IPEKULU 39 - Sumi Naga CL (Re-edited) Bible (BSI)

Achinemi Phimini Mla

¹ Ayeho atsüla, hughai eno huchuyi keqo pesü panongu no Akimthe-a lo achinepu kümla ghenguno akivishi aphimini gho. Ampeu no Moses azah tsüke toi panongu no Aaron ghenguno akimthe phimini mla.

² Pa no ameshoyi ngo atsüla, hughai eno huchuyi keu yeho ngo phepheike phi kipili pesü ephod mla.

³ Panongu no ameshoyi hephape apa shi eno ala-ala shi ghitha pesü atsüla, hughai eno huchuyi keu yeho ngo phepheike phi kipili gholo no ghosü küqha.

⁴ Panongu no ephod phi abighi lo xipu kepu mlano tipau pesü ashe küdau tsüghu kimepe qhive.

⁵ Eno Ampeu no Moses azah tsükeu kiqi lono ameshoyi, atsüla, eno hughai keu yeho ngo phepheike phi kipili pesü aleqhi lakhi shi apokha kütshakügha shi ghoe.

⁶ Panongu no onyx tu pesü ameshoyi yila lo mekhasü, eno Israel nuliqo je kiqi lono jedapu nguthi lo aje yepuku.

⁷ Eno pa no tipaqo pesü panongu bighi lo xipu keu ephod lo Israel nuliqo kümsümamo keu shi pepipe, ti ye Ampeu no Moses azah tsü keu kiqi lono ke.

⁸ Pa no kütshakügha shi amlaküxa ephod kimihi lono mla, ti ye ameshoyi, atsüla, hughai eno huchuyi keu yeho ngo phepheike phi kipili pesü mlae.

⁹ Tipau ye kodibo shike. Panongu no amla küküzü küqhüchhe kini shie, akushulau eno akijelau aulotikipshe toku.

¹⁰ Eno panongu no atu ajo bidi shino tipau lo medave. Sardius, topaz eno carbuncle tuqo no ajo atüghüu shi;

¹¹ emerald, sapphire ngo akimiyetu no ajo akiniu shi;

¹² jacinth, agate eno amethyst tuqo no ajo aküthüu shi;

¹³ beryl, onyx eno jasper tuqo no ajo abidiu shi. Tipaqo ye ameshoyi no aboqha shikeu lo ikhisüe.

¹⁴ Atu chighikini gholo Israel nuliqo je yepuku püae. Tipaqo ye jedapu nguthiqo toi atu lakhikhi lo ashiaye chighikini je yepuku.

¹⁵ Eno panongu no amlaküxa lo akighi kipiliqo toi ameshoyi kimthe pesü ayila mlae.

¹⁶ Eno panongu no ameshoyi pesü tsügha kepu kini eno abocho kini mlano ameshoyi no shikeu bocho kini pesü amlaküxa ako kini akeu lo fukimeve.

¹⁷ Eno panongu no ameshoyi yila kini pesü amlaküxa lo ako kini akeu bocho lo pilisüe.

¹⁸ Panongu no ashe kütau kini akeu pesü ameshoyi mekha kepu akeu lo fukimeve. Tishino panongu no tipau pesü abighi lo ephod xipu keu azüu meda puku.

¹⁹ Tithiu panongu no ameshoyi no abocho kini mla eno tiküma pesü amlaküxa ako kini akeu lo tsüghave, ti ye ephod phivilo ashe akeu alouke.

²⁰ Panongu no ameshoyi pesü abocho kini mla eno tipa pesü abighi lo xipu kepu ephod phimini kütshakügha shi ghokeu agizüu aqhou tsüghu phivilo meda puku.

²¹ Ampeu no Moses vilo azah tsüke toi panongu no amlaküxa lo abocho akeu ngo ephod lo abocho akeu küma atsüla yeho pesü tsüghuda, eno amlaküxa lo dapu keu huye ijo ipeghimo kepushi apokha shou dipe qhive.

²² Pa no atsüla yeho pesü ephod ghenguno chijeboike phi akupuju ghoe,

²³ eno chijeboike phi tipau lo aphimini lakhi lo xükholu kepu akeu toi mla, xükholu kepu tipau vehomxa ghi tsüghuve, tishikeu lono ixü ipeghive pemoni ye ke.

²⁴ Aphi tipau ashe lo ayeho atsüla, hughai eno huchuyi keu ngo phepheike phi kipili pesü khaghatuqo mla.

²⁵ Panongu no ameshoyi kimthe pesü amqübo mla, eno chijeboike phishe vehomxa ghi khaghatu mta lo amqübo mlasüe.

²⁶ Ampeu no Moses azah tsüke toi, achine kümla ghenguno chijeboike phishe lo amqü lakhi eno tipa shelo khaghatu lakhi, tishi ajo-ajo shi ashe vehomxa süe.

²⁷ Panongu no Aaron ngo pa nuli ghenguno phepheike phi pesü aphiküzü gho,

²⁸ phepheike phi akivi pesü akütsü küzü kepu ngo akütsükuqho, eno alou phimini mla,

²⁹ eno Ampeu no Moses azah tsüke toi atsüla, hughai eno huchuyi keu yeho ngo phepheike phi kipili akivi pesü apokha mla.

³⁰ Panongu no ameshoyi kimthe pesü akimthe kütsükuqho lo akhu mla, eno tipau shou jedapu nguthi lo toi, “Ampeu lau akimthe shilo,” ipi yepuku.

³¹ Eno Ampeu no Moses azah tsüke toi, panongu no tipau pesü akütsü küküzüpu shou atsüla yeho no tsüghave.

³² Ikehu kuposhukulu phiki ye kümtsü kishekhave eno Ampeu no Moses azah tsükeu kiqi lono Israelmi no kümtsü shie.

³³ Tishino panongu no Moses lau aphiki peighi, tipau gholo aphiki ngo tile peitha chekeqo, akufuyi, akipesü, atsükucho eno ghope qhikepu;

³⁴ ambetsü yiko, ane yiko, eno nhaqhiphi küküzüpu;

³⁵ Puloshoqhi bohu lo ashepe tu gholo akipesü ngo akünha;

³⁶ akibepu eno tipau lo peitha kepu thimeqo, akimthe sho;

³⁷ ameshoyi kimthe kulu kibepu, akulu ngo tile peitha kepu nhemgha eno akulu ghenguno thazü;

³⁸ ameshoyi kiptia, nukikishe thazü, axokütsüngü ta, eno aphiki kulaghi lo nhaqhiphi;

³⁹ alazayi kiptia, eno tipau lo kiyithasü chekeu, akipesü, eno tile peitha chekeqo; chithakhu eno tipau kibepu;

⁴⁰ bokütha lo nhaqhiphi, tipau tsükuchoqo, ghope qhikepu, eno bokütha khagho lo nhaqhiphi, tipau kighi ngo ayishuqo; eno kuposhukulu phiki, akimthe phiki lo achine kümla ghenguno peitha chekeqo;

⁴¹ Akimthe-a lo achine kümla ghenguno akivishi ghokeu phimini, Aaron achineu ghenguno akimthe phimini eno pa nuli ghenguno aphimini.

⁴² Ampeu no Moses azah tsükeu kiqi lono Israelmi no akümla kümtsü shie.

⁴³ Moses no akümla kümtsü ithulu, eno julo, panongu no Ampeu no azah tsüke toi tipaqo mlae. Tithiu Moses no panoqo kümghatsü.