ISAIAH 22 - Sumi Naga CL (Re-edited) Bible (BSI)

Jerusalem Ghenguno Atsape

¹ Kungunhetsü Khila ghenguno pimhelu keu tsape. Kiu ghenguno nongu mishighüna lo küami ye iku aki kütsüqa lono

² alovi mqhumza akhani kea? Now timi thive keqo ye aghüshiqa momu azütakikihi lono kumoe.

³ Now sakiphemi kümtsü kuhave; asüzü kipemi no panoqo boluvae. Panongu no kushuo lo pove keghi ithulu keqo ye küghalu khaveke.

⁴ Ikehu I no pi: “I likhi qhivelo; I pelo kukhukimji shi mlo pelo; Iw timi kütsave keu lo I lokughuno tsüniye pükapütsa tsü kevilo.”

⁵ Kughengu kungunhetsü khila lo mqhumza qhasü ighi kelo avehu izüvuive kepu tsala; aliwo tulave tsüno naghuto lau ighamku kepu tsala aqokitikhi Lhou Ampeu no kuto püanie.

⁶ Elam lono asüzü kipemi gholo khurkulu ngo khurshimi, eno Kir lono azüto kutope chenie.

⁷ Now jukivi khila ye khurkulu no chhivae, eno khurshimi no khagho khepe ngovae.

⁸ Judah sükusho ye Pa no ikhivae. Tipa tsala lo nongu no Aghasü Ki lo aghünanu akeu shou pükhüe,

⁹ nongu no David phughi lo a-a kutomo lo aliwo ipove keu ithulu. Nongu no chhiliu zükikhe lono azü sholu,

¹⁰ Jerusalem lo aki kihiju no aliwo pukho kithe niye akiqo kuboke.

¹¹ Nongu no azükikhe aqau zü luniye atupi kini dolo azükikhe chhuke. Ikemu nongu ye Khuu no tipau mla keno, Pa pükhübe move, momu Khuu no khaghi no ti kughuphe keno, Pa lau jumove.

¹² Ampeu aqokitikhi Lhou no tipa tsala pesü mloqa keu, asa miyepe yeqhiyephi pepu kepu shive tsüae.

¹³ Ikeghi julo, nongu no alokivi eno ahukülü shi amishi ngo ambe heqhichu eno atsaiji shove no pi, “Ningu chushoni nolo, kughengu thoghiu ningu ye thiveni ake.”

¹⁴ Aqokitikhi MPEU ampi no I kini lo pisüvae, “Mtsüqheino nongu no thimoke kutolo hipau xine peve tsümo nani.”

¹⁵ Ampeu aqokitikhi Lhou no ishi pi ani, “Kükaki jukükütsüu Shebna lau wu kepushi ighilo, eno pa vilo pilo:

¹⁶ No ye hile kiu ani eno khuu anie pi akiqhe-a lo o kumo qhokepu ki atu lo yethape püani kea?

¹⁷ Julo, O akumtou, Ampeu no o küzütha pinyive nani. Pa no tsatsai o tsüqüpe

¹⁸ küzüqhi apüzü atumlo toi o kihipe aqa yeghi lo vepuwuve nani. Tilauno no ye thive nani, eno o qheküzapu shiche keu khurkulu huye o mpeu kilo tichetighepu shi nani.

¹⁹ I no ow hiyam lono o tuhaphe nani eno o lakhü lono sünheqhive nani.

²⁰ Tipa tsalani I no Hilkiah nu I qeu Eliakim ku nani,

²¹ eno ow chijeboike phi ngo o pokha pesü pa pipe no o kükagha pesü pa u lo kulhuqhitsü nani. Eno pa no Jerusalem lo küami eno Judah lagha papu shive nani.

²² I no David laghamiw khaqhiyi pesü pa kuo lo betsü nani. Pa no khaqhi kelo khunomu khavemla, eno khave kelo khunomu khaqhimla nani.

²³ I no pa pesü a-a lakhi lo ayishu toi akumtoshi yesüpe qhi nani, eno pa no pano lagha lo agigihupu yekipe süghitsü nani.

²⁴ Pa laghami gigihupu ye apishe-amzü lo ajukhu aghulou lono iku azütughuko kutolo pa shou bepe nani.

²⁵ Aqokitikhi MPEU no shuphe ani, tipa ghuloki lo ayishu mtotoi yesü püakeu ye puleve no ghithape ikiqive nani, eno tipau lo akimshi pufu püakeqo ye ghithape ikiqive nani, kughengu Ampeu no pivae.”