ISAIAH 1 - Sumi Naga CL (Re-edited) Bible (BSI)

¹ Judah lo kükami Uzziah, Jotham, Ahaz, eno Hezekiah ghuloki lo Amoz nu Isaiah no kungunhetsü khikhi Judah ngo Jerusalem ghenguno ithulu keno tihuke.

Judah Kixikila

² O atsütsü, inilo, O ayeghi, akini xükholo; kughengu Ampeu no pi ani: “I no atianuliqo tucho no saputhu, ikemu panoqo no I hebide ke.

³ Amshitsü eno khurha ghi pano pighiu ithi cheni, ikemu Israelmiu no ithi chemoe, Iw timiqo ye vethalu chemoe.”

⁴ Aha, axine shikicheu shiye, akipimi pekimshi xapu chekemi, alhoksa shiche kemi tianuliqo, amikuchokumo shiche kemi! Panongu ye Ampeu phevae, Israelmiw Akimtheu jukünatha eno ithithai no tsüghüsü athiu idewovae.

⁵ Kushiye nongu heqhi apeni kea? Nongu ye kushiye hebide auveni kea? Azaku no akütsü kuchopu sü ani, eno amlo no pumhomoivae.

⁶ Apukhumza lono akütsü kutolo kitilamu vithai keu kühavae, ikemu azaku ngo apiyi eno chiji keu zaku likhivae; tipaqo ye shikimtheve momu khave momu thazü pesü vakümtsha püamoe.

⁷ No ghakhu ye yenguyelei ani; no phughiqo ye ami no piti ani; inaghami no nongu küa lono no yeghi kütsave tsüae; tüsümi no leluve no pighive keshivae.

⁸ Zion nga ye atsailu lo axapiki eno akukali lo apushonha toi, khasüve keu phughi toivae.

⁹ Aqokitikhi MPEU no ningu ghenguno ghükulumi aghulo qhitsümo keaye, ningu ye Sodom ngo Gomorrah toive aghini che.

¹⁰ Nongu Sodom yepemiqo, Ampeu tsa inilo! Nongu Gomorrahmi, ni Lhouw shiküka inilo!

¹¹ Ampeu no pi ani: “Nongu ghakishi hijeje kiu ala ani kea? Ni ye akipti kümllagho ghenguno ambetsü eno akivishi lojive keu lhoxü tha lukümkha ani; Ni ye amshitsü, momu ambeti ngo ane hipaqo ji pesü I züküvü shichemoe.”

¹² “Nongu no I zülo ighi kelo khuu no hipaqo sawo ishi I kikhala tiphe lopi kea?

¹³ Adou kümllagho süghi kevilo; axokütsüngü ye I ghenguno aphikümqhüpue. Aqhi kithe, Sabbath eno aqoaho hekükütsü, alhoksa eno aqo hoho hipaqo Ni ye kutuu mlae.

¹⁴ I ngulho no now aqhi kithe eno ampelo tiqhetini jeliqo mithie; tipaqo ye I ghenguno amakhoe, Ni ye tipaqo xapu keno lhovae.

¹⁵ Kughou nongu no au sükhope I kuni keno, I no nongu launo I nhethi kughove nani; nongu no akighini kutomo shimu I no inimo nani; nongu u lo aji no chhitoi anie.

¹⁶ Nongu ampi qhuve eno shikimthe lulo; I nhethe lono nongu kümla lhoksa pevelo; alhoksa kümla tavelo,

¹⁷ akivi mlani keu shika lulo; kuchou xakütha phulo, nedaqodave kemi süsho tsülo, kuchou xakütha pe mighimi tsülo, chimemi ghenguno puthugholo.”

¹⁸ Ampeu no pi, “Ighilo, ningu itehi no kiqikuto juni: nongu xine no hughüi aghi namu, tipaqo pesü mürasü toi metsüghoive tsüni; akuhuphi toi huchuyi aghi namu, asüpha toi metsüghoive tsüni.

¹⁹ Nongu no pulo eno agholu aye ayeghi lo thime kivi chulu nani;

²⁰ ikemu nongu no milive no hebide aye, nongu ye ghüyi lono wove nani; kughengu Ampeu kichi lono piqhivae.”

Pükhükümlapu Mishighüna

²¹ Pükhükulupu, kuchou xakütha no chhitoi keu phughi ye kishino kütüqhalimi ilhouve akelae! Ghuthu lakhi loye amikuchomi no tile ache ikemu itehi ye ghikiqhimi no auvae.

²² Ow ghükayi ye abaghu shivae; o tsaizü akiviu ye azü kitevae.

²³ Now sakiphemi ye hekibidemi eno küpkami gholo kichemie. Kümtsü no külügho kimiye eno müamzü tughotili phu acheni. Panongu ye mighimi lau kuchou xakütha tsüchemo, eno chimemi ghenguno puthugho tsüchemoe.

²⁴ Tighenguno Ampeu, aqokitikhi MPEU, Israelmiw Akughushuu no shuphe ani: “Ah, I no nongu I ghümi shou I loghu pukuni eno panongu shou amkhü luni.

²⁵ I no nongu shou I u ghapukuni eno nongu baghu kümtsü ayi ghukimthe keshi pitive tsüni.

²⁶ Azüu toi I no now xaküthami tsüchileni, eno abothu lo toi now mijekütsümi tsüni. Tithiu no nongu pesü amikucho, pükhükulupu phughi ipi kutsüni.”

²⁷ Achipiu xakütha pesü Zion xachilelu nani, eno tilehi khunono xaideni keno amikucho pesü xalu nani.

²⁸ Ikemu hekibidemi ngo axinemi ye kümtsa kütsave nani, eno Ampeu pheve kemi ye pithive nani.

²⁹ Nongu no aphisübo lono chini eno chine-chini ghutu shi kehu nongu shikukujo kelo nongu no kujomza nani.

³⁰ Kughengu nongu ye aphisübo nipa ighive ketoi eno azü küha keu ghutu toive nani.

³¹ Akumtomi no asükügha toi, pa kümla no aghijini toi, khunomu ghapinhemla no kinikujo piti küqhave nani.