ISAIAH 21 - Sumi Naga CL (Re-edited) Bible (BSI)

Babylon ye Ikiqivae

¹ Azüghi phivilo asayeqha akeu ghenguno pimhelu keu tsape. Miyitsü no Negeb qha jole ighi keshi, asayeqha lo kümsa kimshipu yeghi lono aghümi cheni.

² Mkamghai keu kungunhetsü no I vilo pi; thekuchuu no thechuvae, eno kütsakungo chekeu no kütsavae. Wulo O Elam; khasülo O Media; Babylon no püqapunu chekeu I no kishekhave tsü anie.

³ Hi ghenguno ni ye totimi no apunu küsü sü akeshi aküsü no I phi kümtsü tsügha luvae; hi chilu eno ithulupe ni ye pishepe apuchopungo auvae.

⁴ I mlo hauvae; I shithüghüivae; I no kijiliu khelho akeu loye tiuno khokhoshi kepu süghivae.

⁵ Babylon yepemi no aghulhu lüpa kuto, ayephu qha püzü tile iqa no chusho ani. Ithulo, O kijemiqo; azüto kutolo!

⁶ Kughengu Ampeu no I vilo ishi pivae, “Wuno aghukheu lakhi qhilo, pa no kiu ithulu keno külha pelo.

⁷ Kughou pa no khurkulu, khurha momu sayeshi küsami ithuluni keno pa pelo tsaqütsalei ini pelo.”

⁸ Ikehu aghukheu no ighamku pi, “O Ampeu, I no ithamo no putho pucho aqoghe lo ngo akelaye

⁹ julo, khurkulu küsami chenie!” Eno pa no pi, “Ikiqivae, Babylon ye ikiqivae; pano lhou julho qhoi aghümi no kuboleve tsüae.”

¹⁰ O Iw timi athi toi qolepe fuleve keqo, aqokitikhi MPEU, Israel Lhou launo I no chilukeu pesü nongu lau pikülhatsü ani.

¹¹ Dumah ghenguno pimhelu keu tsape. Milakhi no Seir lono I kuno pi, “Aghukheu, putho do khitohi ania? Aghukheu, putho do khitohi ania?”

¹² Pa no khochile, “Tsüthou chea kemu putho ghi chephi; nono inijuni shi aye itaghi ideighi no inijulo.”

¹³ Arabia ghenguno pimhelu keu tsape. Nongu Dedanmi kicheghüzümi loji ye Arabia ghasa lo ngo nani.

¹⁴ Azü pesü tüghüthi kemi piyelo; O Tema yeghi lo küamiqo, asho pesü pocheghi kemi tsülo.

¹⁵ Kughengu panongu ye azütakikihi süjope akeqo, shexilika piqepe akeqo, eno aghükishi zülono pochenie.

¹⁶ Kughengu Ampeu no I vilo pike, “Aqekiqemi no ado kihi chekeu kiqi lono ampe lakhi dolo Kedar jekipi ye kishekhave nani.

¹⁷ Eno Kedar lo asüzü kipemi akumtomi achili aghi keqo ye aghulo likhive nani, kughengu Ampeu, Israel Lhou no pivae.”