ISAIAH 13 - Sumi Naga CL (Re-edited) Bible (BSI)

Babylon Shou Küghakütha

¹ Amoz nu Isaiah no Babylon ghenguno ithulu keu tsape.

² Agha itsümoke toghi lono amchipu peqhepe ighamku ghüshimi kulo; aqheküzami phughi khagho lo ilo penike au kihipe panoqo tsülo.

³ Ni ampi no Iw kishekiphemi azah tsüvae, eno I loghu pepheni ke I ghütomi, I juaje shikütsümi ku kumqovae.

⁴ Aqokitikhi ghügha toi naghuto lo mbumghu ani! Shiye kükaqhaqo no kumqope iqhaighu akeu ghüghae! Aqokitikhi MPEU no aghükishi ghenguno ghüshimi hekütsü ani.

⁵ Ampeu eno Pa loghu ghünanu ye ayeghi qhoi kütsapinyive tsünike tsütsü-yeghi bouno cheni.

⁶ Mloqalo, kughengu Ampeu tsala ye kupunuvae, ti ye Akughushuu launo kütsakungo ighi akeshi nanie!

⁷ Ikehu timiqo u lo aküka kühave nani, eno kümtsü no amlo hauve nani.

⁸ Panongu ye thüghüive no apunu küsü sü akeshi aghime no tshüluve nani. Panongu no kichimamashi agi no hughüipe lakhino lakhi jukile nani.

⁹ Julo, aloghu ngo axukighide pesü ayeghi küghüküghaleive tsüno tile axinemi akeqo kütsave nike Ampeu tsala ayiküsapu shi cheni.

¹⁰ Kughengu atsütsü lo ayepu-ayesü no pano küvü tsümove nani; khetsünhe ipe chephi lono züchiyive nani, eno aqhi no pa küvü tsümove nani.

¹¹ Ayeghiqha küsakügha eno kixikilami xine ghenguno I no ghime nani; aqheküzami lakhave nani eno akülaki shikemi kuchunive nani.

¹² I no ghükulumi pesü Ophir lo ameshoyi, akiviu nguno akighipiu shivetsü nani.

¹³ Aqokitikhi MPEU xukighide tsalani Pa loghu lono atsütsü süküghütha, eno ayeghi kilhe pheve nani.

¹⁴ Ashihami zülo aqhu no poche keshi, momu akheu küküha mbeqo toi, kümtsü no pütüta yeghi lo panow timi lau kuhakive idewove nani.

¹⁵ Pocheke lono ithuluve eno küghaluve keu ye qhuqhive nani.

¹⁶ Panoqo nipu shipütha, aki xüve tsü eno angakughunuqo pano nhethe lono chisheqhi nani.

¹⁷ Julo, Babylon sasü küpüghü penike ghükayi ngo ameshoyi no qhümlani kemi Mediami I no xukutho ani.

¹⁸ Pano süzü no lhothemi kaqhi nani; akichhelo kupu eno itimiqo shou mu kimiyeqhiyi keu piyemo nani.

¹⁹ Chaldeami juaje eno qheküzapu, kükaqha dolo jukighilepu Babylon ye Sodom ngo Gomorrah toi Alhou no kütsaleve nani.

²⁰ Tiqheli kümtsü lo khunomu tile küghüna kithemo nani; Arabmi mu tile aphiki tshümae, ambekhemi mu tilau ambe qhimae.

²¹ Ikemu tüghashiqo no tile ngo nani, aqhaqho ngo ostrich no tile anani; eno aghalo neqo no kakashi ilhe nani.

²² Atine ngo tüngtügha no aqoghe eno akighiki lono igha nani; Babylon tüqhüdo ye kupunuvae li tsala ye süpushumo nani.