IPEKULU 5 - Sumi Naga CL (Re-edited) Bible (BSI)

Aghijini Sümono Pititu Mla

¹ Ado hami thiu Moses ngo Aaron pama no wuno Pharaoh vilo pi, “Ampeu, Israel Lhou no ishi piani, ‘Iw timiqo puwuvelo, tishianguno panongu pelo yenguyike-a lono I lau tiqhetini shi penie.’”

² Ikemu Pharaoh no pi, “Ampeu ye khuue pi ni ye Pa tsa luno Israelmi puwuni kea? Ni ye Ampeu mthae, eno tinguno alau, ni ye Israelmi puwumo nani.”

³ Tileno pama no pi, “Hebrewmi Lhou no nikujo sasü kusholue. Kimiyeno ni pelo yenguyike-a lo atsala küthü ghüzüla lo wulu pelo, tishianguno nino Ampeu ni Lhou lau aghakishi shini, tikumo aye Pa no ni shou püsa momu azütakikihi pukutsü nosake.”

⁴ Ikemu Egypt kükau no pama vilo pi, “Moses eno Aaron, kushiye nokujo ye timiqo sasü pano kümla lono wuvenie piani kea? Nongu kümla makho lou idewolo.”

⁵ Eno Pharaoh no pi, “Julo, aghakhu lo timiqo ye kutomo shivae, eno nongu no panoqo kümla makho lono akulho qhive ani peke!”

⁶ Tipani Pharaoh no aqemi hekiqhimi ngo kughukütsümi azah tsü,

⁷ “Püzüu toi nongu ye pititu mlani ke timi hipaqo aghijini tsümoae; panongu kutoshi no aghijini hekütsü pelo.

⁸ Ikemu püzüu pititu khije panongu no mla cheni keno tijehi mla pelo, nongu ye kiu gholau nomu panoqo launo kümghü kevilo. Panongu ye akipichi ke ghenguno ishi ighamku anie, ‘Ni pelo wuno ni Lhou lau aghakishi tsülu pelo.’

⁹ Timi hipaqo shou akümla akimshiu betsü lo tishianguno panongu no akimki tsa ini mono mla ananie.”

¹⁰ Ikehu hekükütsümi eno timiqo shou kughukütsümi no wuno timiqo vilo pi, “Pharaoh no ishi piani, ‘Ni ye aghijini nongu tsümo nani.

¹¹ Wuno nongu kutoshi no aghijini khile no ithuluni keno phulu lo, ikemu nongu kümla ye khilemu kümghümo nani.’”

¹² Ikehu timiqo no Egypt yeghi kümtsü lo aghijini hekütsüni ye apanagha wukhave.

¹³ Hekükütsümi no tsüikhomo pi, “Püzüu aghijini ache kelo toi, tsalakipe kümla, nongu kümla mla khavelo.”

¹⁴ Pharaohw hekükütsümi no pano no süsü püakeqo Israelmi kughukütsümi heqhi no ighiju, “Kushiye nongu ye azüu toi ighina ngo ishi pititu mlamove ani kea?”

¹⁵ Tile Israelmi kughukütsümi no ighi no Pharaoh lau ighamku, “Kushiye no ye o qemi hitoi peitha ani kea?

¹⁶ Aghijini o qemi tsümovae, ikeghi panongu no pi, ‘Pititu mlalo!’ Eno julo, o qemiqo ghaqhi ani; ikemu akipimi ye ow timiqou noke.”

¹⁷ Ikemu pa no pi, “Nongu ye akipichi, nongu ye akipichi ke; tighenguno nongu no pi, ‘Ni pelo wuno Ampeu lau aghakishi tsülu pelo.’

¹⁸ Itehi wuno mlalo. Aghijini nongu tsümo nani, ikemu pititu kikihi ye aqhemi tsümasa nani.”

¹⁹ Kughou kughukütsümi no, “Nongu ye kiu gholau nomu tsalakipe kümlapu saje pititu kikihi kümghümo nani,” ipikeu chilu keno, panongu ye aküpüna shivae pi ithive.

²⁰ Panongu no Pharaoh launo ipeghi kelo Moses ngo Aaron no ngokhe aghi no panongu kusholue;

²¹ eno panongu no pama vilo pi, “Ampeu no nokujo ithulu no küghatha peniu, kughengu nokujo no ningu pesü Pharaoh ngo pa qemi zülo kumthu kümna shive tsüae, eno ni ghiqhive peniye azütakikihi panoqo u lo süve tsüae.”

²² Tileno Moses no Ampeu lau wuno pi, “O Ampeu, No ye kushiye timi hipaqo lau küsakügha shive akea? Kushiye No ye I puwu kea?

²³ Kughengu I no O jelono Pharaoh pütsani ye ighike pa ye timi hipaqo lau küsakügha shi aphie, eno No ye Ow timiqo xaphe mphie.”