ISAIAH 23 - Sumi Naga CL (Re-edited) Bible (BSI)

Tyre ngo Sidon ghenguno Atsape

¹ Tyre ghenguno pimhelu keu tsape. O Tarshish zükiluqo, igha qalo, kughengu Tyre lo aki ngo zükilu kungo-a kütsalevae! Cyprus yeghi lono pano lau hi kütüghü ani.

² O azüghimkü lo Sidon lhidimi no kinimi shilupe keqo, mlolo.

³ Azüghi lono Shihor ngo Nile thi xapughi no kilhisho keu huno nongu kini laghi shiche, nongu ye shiyeqow kilhishomi shiche ke.

⁴ O Sidon, azüghi lo akumtou, kujolo, kughengu azüghi no pivae: “Ni ye punuke kumono apunu küsü mu süju mphi, kiptimi na totimi namu saputhuju mphie.”

⁵ Egypt no Tyre tsa chilu kelo panongu ye amlosave nani.

⁶ Igha qalo, O azüghimkü lo küamiqo, Tarshish lo povelo!

⁷ Now ahukülü mishighüna khaghi no acheghi keu, eno no phiau lono phuthesü a-a kushuo kutolo qhawo keu huye hi keshea?

⁸ Kilhishomi no agigihu küami, lhidimi no kükami toi achekeu mishighüna, kükami süküsüu Tyre shou khuu no ishi kughuve kea?

⁹ Aqokitikhi MPEU no aqheküza ajekipi ikhivetsü, eno agigihu küami shikujo niye kughuke.

¹⁰ O Tarshishmiqo, itehi ye lakükhapu kühave ake Nile toi no yeghi vechesü alu chiwulo.

¹¹ Ampeu no azüghi shou Pa u chhopuwo no kükaqhaqo sükini; Pa no Canaan küakini laghi kütsave tsüniye azah tsüvae.

¹² Pa no pi, “O qodave kemi Sidonmi, no hukülü ye kühavae, ithulo, Cyprus lo wulo, tilau mu nongu ye akulhoqhi lumo nani.”

¹³ Chaldeami yeghi julo! Tile ache keqo ye kühavae; Assyriami no tüghashiqo sala qhive tsüe. Pano qogheki shiqhe keqo ngo kükakiqo Assyriami no pükhülepe ixapinyi qhive tsüe.

¹⁴ O Tarshish zükiluqo, igha qalo, now sükusho-a ye kütsapinyivae.

¹⁵ Tipa ghuloki lo Tyre ye kükami lakhi küxüdo tohi ampe lhotsüni ghenguno kümsümave nani. Ampe lhotsüni shekha lono kütüqhalimi le lono pheche ketoi Tyre lau ti shikupu nani:

¹⁶ “Akighilebo pesü aphughi mkulo, kümsümave keu kütüqhaliu! O kümsü lupe kepushi ale kungo ghüsülo; ale kutomo phelo.”

¹⁷ Ampe lhotsüni shekha lono Ampeu no Tyre xuju nani, li ye aqekiqe lo idewove no ayeghi lo kükaqha akeqo kümtsü sasü kütüqha nani.

¹⁸ Li no kimje kelono ala shilu keu eno li jume ye pekütsü momu kike mono akimthe shi Ampeu tsü nani. Khunono Ampeu nhethe lo acheni keno, tipau pesü pano chuqupu ngo aphimini kivi kupukuno shi qhütsü nani.