ISAIAH 24 - Sumi Naga CL (Re-edited) Bible (BSI)

Ayeghiqha shou Küghakütha

¹ Julo, Ampeu no ayeghi pükhülepe pighive tsü nani, eno ayeghi gi süchighipe tile akemi kuthole nani.

² Timi lau toi achinemi lau ghi shinani; aqü-axeu lau toi ampeu lau shinani; aküqhüu lau toi akijemi lau shinani; pünakeu lau toi akünau lau shinani; akighishekuluu lau toi apikupuu lau shinani.

³ Ayeghi ye qhoi pükhülepe xüle khave nani; kughengu Ampeu no hipa tsa pive ake.

⁴ Ayeghi no mloqa eno ighüivae; ayeghiqha no itamjui hailo cheae; akiqheu-a lo küami no iju ani.

⁵ Timi no ayeghi shikitiqevae; kughengu panongu no Alhou yezah, akhuaye eno shekhaha puloshoqhi shikeu hexave ke.

⁶ Ikehu ayeghi ye ghushovae eno tile akeqo ye pano kipimi lono ime ani; panongu ye akülü no ghaqhi püzü timi aghulo likhivae.

⁷ Atsaibo no ighüive no atsaizü püqüvae; akushomi loshipüsüvae.

⁸ Qüqüpu ghügha ye qümüivae, alokivishi iqhaighu keu kühavae, akighi lebo lejo ghi iqünheivae.

⁹ Ale phe ghi atsaizü shomovae; aji kümka no khumtsai ilhouvae.

¹⁰ Pighive keu phughi ye ilaqivae; aki alou ilomla kepushi khavae.

¹¹ Aji küpüqü ghenguno alaghila lo mbumghu ani, alokivi ye hauvae; amlokiqi ye ayeghi lono ikhivae.

¹² Aphughi lo küghüküghalei keu likhivae; khaghoqo no ipovae.

¹³ Ghilekuhu thiu olivebo momu atsaibo lo amshu akeu xoniye sükiniqhi akeshi ayeghi lo shiye kümtsü lau hitoi shinani.

¹⁴ Timiqo no kulolau no Ampeu kükanguagha ghenguno ighamku.

¹⁵ Ikehu kipelau no Pa sheqhelo; azüghimkü lo küami no Ampeu, Israel Lhou je sheqhelo.

¹⁶ Ayeghi shekhau no Amikuchou lau agigihupu eno shekiqhe le phekeu nino chilu ani. Ikemu I no pi, “Ni ye kimghoi eno miqemleivae, I hasapuae! Thekuchumi no thechuvae, pano mqümgha no timi mlaqhivae.”

¹⁷ O ayeghi lo küami, aküighüpu, aqokutho, alichhe no nongu kheani!

¹⁸ Aküighüpu sütsa chilu kehu pove namu aqokutho lo ikiqive nani, khuana no aqokutho lono ipeghilu namu alichhe lono meluve nani. Kughengu atsütsü lashe ye khaqhi püani eno ayeghi boqha huno thüthüshi anie.

¹⁹ Ayeghi ye qhoi kubopinyivae, ti ye axe-ala kütüta shi sülave no shishe sükuchoqhi anie.

²⁰ Ti ye shokümzümi toi nanashi; apushonha toi sükujokiji ani; axine no mishishei qape ikiqive no ithughi kithe move nani.

²¹ Tipa ghuloki lo Ampeu no atsütsü lo aqokitikhi eno ayeghi lo kükami kümtsü ghime nani.

²² Akughumi toi panongu sawo aqokutho lo aqoshi qhive nani; panoqo pesü tilehi khatha püano ado kushuo thiuno ghime nani.

²³ Tishino aqhi no agi zümoive, khetsünhe no agi nhave nani, kughengu aqokitikhi MPEU no Zion Toghi eno Jerusalem lono ayepe no Paw timi sakiphemiqo zülo Pa juküvü pephe nani.