ISAIAH 19 - Sumi Naga CL (Re-edited) Bible (BSI)

Egypt Ghenguno Atsape

¹ Egypt ghenguno pimhelu keu tsape. Julo, Ampeu ye khüngküsü kümthü shou no Egypt lo cheni, Egypt lo ajulhoqo no Pa zülo thüthüshi nani, eno Egyptmi mlo ye hauve nani.

² I no Egyptmi pesü Egyptmi xukutho püzü panoqo dolo, akisüghümi dolo, aphughi momu kükaqha dolo kichighipe nani;

³ pano dolo aghüthiküxü kühave nani, eno I no pano kimji hexavetsü nani; panongu no ajulho, küdüu, tumumi eno kithixashemi küsütsa nani;

⁴ ikemu I no Egyptmi pesü ayiküsa mpeu u lo süvetsü nani; eno ayiküsa kükau no panoqo shou ayepe nani, aqokitikhi MPEU no shuphe anie.

⁵ Nile ghoki lo azü hailove nani, eno aghoki ye qhaighoive nani,

⁶ Tipa zülaqo ye münauve nani, aghokitiqo no qhaive no amtübo ngo asalebo no thi ilove nani.

⁷ Nile mkülo asütsüni thive nani, shosü püakeu kümtsü pewuve no qhaighoi kiumu kühave nani.

⁸ Nile lo akuhoyi no akha khache kemi kümtsü no iju mloqa nani, akhame kivemi no aghüthisü nani.

⁹ Phepheike phi kümlami ngo aphi kimiye kughomi no kütakihi nani.

¹⁰ Aqekiqemi no amlo itapinyi nani, eno atsükupumi no thibuive nani.

¹¹ Zoan sakiphemi ye mbomzümie; Pharaoh mijekütsümi alokütsüu no anikha kükütsü tsücheni. Nongu ye kishino Pharaoh vilo, “Ni ye alokütsüu nu, khaghi kükami papemi nue” ipiluni kea?

¹² Imaye tipaqo ye khile ania? Panoqo pelo aqokitikhi MPEU no Egypt shou kughu akeu o vilo pipelo.

¹³ Zoan yepemi ye aghüzü shivae, Memphis tomi ye pishiqhivae; khunoqo no Egyptmi ghütsüghi shi ani keno tipaqo no li sabidevae.

¹⁴ Ampeu no pano dolo kübangü keu kükümsü süve tsüae, shokümzümi no pa kumghu nekiphe keshi panoqo no Egypt pelo ala kümtsü lo nekiphepe nani.

¹⁵ Kinimi kumlhomi na, kighithimi kümthami namu khunomu Egypt kuphumla nani.

Egypt, Assyria, Israel Kümghapu

¹⁶ Tipa ghuloki lo Egyptmi ye pano sükuchoqhi keu aqokitikhi MPEU zülo totimi toi akümsa lono khokhoshi nani.

¹⁷ Judah yeghi ye Egyptmi ghenguno thüghüi keu je shive nani. Aqokitikhi MPEU no pano shou kughu püakeu ghenguno panongu no Judah je chilu kelo msa nani.

¹⁸ Tipa tsala lo Egypt yeghi lo mishighüna pungu no Canaanmi tsa pi eno aqokitikhi MPEU papeni ke tushoqhi nani. Tipaqo gholo lakhi ye Khetsünhe Phughi ipi ku nani.

¹⁹ Tipa tsala lo Egypt yeghi mta lono akiptia lakhi, eno alughi lono atu tsükucho lakhi, Ampeu lau mlatsü keu anani.

²⁰ Tino Egypt lo aqokitikhi MPEU akeu michipu shi nani. Kughou nedaqoda ke ghenguno panoqo no Ampeu lau ighamkuni keno, Pa no xakuluu eno sükushou puwu no panoqo xaphelu nani.

²¹ Ampeu ampi no Egyptmi lau pephe piye nani, tipa ghuloki lono panongu no Pa ithi no aghakishi ngo akümllagho pesü mlla nani, eno Pa lau ashoqhi shino ti pape nani.

²² Ampeu no Egypt ghime nani kemu panoqo shipivi nani, panongu no Pa lau ideighi no kimiyeqhiyi penike qhüiniju kelo Pa no chilu tsüno panongu shipivi nani.

²³ Tipa tsala lo Egypt lono Assyria kutolo alaghi kuloghi auve no Assyriami no Egypt lo ighi, Egyptmi no Assyria lo wunani, eno küma kümtsa mlla nani.

²⁴ Tipa tsala lo Israel ye Egypt ngo Assyria gholo kümghülu ghi ayeghi lo akümghapu shiye shi nani,

²⁵ ti ye aqokitikhi MPEU no ishi pino kümghatsü keu lono ke, “Egypt Iw timi, Assyria I u lo kümla, eno Israel I mheghi, akümghapu shilo.”