ISAIAH 2 - Sumi Naga CL (Re-edited) Bible (BSI)

Ampeu w Naghuto

¹ Amoz nu Isaiah no Judah ngo Jerusalem ghenguno ithulukeu tsa:

² Asheazü loye Ampeu Ki akeu naghuto pesü naghutoqo dolo akiqheu shi iqhikumto tsü nani eno atoghiqo shou süqhe nani; shiye kümtsü no tipau lo qokive ilo nani,

³ ashiaye jelino ighi no pi nani: “Ighilo, ningu Ampeuw naghuto lo iqhoni, Israel Lhou kilo wuni, tileno Pa no Pa laghiqo ni shika peni, tishianguno nino tipau lo checheni.” Kughengu Ayezah ye Zion lono ipeghi nani, eno Jerusalem lono Ampeu tsa ipeghi nani.

⁴ Pa no shiyeqo dolo küghathatsü eno ashiaye dolo kimpikile keu xathatsü nani; panongu no azütakikihi hephape akuphu mlave nani, eno angu pesü asübo kikixi zütachi mlave nani; shiye no shiye shou aghü küpüghü monani, tike kumono aghüshi qokiphe mu kühave nani.

⁵ O Jacob laghami, ighilo, ningu Ampeu küvü lalo checheni nolo!

Ampeu Tsala

⁶ No Ampeu ye kuchou no Ow timi Jacob laghami kileqhivae, kughengu panongu ye kipelau küdüu lhoaye eno Philistiami toi tuumi pülü keu no chhivae, panongu no inaghami sasü au küküsü luvae.

⁷ Ghükayi ngo ameshoyi no pano yeghi chhitoi ani eno pano kini ye ashekha-aghile kühae; khurshi no pano yeghi chhitoi ani, eno panow khurkulu ye ashekha-aghile kühae,

⁸ asü-atu julho no pano yeghi chhitoi ani, panongu no pano u lo kümla zülo itsaqi auvae.

⁹ Ikehu, timi kümtsü sünheqhipe kuchunive nani, panongu kipimi qhitsü kevilo!

¹⁰ Ampeu loghu eno Pa kükanguagha zülono posü atuki eno ayeghi qhou itshüuve lo.

¹¹ Aqheküza nhethi xapu kemi ngo tsütsüngoju kemi ye sünheqhipe kuchunive nani, eno tipani ye Ampeu likhino chuqumghai nanie.

¹² Kughengu aqheküzami eno tsütsüngoju kemi ghenguno aqokitikhi MPEU no atsala lakhi kuto püani tipani no panoqo sünheqhive nani;

¹³ Lebanon cedar sübo qhemghai akeqo, Bashan phisübo kümtsü sünheqhi nani;

¹⁴ naghuto eno atoghi qhemghai akeqo kümtsü külaqa nani;

¹⁵ aqoghe kuchuqu eno aliwo kuptu kümtsü;

¹⁶ Tarshish zükilu eno jukivi zükilu kümtsü kütsave nani.

¹⁷ Timiqo kuchhoma eno tsütsüngoju keu sünheqhipe kuchunive nani; tipani ye Ampeu likhino chuqumghai nani.

¹⁸ Ajulho kümtsü kishekhave nani.

¹⁹ Ampeu no ayeghi süküthüni ye ighi kelo timiqo no Pa loghu eno Pa kükanguagha zülono posü atuki eno ayeghi alou itshü nani.

²⁰ Tipani timiqo no pano sala mlakeu ghükayi ngo ameshoyi julho kümllaqo ikhipe jichukili ngo ashuqhaqo kungo-a lo peve nani,

²¹ ti ye Ampeu no ayeghi süküthü niye ighi kelo timiqo no Pa loghu eno Pa kükanguagha zülono atuki eno anhepho kighipeqo lo itshü luni kehue.

²² Timi shou pükhübe kevilo, kughengu pa ye atuthukishe kumo aye kiu meküapu ani kea?