ISAIAH 18 - Sumi Naga CL (Re-edited) Bible (BSI)

Cush Ghenguno Atsape

¹ Aha, Cush ghoki kukuu achishiboqo no nhakeu yeghi,

² amtübo shuka lono lashikami pesü aghoki lono puwu chekeu! Nongu akümthü ghinimi, puyelei eno qhemghai kemi shiye lau, aphivilo eno putou küami no msa chekeu, akumto eno qhaküsü shiye lau wulo, aghokiqo no pano yeghi kotha ani.

³ Nongu ayeghiqha lo xüküamiqo, kughou naghuto lo amchipu süqheni keno, jukuto lo! Afuko küigha kelo chiluve lo!

⁴ Kughengu Ampeu no I vilo pi: “Ghile ghuloki lo akimhi tsüzü toi, tsütsüni lo ghaqhi keu külü toi, I kungo-a lono I no asheshino jupiqi nani.”

⁵ Kughengu atsaibo kupu huno axathi shive no xomphi lono, Pa no azütachi pesü akhuni ngo alokaqo kixipe shikimtheve nani.

⁶ Tipaqo kümtsü naghuto lo ashikuchu ghau ngo tüghashiqo sala shive nani. Mütsü tusho lono aghau chuqupu, eno süsü lono tüghashi chuqupu shinani.

⁷ Tipa ghuloki lo timi hipaqo no aqokitikhi MPEU lau sükusho süqha süghi nani puyelei eno qhemghai kemi, aphivilo eno putou küami no msa chekeu, akumto eno qhaküsü shiye, aghokiqo no pano yeghi kotha ani, panongu no Zion toghi, khile aqokitikhi MPEU je acheni keno, tilehi süghi nani.