IPEKULU 36 - Sumi Naga CL (Re-edited) Bible (BSI)

¹ “Bezalel ngo Oholiab eno atshamgha shikithimi ye Ampeu zakütsü kiqi lono Ampeu phiki kimthe kümla lo kiu kiumu mlaithalu penike akümla shikithi ngo alokütsü tsüvae.”

² Bezalel ngo Oholiab eno atshamgha shikithimi khunoqo mlo lo Ampeu no akümla shikithi süvetsü, eno amlo lo alokümsü akeu ghenguno akümla shiniye iqhoghi keno, Moses no panoqo ku.

³ Eno akimthe-a mla nike ghenguno Israelmi no qhasütsü keqo kümtsü panongu no Moses launo luve. Panongu no itaghi pulokini kümllagho inaqhe atsütsü süghi auve,

⁴ ikehu akümla shikithimi khunoqo no akimtheki lo akümla jeli shi akeno, panongu kümtsü ighi, milakhikhi no pütüta no mla akeu pasü lono ighi,

⁵ eno Moses vilo pi, “Ampeu no ningu azah tsükeu kümla lo avehupu shi akeu nguno alau timiqo no peighi anie.”

⁶ Ikehu Moses no azah tsüve no aghazü kümtsü lo asheshu, “Kiptimi mu totimi mu akimtheki ghenguno küqhasü akeu lo kiumu ala ye süghi kevilo.” Ikehu timiqo pelo peighi pemoni ke lakükha shive,

⁷ kughengu tinhemgha panongu no akeqo ye akümla kümtsü shiqhilu kepu ae, eno ala ghi ake.

⁸ Akümla kishimi dolo shitsami no Ampeu kungo phiki eno tipau gholono nhaqhiphi chighi mla. Tipaqo ye phepheike phi, atsüla, hughai eno huchuyi keu yeho pesü aye kivishi cherubim mlae.

⁹ Akushulau nhaqhiphi lakhikhi lo auxakuchho chighikini eno akijelau nhaqhiphi lakhikhi ye auxakuchho kini. Nhaqhiphi kümtsü akije akushulau aqhemie.

¹⁰ Pa no nhaqhiphi pungu pesü lakhino lakhi lo tsüghuda, eno kütau pungu akeu ghi pesü lakhino lakhi lo tsüghuda.

¹¹ Pa no atüghüu jolha lo atsülaphi pesü ashe lo pufukepu bocho mla. Tihutoi ajolha akiniu lo ghi ashe lo tipaqo mlae.

¹² Amqo atüghüu lo pufukepu lhopungu süwo tipau ajoshi mighiju püzü aqhemishi lakhiu lo ghi lhopungu tsüghu dawo. Pufukepu bochoqo ye lakhino lakhi ghüngüu qhie.

¹³ Eno pa no ameshoyi pesü pufukepu lhopungu mlano nhaqhiphi lakhino lakhi lo kime küqha. Ikehu Ampeu kungo phiki ye akupuju lakhi shive.

¹⁴ Pa no Ampeu kungo phiki khonha kepu ane mhi pesü nhaqhiphi mla. Pa no nhaqhiphi chighiqhaqhi mlae.

¹⁵ Nhaqhiphi lakhi lo akushulau auxakuchho chighiküthü eno akijelau auxakuchho kini ishi. Nhaqhiphi chighiqhaqhi ye akije-akushulau kümtsü aqhemi.

¹⁶ Pa no nhaqhiphi ala pungu pesü amqo lakhi shi tsüghu kime eno lakhiu mqo lo ala tsügho tsüghu kime.

¹⁷ Eno pa no nhaqhiphi ala ashekhau lo pufukepu lhopungu mla eno lakhiu mqo lo ghi lhopungu süe.

¹⁸ Pa no alazayi pesü pufukepu lhopungu mlano ala kini küqhano nhaqhiphi akupuju lakhishi mla.

¹⁹ Eno pa no ambe yiko ngo ane yiko pesü Ampeu kungo phiki küzüpe qhikepu lakhi mla.

²⁰ Tishino pa no acacia sü pesü Ampeu kungo phiki choqhe kepu axu mla.

²¹ Axu huye akushulau auxakuchho bidi eno akijelau aunhekipshe kini.

²² Chokime küqhani ke ghenguno axu lakhikhi lo akighipe lo sükulupu kini mlae. Ampeu kungo phiki lo axu kümtsü lo pa no hipau mlae.

²³ Axuqo ghenguno pa no ishi mla: apeu küdau ghenguno axu muku.

²⁴ Pa no akhadu muku qholo ghükayi no shikeu boqha lhobidi mla, axu lakhi qholo akighipe lo sükulupu kini, eno tipa shelo axu lakhi qholo tipau sü kighipe lo sülu kepu kini ishi mlae.

²⁵ Ampeu kungo phiki ahuu küdau ghenguno pa no khagho muku mla,

²⁶ eno khagho lakhikhi qholo choqhe kepu ghenguno ghükayi pesü ghokepu-a lhobidi mla.

²⁷ Azübo küdau kulolau ghenguno chokiqhepu tsügho mla.

²⁸ Pa no athiu acheku ghenguno chokiqhepu kini mla.

²⁹ Tipaqo aqhou ye kütüta shi kemu akütsüqa loye abocho atüghüu lo kime küqhape qhive. Pa no hipa ghola lono acheku kini ghengu ghi mlae.

³⁰ Kümtsü küqha kelo chokiqhepu tache, ghokepu ghükayi no mlakeu chighitsügho, eno chokiqhepu lakhikhi qholo ghokepu kinini ae.

³¹ Pa no acacia sü pesü akhadu chighipungu mla, pungu no ako lakhi küdau chokiqhe ghenguno,

³² eno pungu no ako lakhiu chokiqhepu ghenguno, eno kütau pungu no azübo küdau chokiqhepu ghenguno ishi.

³³ Pa no amta lo hepta kepu khadu ashekichi lakhi lono ashe kichi lakhiu kutolo chokilepe qhi.

³⁴ Eno ameshoyi pesü chokiqhepuqo küzüve, eno akhaduqo chokime nike ghenguno abocho lo pufu kepu mla, eno ameshoyi pesü akhaduqo küzüve.

³⁵ Pa no ayeho atsüla, hughai eno huchuyi keu ngo phepheike phi kipili pesü nhaqhiphi mla; tipau lo cherubim koghe akivishi mlasüe.

³⁶ Tipau ghenguno acacia sü pesü atsükucho bidi mla eno ameshoyi pesü tipaqo küzüve. Tipaqo kufuyi ye ameshoyi no mla, eno tipaqo ghokepu bidi ghükayi no mlae.

³⁷ Pa no akulaghi lo ghi ayeho atsüla, hughai eno huchuyi keu ngo phepheike phi kipili pesü akoghe ye shisü no nhaqhiphi mla,

³⁸ nhaqhiphi hipau ghenguno atsükucho pungu gholo akufuyi mla, tipau kütsüqa ngo püta kepu sü kümtsü ameshoyi no küzüve no atsükuchoqo ghenguno alazayi pesü ghokepu-a pungu shipe qhie.