IPEKULU 9 - Sumi Naga CL (Re-edited) Bible (BSI)

Püsa Apunguu: Egyptmi Tsü-aqu Thive

¹ Tithiu Ampeu no Moses vilo pi, “Pharaoh lau ilo no pa vilo pilo, ‘Ampeu no ishi piani, “Iw timiqo puwuvelo, tishianguno panoqo pelo I mllalu pelo.

² Tsala nono panoqo puwuni keu milive no tsüghape auve aye

³ julo, Ampeu u no püsa kije pesü o luza lo pichepighi, khurshi, khurha, sayeshi, amishi eno ambe loji shou pukutsü nani.

⁴ Ikemu Ampeu no Israelmi tsü-aqu ngo Egyptmi tsü-aqu dolo kiyeqü keu shivetsü nani, tishikeu lono Israelmiw thaqhü ye thimo nani.”’”

⁵ Eno Ampeu no ado kihithave tsüno pi, “Thoghiu Ampeu no aghakhu lo hipau shi nani.”

⁶ Tishiwo thoghiu Ampeu no hipau shie. Egyptmi tsü-aqu kümtsü thive, ikemu Israelmi tsü-aqu ye lakhimu thimoe.

⁷ Pharaoh no timi khami puwu eno julo, Israelmi tsü-aqu ye lakhimu thi püaghimoe. Ikemu Pharaoh mlo ye kuthovive, eno timiqo puwumoe.

Püsa Akütsüghou: Amishe

⁸ Ampeu no Moses ngo Aaron vilo pi, “Amiphoki lono ayevu au kichhi lulo, eno Moses pelo Pharaoh nhethe lono kunguu küza puku pelo.

⁹ Tipau no Egypt yeghi kümtsü shou ayeghimkhu shive nani eno Egypt yeghi kümtsü lo timi eno tüghashiqo shou amishe ipeghive nani.”

¹⁰ Ikehu pama no amiphoki lono ayevu epe Pharaoh zülo puthugho no Moses no kunguu vepuku, ikelo tino timi eno tüghashiqo philo amishe ilhouve.

¹¹ Eno küdüumi ye Moses zülo puthugho mlave, kughengu amishe no küdüumi eno Egyptmi kümtsü shou ikughive ke.

¹² Ikemu Ampeu no Pharaoh mlo kuthovive tsü, eno Ampeu no Moses vilo pi ketoi, pa ye pama tsa initsü move.

Püsa Akütsüniu: Mürasü

¹³ Tithiu Ampeu no Moses vilo pi, “Inaqhe itheno ithu Pharaoh zülo wulo eno pa vilo pilo, ‘Ampeu, Hebrewmi Lhou no ishi piani, “Iw timiqo puwuvelo, tishianguno panoqo pelo I qelu pelo.

¹⁴ Kughengu itehi ye I no püsa kümtsü no ampi shou eno o qemi ngo ow timiqo shou puku nani, tishikeu lono ayeghiqha kümtsü lo I toi kemi khumu kühae pi nono ithi nani.

¹⁵ Kughengu itehi I no I u peqheno püsa pesü no eno ow timiqo heke aye, nongu ye ayeghi hipau lono kühave aghini cheke.

¹⁶ Ikemu I no I küka o piye, eno tishikeu lono ayeghiqha kümtsü lo I je sheshu peni keu kimji ghenguno I no o saputhu ke.

¹⁷ No ye itehi kutolo no ampi sheqhe ghi Iw timi mjochile ani eno panoqo puwu amoe.

¹⁸ Julo, Egypt yeghi hukuthu tsala lono ishi kutolo khilemu shimphi keu I no mürasü kimshi thoghiu hipa tüqhüdo lo ghuqhipe nani.

¹⁹ Tighenguno, itehi timi puwu no o tsü-aqu eno nono aluza lo pighi akeqo kümtsü saighi no sükusho-a lo qhiluve lo, kughengu timi eno tüghashi aluza lo akeqo kümtsü aki lo saghimo keqo ye kughou panoqo shou mürasü qipukuni keno thikhave nani.”’”

²⁰ Tishino Pharaoh qemi dolo khunoqo no Ampeu tsa sümsache keno panongu no mtazü pa qüaxemi ngo pa tsü-aquqo aki lo hasaghive,

²¹ ikemu Ampeu tsa lo amlo tsümo keqo ye pano qüaxemi ngo atsü-aqu aluza lo qhive.

²² Tithiu Ampeu no Moses vilo pi, “Atsütsü küdau o u peqhelo, tishianguno Egypt yeghi kümtsü lo timi, tüghashi eno aluza lo asütsüni shou mürasü ghuqhi penie.”

²³ Moses no pa küsü atsütsü küdau peqhe, eno Ampeu no pasapagha ngo mürasü eno ami ayeghi lo puwu. Ampeu no mürasü Egypt yeghi shou ghuqhi tsü.

²⁴ Egypt no shiye shi ipeghi kelono ishi kutolo khilemu shimphi keu mürasü kimshi gholono tamono ami phaphashi ipeghie.

²⁵ Mürasü no Egypt yeghi lo timi eno tüghashi aluza lo akeqo kümtsü püghave tsü. Eno aluza lo atsüni eno asübo kümtsü vechhe khavetsü.

²⁶ Goshen yeghi khile Israelmi no akeno, tile likhino mürasü ighimoe.

²⁷ Tithiu Pharaoh no Moses ngo Aaron kupuwu no pi, “Ishiu loye I no axine shivae; Ampeu no achipiu lo ani, ni eno Iw timiu no achipikumo lo anie.

²⁸ Ampeu vilo inikhu tsülo, kughengu Alhouw pasapagha ngo mürasü ye ihulovae. I no nongu puwuveni, eno itehi nongu ye ngokithe pemoae.”

²⁹ Moses no pa vilo pi, “I no mishighüna lono ipeve kemtsa, Ampeu lau I u peqheni. Pasapagha ye kishekhave nani, eno mürasü kühave nani, tishikeu lono ayeghi ye Ampeuw kepi nono ithi nani.

³⁰ Ikemu no eno o qemi ghengu ye, I no ithi anike nongu ye Ampeu Alhou sümsa chemoe.”

³¹ (Yeqhiyebo ngo barleybo vechheve tsü, kughengu barleythi ye peipeghi ae eno yeqhiyebo ye puipeghi ake.

³² Ikemu ashothi ngo emmer ye vechhe tsümoe, kughengu tipaqo ye munu ipeghi chenie.)

³³ Ikehu Moses no mishighüna lono Pharaoh launo ipeve no Ampeu lau pa u peqhe, eno pasapagha ngo mürasü kishekhave, tsütsüghu no ayeghi lo ghuqhi move.

³⁴ Ikemu kughou Pharaoh eno pa qemi no tsütsüghu, mürasü eno pasapagha kishekhave keu ithulu keno, pa no itaghi axine shive eno pa mlo kuthovive.

³⁵ Ikehu Pharaoh mlo ye kuthovive, eno Ampeu no Moses vecheo pi ketoi, pa ye Israelmi puwumoe.