ISAIAH 10 - Sumi Naga CL (Re-edited) Bible (BSI)

¹ Akumou xaküthaza eno qaqhikeu yezah mla chekemi hasapue,

² Iw timi kumlhomi chipiu luvetsü, aghibiu lono küghatha tsümono chimemi ngo mighimi pükaqhi niye panongu no tishi cheni!

³ Putou no küsakusho, aghime tsala ighi kelo nongu ye kishiveni kea? Khuno lau akukuphu phuwuni, eno no küakini khile qhiveni kea?

⁴ Akughumi gholo sünhe sawumo aye pithive kemi gholo ikiqi nani. Ikeghi Ampeu loghu ye tave mphi eno Pa u ye xachhope aphike.

Assyria Qheküza shou Küghatha

⁵ Aha, Assyria, I loghu lo peitha chekeu qheküsü pano u lo anie!

⁶ Alhou kümthami shiye, I loghu shikighide kemi lau wuno alaghila lo aniba qoda keshi püka, eno hakholu penike I no azah pa tsüno puwu ani.

⁷ Ikemu pa kükau no ti ye kümsü amoe; pa ye shiye aghulo kumono kutomo kütsa pinyiveni keu kümsüpu anie;

⁸ kughengu pa no ishi pi ani: “Iw zatsümi kümtsü kükami kekumo?

⁹ Calno ye Carchemish toike kumo? Hamath no Arpad toi, Samaria no Damascus toike kumo keshea?

¹⁰ Jerusalem ngo Samaria nguno alaushi ajulho mlla chekeu ghakhuqo I no qhasüve keshi,

¹¹ Samaria ngo li julho lau shike toi ni ye Jerusalem eno li julho kütsa mlani keshea?”

¹² Kughou Ampeu no Zion Toghi eno Jerusalem lo Pa kümla shikhaveni keno, Pa no Assyria kükau qheküza tsapi eno tsütsüngoju chekeu ghenguno aghime tsü nani.

¹³ Kughengu pa no pike: “I kumto, I lokütsü lono I no tolue, kughengu ni ye vethakulu anie; I no ashiayeqo dolo alughi xavetsü, eno pano küakini xüle luve tsü; amshitsü toi I no kükami shokulue.

¹⁴ Aghau püsü toi I no ashiayeqo küakini phuluvae; jusü move keu yikhu lilu keshi I no ayeghi kümtsü liluvae; eno khunomu achishibo xakhomo momu akichi xükhope ighamoe.”

¹⁵ Amüghü momu küxüyi ye pa peitha chekeu kütsü lo iku qolu nani keshea? Ti ye aqheküsü momu asüthalu no timi peitha cheghi kepu toive niae!

¹⁶ Ikehu aqokitikhi MPEU Alhou no paw ghüshimi chhikhoi keqo lau aphikiqi küsü puwu tsüno pa küakini qhoi ami no pitive nani.

¹⁷ Israel küvü huno ami ilhouve nani, eno Akimtheu huno ami mili shive no ghulo lakhi lono aghüsahubo pitivetsü nani.

¹⁸ Aküsü no timi tsaqhive chekeshi, panow jukivi ghasü eno aluza kümtsü Ampeu no kütsave tsü nani.

¹⁹ Asübo achili aghi keqo ye aghulo likhi kehu itimi nomu kihizüla nani.

Ghükulumi Ideighi nani

²⁰ Tipa ghuloki lo Israelmi ghükulumi eno Jacob lagha lo kixiphelu keqo ye pano ghime chekemi shou kumono kuchou lono Ampeu, Israelmiw Akimtheu shou mungu nani.

²¹ Jacob lagha lo ghükulumi aghulo Akughushu Lhou lau ideighi nani.

²² Kughengu now timiqo no azüghi lo asaye jehi anamu ghükulumi aghulo likhino ideighi nani. Kütsakungo kepu za ye achipi lono shuphevae.

²³ Kughengu Alhou, aqokitikhi MPEU no azah shive ketoi Israel yeghi kümtsü kütsakungo keu süghi nani.

²⁴ Tighenguno Alhou, aqokitikhi MPEU no pi ani: “O Zion lo Iw timi akeqo, Egyptmi no shike toi Assyriami no asüthalu eno aqheküsü pesü nongu heqhi kelo msa kevilo.

²⁵ Kughengu ado hami thiu I loghu ye tave nani, eno tithiu ye pano kütsa nike puku nani.

²⁶ Oreb tuqu qhalo aqokitikhi MPEU no Midianmi ghaqhi kelo toi, Pa no akighikipili pesü panoqo küzaqhi nani. Eno Egypt lo Pa no aqheküsü peqhe keshi, Pa qheküsü huno azüghi shou anani.

²⁷ Tipa ghuloki loye nongu bighi lono Assyriami makho ikhivetsü nani; nongu kuo lono kuokhasü ikhipe hechheve tsü nani. Panongu ye Rimmon lono wuve nani.”

²⁸ Aghümi no Aiath lo ighivae; panoqo ye Migron kathasü wuvae; Michmash lono akho kuto ani;

²⁹ Panongu ye akhila kathasü ighi no kijiliu ye Geba lo ngoni cheni; Ramah ye khokhoshi ani, Saul ghüna Gibeah ye pokhavae.

³⁰ O Gallim ngaqo, ighamkulo! O Laishah, amlotsü qhiyi inilo! O Anathoth kimiye nolae!

³¹ Madmenah eno Gebim lo küami no kuhakive akighije phuchenie!

³² Atsala hipau lo aghümi ye Nob lo ngono pano u sükumqope Zion limi toghi, Jerusalem toghi, kichi kümsa nani.

³³ Julo, Alhou, aqokitikhi MPEU no akümsapu küka lono aloka loqhi nani; shishe chuqumghai keu yeqhive nani eno qhemghai akeu sünheqhive nani.

³⁴ Pa no amüghü pesü aghasü sü yeqhi nani, eno Lebanon ye Akükanguagha Küau u lono ikiqive nani.