IPEKULU 6 - Sumi Naga CL (Re-edited) Bible (BSI)

Alhou no Xaphe nike Piqhi

¹ Ikemu Ampeu no Moses vilo pi, “Itehi I no Pharaoh lau kiu shiniye ani keno nono ithulu nani; kughengu au kumto vecheo pa no panoqo puwuve nani, eno au kumto vecheo pa yeghi lono panoqo hapheve nani.”

² Alhou no Moses pütsa no pi, “Ni ye Ampeu ke.

³ Ni ye Akughushu Lhou shi Abraham, Isaac, eno Jacob lau ipeghi, ikemu I je, Ampeu, pesü Ni ye panongu lau kilethi moe.

⁴ Canaan yeghi khipau lo panongu no kachenami shi ache keno tipau panoqo tsünie pi I no panongu sasü ghi Iw puloshoqhi shike.

⁵ Tinguno alau, I no Iw timi Israelmi, khunoqo Egyptmi no aqüaxe shi tsüghape ani keno, panoqo mloghuju chiluvae, eno I no Iw puloshoqhi kümsüchile luvae.

⁶ Tighenguno Israelmi vilo pilo, ‘Ni ye Ampeu, eno I no Egyptmi makho kimshi lono nongu saipeghive nani, eno I no panoqo qüaxe lono nongu xaphe luve nani, I no I u kumto ngo küghakütha kümla kije vecheo nongu qhüchile luve nani.

⁷ Iw timi shinike I no nongu ikhiluve nani, eno I no nongu Lhou shive nani, eno nongu no Ni ye Ampeu nongu Lhou, Egyptmi makho kimshi lono nongu saipeghi keu kepi Ni ithi nani.

⁸ I no Abraham, Isaac, eno Jacob noqo lau tsünie pi tushoqhi püakeu yeghi lo nongu saghi nani. I no tipau amheghi shi nongu tsü nani. Ni ye Ampeu ke.’”

⁹ Ikehu Moses no Israelmi pütsa, ikemu panongu no Moses tsa ini tsümoe, ti ye pano ghungu ghüthiküsü eno ayikushu qüaxe lo ake ghenguno ke.

¹⁰ Tighenguno Ampeu no Moses vilo pi,

¹¹ “Ilo lo, Egypt kükau Pharaoh vilo Israelmi pelo pa yeghi lono ipeve penike pilo.”

¹² Ikemu Moses no Ampeu vilo pi, “Julo, ni ye atsa düdüshi piche kemi, eno Israelmi thotsü I tsa initsü moke kishino Pharaoh no ini tsüni kea?”

¹³ Ikemu Ampeu no Israelmi ngo Egypt kükau Pharaoh ghenguno Moses ngo Aaron pama azah tsü: ti ye Egypt yeghi lono Israelmi saipeghi peniye ke.

Moses ngo Aaron Laghaphi

¹⁴ Hipaqo no pütüta lilo akütsü: Israel nu anoghiu Reuben nuli: Hanoch, Pallu, Hezron, eno Carmi; hipaqo no Reuben laghami ke.

¹⁵ Simeon nuli: Jemuel, Jamin, Ohad, Jachin, Zohar, eno Shaul, pa ye Canaanmi totimi nu lakhi ke; hipaqo no Simeon laghami ke.

¹⁶ Hipaqo no Levi nuli, pano tiqheli kiqi lono: Gershon, Kohath, eno Merari, Levi küxü mpe ye 137.

¹⁷ Gershon nuli: Libni eno Shimei, panoqo lagha kiqi lono.

¹⁸ Kohath nuli: Amram, Izhar, Hebron, eno Uzziel, Kohath küxü mpe ye 133.

¹⁹ Merari nuli: Mahli eno Mushi. Hipaqo no Levi laghami ke, pano tiqheli kiqi lonoe.

²⁰ Amram no pa nipu Jochebed, papu chepu luve, eno li no pa lau Aaron ngo Moses punutsü, Amram küxü mpe ye 137.

²¹ Izhar nuli: Korah, Nepheg, eno Zikhri.

²² Uzziel nuli: Mishael, Elzaphan, eno Sithri.

²³ Aaron no Elisheba, Amminadab nga eno Nahshon chepu pa nipu shinike luve, eno li no pa lau Nadab, Abihu, Eleazar, eno Ithamar punutsü.

²⁴ Korah nuli: Assir, Elkanah, eno Abiasaph; hipaqo no Korah laghami ke.

²⁵ Aaron nu Eleazar no Putiel ngaqo dolo lakhi pa nipu shinike luve, eno li no pa lau Phinehas punutsü. Hipaqo no Levi lagha dolo ali lo akütsü ke.

²⁶ Aaron ngo Moses pama vilo Ampeu no pi: “Israelmi amqo kiqi lono Egypt yeghi lono saipeghi lo.”

²⁷ Egypt yeghi lono Israelmi saipeghi nike Egypt kükau Pharaoh pütsa keu ye Moses eno Aaron hipama ke.

²⁸ Egypt yeghi lo Ampeu no Moses pütsake tsalani,

²⁹ Ampeu no Moses vilo pi, “Ni ye Ampeu ke; Egypt kükau Pharaoh vilo I no o vilo pi keu kümtsü pilo.”

³⁰ Ikemu Moses no Ampeu vilo pi, “Julo, ni ye atsa düdüshi piche kemie. Pharaoh ye kishino I tsa inini kea?”