ISAIAH 15 - Sumi Naga CL (Re-edited) Bible (BSI)

Moab Ghenguno Atsape

¹ Moab ghenguno pimhelu keu tsape. Moab ye pighivae, kughengu Ar ye kijili lakhi lono kütsavae, Moab ye pighivae, kughengu Kir ye kijili lakhi lono kütsavae.

² Dibonmi ye mloqa niye akiqhe-a lo iqhovae; Nebo ngo Medeba ghenguno Moab no ighaqa anie. Kümtsü no akütsüsa ngo akichimhi miyevae;

³ alaghi lono yeqhiyephi pepuvae; aki kütsüqa eno kobidi-a lo kümtsü no anhezü piji qa ani.

⁴ Heshbon ngo Elealeh no qa akeu sütsa no Jahaz kutolo chilu ani; tigheno Moab ghüshimi ghi khokhoshi ighamku ani.

⁵ Moab ghenguno I mlo iju ani; tilehi timiqo ye Zoar lo, Eglath-shelishiyah lo pokhavae. Mtsüqheino panongu ye qasü Luhith qhe lo iqho cheni; khami no küsakusho küqa shisü Horonaim la lo cheni;

⁶ Nimrim ghoki no qhaivae; atsaneghu, asütsüni no thi ilovae, khilehimu atsüni küxü kühavae.

⁷ Ikehu panongu ye pano küakini kütsü püakeu xapusü Mulosübo Khila katha ikuvae.

⁸ Aküqa no Moab yeghi küzüvae; Li no ighaqa keu no Eglaim eno Beer-elim kutolo chilu ani.

⁹ Dibon ghoki ye aji no chhivae; Ni ye li shou alau süghini aphi, Moabmi pokalu kemi, ghükulumi ghenguno abongshuu aphi.