IPEKULU 8 - Sumi Naga CL (Re-edited) Bible (BSI)

Püsa Akiniu: Achuyi

¹ Tithiu Ampeu no Moses vilo pi, “Pharaoh lau ilolo eno pa vilo pilo, ‘Ampeu no piani, “Iw timiqo puwuvelo, tishianguno panoqo pelo I mlla penie.

² Ikemu tsala nono panoqo puwuni keu milive aye, julo, I no o ghakhu kümtsü lo achuyi püsa puwu tsüni.

³ Nile lo achuyi lho nani eno tipaqo no o ki, o chebo, o lüpa, o qemi, ow timiqo kilo, eno o miphoki ngo o na-khulho liqo lo iloghive nani.

⁴ Achuyiqo no o shou, ow timiqo shou eno o qemi kümtsü shou ikughive nani.”’”

⁵ Eno Ampeu no Moses vilo pi, “Aaron vilo pilo, ‘Aghoki, azüla, eno ayizükuchoqo shou o u xachho no o küsü peqhelo, eno achuyiqo pelo Egypt yeghi shou ighi pelo!’”

⁶ Ikehu Aaron no Egypt lo azü akeqo shou pa u xachho, ikelo achuyiqo no ipeghi no Egypt yeghi nhachhive.

⁷ Ikemu küdüumi ghi panow tuqhou mqü vecheo tipatho shilue eno achuyiqo pelo Egypt yeghi shou ikughi lupe.

⁸ Tileno Pharaoh no Moses ngo Aaron kuno pi, “I lau eno Iw timi launo achuyiqo ikhi süwuve tsü penike Ampeu lau qhüiniju tsülo, eno I no timiqo pelo Ampeu lau aghakishi tsülu penike puwunie.”

⁹ Moses no Pharaoh vilo pi, “I pelo kughou no o ghenguno, eno o qemi ngo ow timiqo ghenguno qhüiniju tsü penishi ani keno azah tsülo, tishianguno o launo eno o kibo lono achuyiqo hapheve tsüno Nile lo likhi ngove penie.”

¹⁰ Pa no pi, “Thoghiu.” Moses no khochile, “Nono pi ketoi shini, tishikeu lono o pelo Ampeu ni Lhou toikeu ye khumu kühae pi ithi penie.

¹¹ Achuyiqo ye o launo, o kibo, eno o qemi ngo ow timiqo launo wuve nani. Tipaqo ye Nile lo likhi ngove nani.”

¹² Ikehu Moses ngo Aaron no Pharaoh launo ipeve, eno Moses no Pharaoh sasü pulo küqhave ketoi, pa no achuyi ghenguno Ampeu lau ighamkue.

¹³ Eno Ampeu no Moses tsa kiqi lono shivetsü. Achuyiqo ye aki lono, akikhala, eno aluza lono thikhave.

¹⁴ Panongu no tipaqo hekütsüpe amoqhe, eno ayeghi no muthu münashuive.

¹⁵ Ikemu kughou Pharaoh no akulhokiqhi ithulu keno, pa ye amlo kuthovive eno Ampeu no pi ketoi panoqo tsa initsü move.

Püsa Aküthüu: Amthu

¹⁶ Tithiu Ampeu no Moses vilo pi, “Aaron vilo pilo, ‘O küsü süqhelo eno ayeghimkhu lo hesülo, tishianguno tino Egypt yeghi kümtsü lo amthu ilhouve peni.’”

¹⁷ Pama no titoi shi. Aaron no pa küsü pesü au xachho eno ayeghimkhu lo hesü, ikelo amthu no timi eno tüghashi shou ikughive. Egypt yeghi kümtsü lo ayeghimkhu kümtsü amthu ilhou khave.

¹⁸ Küdüumi no panow tuqhou mqü vecheo amthu kughulho niye pükapütsa kemu tishi mlave. Ikehu amthu no timi eno tüghashiqo shou ikughive.

¹⁹ Tithiu küdüumi no Pharaoh vilo pi, “Hipau ye Alhou u kena.” Ikemu Pharaoh mlo ye kuthovive, eno Ampeu no pi ketoi, pa no panoqo tsa initsü move.

Püsa Abidiu: Amiyi

²⁰ Tithiu Ampeu no Moses vilo pi, “Inaqhe itheno ithu Pharaoh no azü luniye wuche kelono pa zülo puthugho lo, eno pa vilo pilo, ‘Ampeu no ishi piani, “Iw timiqo puwuvelo, tishianguno panongu pelo I mllalu pelo.

²¹ Tsala nono Iw timiqo puwumo aye, julo, I no amiyi loji o shou, o qemi eno ow timiqo ngo o kibo shou puwu nani. Eno Egyptmi kibo ngo panongu no puthugho akeu yeghi shou amiyi loji no chhitoive nani.

²² Ikemu tipa tsalani, I no Goshen yeghi, khile Iw timi küghüna ani keno, tipa-a ye pakütashi qhive nani, tishianguno amiyi loji ye tilau ighimo nani, ti ye nongu pelo ayeghi kümtsü shou Ampeu ye Ni kepi ithi peniye ke.

²³ Ikehu I no Iw timi ngo ow timi dolo kijethave nani. Thoghiu amchipu hipau shi nani.”’”

²⁴ Eno Ampeu no titoi shie. Pharaoh ngo pa qemi kilo amiyi loji kije ighive. Egypt yeghi kümtsü lo amiyi loji no kütsave tsü.

²⁵ Tithiu Pharaoh no Moses ngo Aaron kuno pi, “Wulo, aghakhu dolono no Lhou lau aghakishi shilulo.”

²⁶ Ikemu Moses no pi, “Titoi shini keu ye achipikumo nanie, kughengu ningu no aghakishi Ampeu ni Lhou tsüniye akeu ye Egyptmi zülo aphikümqhüpu ke. Tsala nino Egyptmi nhethe lono aphikümqhüpu kümllagho pesü aghashi aye, panongu ye atu pesü ningu veqhi moni keshea?

²⁷ Ningu ye yenguyike-a lo atsala küthü ghüzüla lo wuno Ampeu ni Lhou no pi ketoi Pa lau aghakishi shimasa nani.”

²⁸ Ikehu Pharaoh no pi, “Tsala nongu no kushuo lo wumo kepu shi aye, I no nongu pelo yenguyike-a lo wuno Ampeu no Lhou lau aghashilu peni. I ghenguno inikhu tsülo.”

²⁹ Tile Moses no pi, “Julo, ni ye o launo wuve cheae eno I no Ampeu lau inikhuni, tishino thoghiu amiyi loji ye Pharaoh, pa qemi eno paw timiqo launo wuve peni. Ikemu Pharaoh pelo itaghi pishiqhive no timiqo pelo Ampeu lau aghakishi shiwu pemove keu shipe kevilo.”

³⁰ Ikehu Moses no Pharaoh launo ipeve no Ampeu lau inikhu.

³¹ Pa no khu ketoi Ampeu no tishitsü, eno Pharaoh, pa qemi, eno paw timi launo no amiyi loji puwuve tsüno lakhimu kühave.

³² Ikemu Pharaoh ye ishiu ghi pa mlo kuthovive, eno timiqo pelo wupe move.