ISAIAH 14 - Sumi Naga CL (Re-edited) Bible (BSI)

Jacob Lagha Athoputho

¹ Ampeu no Jacob lagha kimiyeve no itaghi Israel kisheluve nani, eno pano yeghi lo sawo qhive nani, inaghami no Jacob laghami gholo xüküqhauve nani.

² Ashiayeqo no Israelmi sasü pano yeghi lo ighi nani, eno Ampeu yeghi lo Israel laghami no ashiayeqo aqüaxemi shi saluve nani. Inahuu khunono pano qhasü eno nedaqoda püa keno, itehi ye pano no tipaqo shou ayepe nani.

Ghükulumi no Babylon Cheqhi

³ Nongu ghime eno anguka lono nongu pelo akaghashi mlaithape chekeu lono kughou Ampeu no nongu kulhoqhi tsüni keno,

⁴ tileno nongu no Babylon kükau cheqhi nani: “Qhaküsüu ye kishi ikiqive akelae, ayiküsau huye kishekhavae!

⁵ Ampeu no kixikilami küsü, yepemi kükaküsü hechheve tsüae,

⁶ tino tamomithe axukighide lono ashiayeqo ghaqhi, eno shiyeqo kijipüsaqhi pano qhasü cheke.

⁷ Itehi ye ayeghiqha no qümüi akulhoqhi no alokivi le phe ani.

⁸ Asahu sübo ngo Lebanon lo cedar süboqo no alovi pi ani: ‘O sünheqhive ake asü küküxümi ye ningu yeqhi nike ighi movae.’

⁹ Kithigha ye nono ighi kelo o sasü kusho niye itho thuvae; ayeghi lo sakiphemiqo ghawu eno shiyeqow kükami ghawu kümtsü pano kükalakhü lono ithu o sasülu penike küdaputhu anie.

¹⁰ Panoqo kümtsü no o vilo pi nani: ‘No ghi nino miqemleike toivae! No ghi ningu paphi shivae!’

¹¹ Akighilebo no o shipili, o kijivile chekeu ye Kithigha lo saiqighivae; ashikuchu pithe no o züa küqhaphi, eno apithe no uküzüphi shiniae.

¹² “O inaqhe yepu, tsükutho nu, no ye kungugha lono kishi ikiqiva kelae! No khuu shiyeqo kütsaqhi chekeno, o pesü kishi ayeghi lo veqhive akela!

¹³ O mlo lono nono piae, ‘Ni ye kungugha lo Alhou yepuqo shou ikuno akiqhe-a lo I küka lakhü ghoni; ni ye ahuu alhouqo no kuho kumqo chekeu naghuto lo iku iqani;

¹⁴ ni ye khüngküsü kiqhe-a shou ikuno I küghape Shishe Akiqheu toiveni.’

¹⁵ Ikemu no ye aqokutho ashekhau Kithigha lo sünhe saiqighivae.

¹⁶ No ithulu keqo no thüghüi nani: ‘Ayeghi no süküthü, kükaqha sükini chekeu ye timi hipau keshea?

¹⁷ Ayeghiqha pesü asayeqha toive, aphughiqo kütsa, eno akughumi phepuwo chemo keu ye pa keshea?’

¹⁸ Shiyeqow kükami kümtsü pütüta kumoki lo agigihupu shi zü akhani;

¹⁹ ikemu no ye icheve keu süloka toi o kumoki kühano khalau vephevae, azütakikihi lono ikiqive no aqokutho lo iqive chekemi kumo no o nhape apukhu no akumo neda keshi auvae.

²⁰ Nono ow timi ghiqhive eno o yeghi kütsapinyive ke ghenguno no ye kükami kütami gholo shiqhomo nani. “Küsakügha polo kughukomi ye khilemu jekukithe pemoniu!

²¹ Pano puasüqo kipimi ghenguno pa nuliqo ghiqhini ke kuto lo, tikumo aye panongu no ithu ayeghi qhasü no aphughi shiwove nosake.”

²² Aqokitikhi MPEU no shuphe ani, “I no panoqo mjochile ithughi nani, eno Babylon juaje ngo ghükulumi, tiqhelimi ngo athiumi kümtsü nhüve nani,” Ampeu no shuphevae.

²³ “I no Babylon pesü achequ sala shivetsü nani, eno ayizükucho kughulhove no kütsakungo keu chhophe pesü khule nani,” ipi Aqokitikhi MPEU no shuphevae.

Assyria Ghenguno Atsape

²⁴ Aqokitikhi MPEU no ashoqhi shivae: “I no kughu püake toi eno I no miji püake toi tishi nani,

²⁵ I yeghi eno I toghi lono I no Assyriami kütsave no nedave nani; Iw timiqo launo panow kuokhasü eno abighi lono amakho ikhive tsüni.”

²⁶ Ayeghiqha kümtsü ghenguno kughu püakeu kimji ye hike, eno shiye kümtsü lau au chhopuwo akeu u ye hipau ke.

²⁷ Kughengu aqokitikhi MPEU no kughuve ke khuu no moe pini kea? Pa u chhove ke khuu no tuchile luni kea?

Philistiami Ghenguno Atsape

²⁸ Akükau Ahaz thiveke mpe lono atsape hipau ighi:

²⁹ O Philistia, nongu ghimeche keu küsü ichevae pi alovi kevilo, apighi kuhu lono tsütsüla ipeghi nani, eno pa ti no athicho pighi toi nani.

³⁰ Iw timi kumlhomi ngo aveküsami no chusholu eno akulhoqhilu nani; ikemu Philistiami ye ghümono akuhu kutolo I no püqümiye pesü ghaveni.

³¹ Mloqa lo, O khagho, ighamku lo, O aphughi; Philistiami kümtsü no akümsa lono akhonhe küghalo! Kughengu ahuu no akuqhu phoboi cheae, eno tile anisüu ye lakhimu chemoe.

³² Shiye ghinimi vilo kiu khochileni kea? “Ampeu no Zion puthuphe, eno Paw timi aveküsami no ti ijelu cheni.”