ISAIAH 11 - Sumi Naga CL (Re-edited) Bible (BSI)

Amikucho Yekipe

¹ Jesse süzüngü lono akhuni ipeghi nani, eno pa kuhu loka lono axathi pithi nani.

² Ampeu Ghungu no pa shou anani, alokütsü ngo vethakulu Ghungu, mijekütsü ngo aküka kumto Ghungu, akighithi ngo Ampeu sükümsa Ghungu no pa shou anani.

³ Ampeu sükümsa no pa züküvü shinani. Pa ye ithukulu kiqi lono küghathamo momu chikulu lono xathamo nani,

⁴ ikemu kuchou xakütha pesü kumlhomi tsü nani, eno akuchunimi ghenguno aghibiu lono xathatsü nani; pa kichi lo ayiküsü akeu pesü ayeghi shou hepuku nani, eno pa tuthukishe pesü kixikilami pithive nani.

⁵ Achipiu-mikucho no pa pokha shino pükhükulu no paw chighichepu shinani.

⁶ Atine no ambe gholo xünani, akhighiu ngushuu no aneti gholo ihozü nani, amshiti ngo abongshuu no kümtsa mzachu nani; eno itimiqo no panongu kheu shi nani.

⁷ Amishi ngo ava no kümtsa chu nani, panoqo ti no kümtsa ihozü nani; abongshuu no amishi toi aghijini chu nani.

⁸ Angakughunu no cobra zülo ili nani, eno itimi no athicho kilo au chuxusü nani.

⁹ Iw akimthe toghi lo ghüzaghügha momu kütsakungo keu shimo nani; kughengu azü no azüghi nhape akeshi Ampeu kighithi no ayeghi chhitoi nani.

¹⁰ Tipa ghuloki lo shiye kütami no Jesse kuhu, khuu ashiayeqo ghenguno amchipu shi ithughi nani keno, pa jekipi kungo-a lo pa phusü ighi nani.

¹¹ Tipa ghuloki lo Ampeu no Assyria, Egypt, Pathros, Cush, Elam, Shinar, Hamath, eno azüghimkü lo Paw timi achilishi ghüpüaghi keqo itaghi ghuthu akiniu xaphe nike Pa küka peitha nani.

¹² Pa no amchipu süqhepe shiyeqo kütüghü nani eno Israel ngo Judah lono haküghütsüve kemi ayeghi kobidi lono hekütsü saghi nani.

¹³ Ephraim nhekushu ye kühave nani, eno Judah peitha püsa kemi ye kütsave nani; Ephraim ye Judah jupe anheshumo nani, eno Judah ye Ephraim peitha püsamo nani.

¹⁴ Ikemu küma küqhano kulolau Philistiami lewu nani, eno kipelaumi nhemgha xülepe wuve nani. Küma no Edom ngo Moab mhoqhive nani, eno Ammonmi no küma gholu nani.

¹⁵ Ampeu no Egypt züghi lo azücheku qhoi puthovetsü nani, eno Pa tuthu shukuthui keu pesü Pa u no Euphrates ghoki shou kihi puku kelo aghokiti tsüni shive nani, eno timiqo no apukhuqho xapusü katha luve nani.

¹⁶ Israelmi no Egypt yeghi lono ipe kelo pano ghenguno alaghila aghike toi, Paw timi ghüpüaghi kemi ghenguno itaghi Assyria lono alaghila kije lakhi anani.