ISAIAH 16 - Sumi Naga CL (Re-edited) Bible (BSI)

Moab no Akukuphu Laju

¹ Sela lono asayeqha kathasü Zion limi toghi lo yepeu lau sükusho süqha shi ghi ambe tsüpuwu lo.

² Apüsü lono haleve keu ghau toi, Moabmi ye Arnon ghoki lo ani.

³ “Mije tsülo; kuchou xakütha tsülo; puchomghü lo o kicheqho pesü putho hutoi ni khonha luve tsülo; hapheve kemi sasü tsülo; kupokichemi kichephetsü kevilo;

⁴ Moab lono hapheve kemi pelo no gholo ado hami ngolu pelo; kütsakungo kemi launo süsho lo. Kughou nedaqoda kemi kühave no kütsakungo keu taveni, eno munudaqhi kemi hauveni keno,

⁵ tileno iqemokeu kikimiye lono kükalakhü shosü tsü nani eno David laghami no ayepe nani, pa ye achipiu phu no xatha kemi, amikucho shinike khelho nani.”

⁶ Moab ye kishi aqheküza kelae! Pa qheküza, tsütsüngoju keu, eno akiphikumo nino chiluvae; pa kuchhoma ye abokümsae.

⁷ Tighenguno Moabmi ye Moab pighive keu ghenguno qalo. Kir-hareseth lo atsaikipki sho kümsüqhiyi mloqa alo.

⁸ Kughengu Heshbon luza eno Sibmah tsaibo ye hailovae; aloka khikhi Jazer eno asayeqha kuto qüwove keno shiye mpemi no miche qhivae; tipau khuni no azüghi kutolo qüwove ke.

⁹ Ikehu Sibmah tsaibo ghenguno ni ye Jazer küqa gholono qa ani; O Heshbon ngo Elealeh, I nhezü no o pütsüvae, kughengu mütsü tusho lo o xathi ghile ghenguno alovi chekeu ye kishekhavae.

¹⁰ Alokivi eno ahukülü ye kinikülü lu lono süwuvae, atsailu lo alovi igha ale phemovae; atsaizü kümlau no tsüghü movae; alokivi ghügha ye kishekhavae.

¹¹ Tighenguno I mlo, I ngulho no küghaküsü lebo toi Moab ngo Kir-hareseth jupe igha anie.

¹² Kughou Moabmi no akiqhe-a lo wuno achineki lono inikhuni ye pano ampi no müamzüni keno, ti ye kiumu avehu shiluni chemoe.

¹³ Ampeu no Moab vehulo püzüu no atsa hipau pike.

¹⁴ Ikemu itehi ye Pa no ishi pivae, “Aqekiqemi no ado kihiche keshi ampe küthü dolono Moab jekipipu ye thoküghapu shive nani, paw timi kütsasa ache keu dolo ghükulumi ye aghulo eno miqemlei kemi likhive nani.”