IPEKULU 35 - Sumi Naga CL (Re-edited) Bible (BSI)

Sabbath Pimheye

¹ Moses no Israelmi qoaho kümtsü kukütsü no panoqo vilo pi, “Ampeu no nongu pelo shi penike azah tsü akeu ye hipaqo ke.

² Akümla ye atsala tsügho dolono mlani, ikemu atsala akütsüniu lo nongu ye iqüghai akulhoqhi keu Sabbath, Ampeu lau akimthe shini. Khukhumu tipau tsala lo kiukiu kümla mu shi aye pithiveni.

³ Nongu ye Sabbath tsalani nongu kilo ami shimoni.”

Ampeu Phiki ghenguno Akümllagho

⁴ Moses no Israelmi qoaho kümtsü vilo pi, “Hi ye Ampeu no azah tsükeu ke.

⁵ Nongu dolono Ampeu lau akümllagho qhaphelo. Khukhumu tsükini mlo xapu aghi keu no Ampeu lau peighilo: ti ye ameshoyi, ghükayi, eno alazayi;

⁶ atsüla, hughai eno akuhu yeho eno phepheike phi kipili; ane mhi,

⁷ ambe yiko, ane yiko; acacia sü,

⁸ akulu sala thazü, nukikishe thazü eno tsüngqüikeu ta ghenguno axokütsüngü,

⁹ eno ephod ngo amlaküxa ghenguno onyx tu ngo akughupu tuqo.

¹⁰ “Nongu dolo atshamgha shikithimi kümtsü ighi no Ampeu no azah tsükeu mlalo:

¹¹ Ampeu phiki, tipau nhakiqhi, akufuyi, axugha, akipesü, atsükucho, aboqhasü;

¹² puloshoqhi bohu gholo akipesüqo, akünha, tipau nhaqhiphi,

¹³ akibepu, tipau kipesü ngo akhu-ajukhu jeliqo eno Alhou mllakeu sho;

¹⁴ aküvü ghenguno akulu kibepu eno tile peitha keu jeli, akulu eno tipa ghenguno thazü,

¹⁵ tsüngqüikeu xo kiptia, tipau kipesü, nukikishe thazü, axokütsüngü ta, ahukikha nhaqhiphi, Ampeu phiki hukikha;

¹⁶ akipti kümllagho khache eno tipau lo alazayi khoje, akipesü, akhu-ajukhu jeli, chithakhu eno tipau ghokepu;

¹⁷ akikhala lo nhaqhiphi, tipau tsükucho ngo aboqhaqo, eno akikhala khagho lo nhaqhiphi;

¹⁸ Ampeu phiki lo pufu kepu akuhoyi eno tipa kighiqo;

¹⁹ achinemi shi Akimthe-a lo mla akelo aphimini kivi pepu kepu, ti achineu Aaron sala akimthe phimini eno pa nuli ghenguno aphiminiqo.”

²⁰ Tithiu Israelmi qoaho kümtsü no Moses zülono wuve.

²¹ Eno kümtsü no pütüta mlo no hakutho keu kiqi lono kuposhukulu phiki lo kümlapu ghenguno eno akimthe phimini ghenguno peitha penike Ampeu lau agho peighi.

²² Ikehu kiptimi ghi totimi ghi ighie. Khunoqo no pulopinyi keu mlo xapu akeno panongu kümtsü no jidapu chekeu, akinikighi, jedapu nguthi, eno aumlo kükha, ameshoyi nhemgha qhoi pesü akümllagho shi Ampeu lau ikhiphe tsüve.

²³ Eno khunoqo no ayeho atsüla, hughai, eno huchuyi momu phepheike phi akivi, ane mhi, ambe yiko, ane yiko, aghi keno tipaqo pesü ighi.

²⁴ Khunoqo no ghükayi momu alazayi tsülu keno tipaqo pesü Ampeu tsüe. Eno khunoqo no acacia sü kiukiu lomu peitha lukepu aghi keno tipaqo pesü ighie.

²⁵ Totimi atshamgha shikithimi no pano u lono aphi gho eno kümtsü no ayeho atsüla, hughai, huchuyi eno phepheike phi kipili no aphi kiu gholu keno tipaqo peighi.

²⁶ Totimi khunoqo amlo no hakutholu keno kümtsü no pano tshamgha kümla kighithi peitha no ane mhi pesü aphi ghoe.

²⁷ Sakiphemi no ephod ngo amla küxa ghenguno onyx tu eno akughupu tuqo peighi,

²⁸ eno axokütsüngü ngo akulu ghenguno thazü, nukikishe thazü eno axokütsüngü kipti ishi peighie.

²⁹ Israelmi kiptimi totimi khunoqo Ampeu no Moses vilo shilopi azah tsükeu kümla ghenguno tsünishi kümsülu keno panongu no pulokini kümllagho shi pesü Ampeu lau ighie.

Ampeu Kungo Phiki Kümla

³⁰ Tishino Moses no Israelmi vilo pi, “Julo, Ampeu no Judah shiaye lo Hur nu, Uri nu Bezalel akivishi ithi anie;

³¹ eno Alhou Ghungu pesü pa shepichhi tsü, tipau gholo kütshakügha, alokütsü, akighithi, eno atshamgha mlakithi kümtsü pesü pa tsüe,

³² tishino kogheküghü kughuphe, ameshoyi, ghükayi eno alazayi kümla shi,

³³ atu chhutha, asü lo aye shisü eno atshamgha jeli shi peniye ke.

³⁴ Ampeu no pa eno Dan shiayemi Ahisamach nu Oholiab pama lau kütami shikalu peni keu tsüvae.

³⁵ Pa no ayi yetha kemi, aye shipuku kemi, eno ayeho atsüla, hughai, huchuyi, eno phepheike phi kipili pesü aphi lo aye shisü chekemi no shilu chekeu kighithi pesü pama shepichhivae.”