ISAIAH 17 - Sumi Naga CL (Re-edited) Bible (BSI)

Damascus Ghenguno Atsape

¹ Damascus ghenguno pimhelu keu tsape. Julo, Damascus ye ixapinyive no aphughi ghi kühave nani.

² Aroer phughiqo ye pighive no achu kümza-a shive nani eno khunomu tipaqo hapupo monani.

³ Ephraim lo aliwo hauve nani; Damascus yekipe ye hauve nani; eno Syria lo ghükulumi ye Israelmi nuli mhekiqipu sasü küsaje nani, ipi aqokitikhi Mpeu no shuphe ani.

⁴ Tipani Jacob jekipi ye hauve no pa philo atha ijiqi khave nani.

⁵ Pa ye ghilemi u no puthugho akeu ghibo gholuve keshi nani, Rephaim khila lo ghile huve kethiu abo hami qhivetsü ketoi nani.

⁶ Israel lo aghibo hami likhive nani, ti ye kughou olive bo lo axathi xoni keno kunguu ake lo kinia küthüa, eno aloka lo bidia pungua likhive ketoi nani, ipi Israel Lhou Ampeu no shuphe ani.

⁷ Tipa tsala lo timi no Lhoküsüu Israelmiw Akimtheu lau jupuku nani.

⁸ Pa ye pa u no akümlla-khache mlakeu, Asherah tsükucho momu axokütsüngü kiptiaqo shou pükhü move nani.

⁹ Tipa tsala lo pano liwo kumto phughiqo ye inahuu pano puasüqo no ighi kelo ghasüghave eno naghuto kütsüqa lo akeqo no pighive keshi yenguyive nani.

¹⁰ Kughengu nono o xakulupu Lhou pheve eno o kighijepu Tuqu kümsüchile lumove; tighenguno, nono asübo kivi eno inami tsaibo loka shosü aghina,

¹¹ ti shoke tsalani no thuiku eno thanau ye puilelu aghi namu, amloghuju eno shipivi kümla küsü tsala lo ghile humlave nani.

¹² Aha, ashiayeqo kumqhu; azüghi ghügha toi iqhaighu ani! Aha, shiyeqo ghügha kuloghi; azüghizü fukukucho toi igha ani!

¹³ Shiyeqo no azüghi kumto ghügha toi igha ani, ikemu Pa no sakiyi kelo panoqo no kushuo lo kuhave nani, amülhü no amuu fupe chekeshi eno pasapagha zülo ayeghimkhu toi Pa no hapupo nani.

¹⁴ Julo, avelau ye shithüghüi anie! Ikemu tsükutho züuno panoqo ye kühavae! Hino ni pükaqhi no xulepuwuve tsükemi saje ke.