono akümzapu kümla püzüu no kughuchho püakeu mtsüqhei eno pükhükulu shi mlatsüe.

² Nono aphughi shipüsape atuli kughulhove tsü, aliwo akeu phughi kütsave tsü; inaghami kighiki pühave tsüke; aphughi ye khilemu shiqhekithe moae.

³ Ikehu ashiaye kumtomi no O je pipitsü nani; ayiküsa shiyeqo no O sümsa nani.

⁴ Kughengu No ye kumlhomi ngo küha kemi ghenguno sükusho-a, pasapagha lo akicheqho eno tsüka tsala lo akicheqho ke; kughengu ayiküsami tuthu ye pasapagha no aki fudaqhi ketoi,

⁵ qhaike-a lo atsala külü toike. Nono inaghami kumbu hasüve tsü; khüngküsü no atsala külü nhave keshi ayiküsami lekiphe hasüvae.

⁶ Aqokitikhi MPEU no naghuto hipau lono ashiaye kümtsü sala kinikülü chuqupu atsaizü akiviu ghulhu kutotsü nani.

⁷ Eno ashiaye ngo shiye kümtsü nhape achekeu akithi hu Pa no hipa toghi lono munove nani.

⁸ Pa no alhokupuju ghenguno akithi munove nani; Ampeu Alhou no kümtsü nhethi lono anhezü isüvetsü nani, eno Paw timiqo kukujopu Pa no ayeghi lono ikhivetsü nani, kughengu Ampeu no pivae.

⁹ Tipa tsala lo ishi pi nani, “Julo, hi no ni Lhou; ni xalu peniye nino Pa khe cheke. Nino khe chekeu MPEU ye hike; Ningu amlokiqi shini eno Paw xakulupu lo alovini nolo.”

¹⁰ Kughengu Ampeu u no hipau naghuto khe anani, ikemu Moab ye tübatüzü lono aghijini qoda keshi pa-a lono qodave nani.

¹¹ Azüküghami no pa u chhophepe azü ghakeshi Moab no tübatüzü lono pa u chhophe nani, ikemu pa u no shitsa shi anamu pa qheküza gholono Ampeu no kuchunive nani.

¹² Pa no pano liwo kuchuqu tulape ayeghi lo amkhu shivetsü nani.