IPEKULU 34 - Sumi Naga CL (Re-edited) Bible (BSI)

Moses no Atulupha Kithe Mla

¹ Ampeu no Moses vilo pi, “Azüu toi keu atulupha kini no ampi no chhutha lo, eno azüu atulupha khikhi nono kubove keno tile yepüakeu tsa I no yepuku tsüni.

² Thanau ti kutope Sinai Naghuto lo ikughilo, eno naghuto kütsüqa lono I sholu kepu shilo.

³ Khumu o gholo ikughi moni, eno naghuto qhalo timi khumu ithulupe kevilo. Naghuto ghüngü lomu ambe momu atsüaqu loji achu kümza kevilo.”

⁴ Ikehu Moses no atulupha kini azüu toi chhutha. Eno Ampeu no azah tsü ketoi pa no inaqhe itheno ithu atulupha kini pa u lono pesü Sinai Naghuto lo ikuve.

⁵ Ampeu no khüngküsü lono iqighi no pa gholo puthugho, eno Ampeu je sheshue.

⁶ Ampeu no pa heche wuno asheshu, “Ampeu, Ampeu, kimiyekini eno küpüqhiyi keu Lhou, amlo ideni keu lo asheshi, iqemokeu kikimiye eno pükhübekulu no kupukuno,

⁷ tiqheli qhethonhe kutolo iqemokeu kikimiye püacheni, eno hekibide, alughi vecheve keu, axine shive keu kipimi qhivetsü cheni, ikemu kiu gholau nomu küqüve keu palokutove mono tiqheli aküthüu ngo abidiu kutolo apunoqo hekibide ghenguno atianuli tianuli xuju ighi nani.”

⁸ Moses no mtazü ayeghi lo pa kütsü pishiqho luve no Ampeu mlla.

⁹ Pa no pi, “Itehi O nhethe lo I kimiyeqhiyi ithulu aghi aye, O Ampeu, kimiyeno Ampeu no ningu gholo wu tsülo, kughengu hipaqo ye kuthovi kemie, ningu hekibide eno axine qhitsülo, eno O mheghi shi ningu ikhilu tsülo.”

Puloshoqhi Püxükithe

¹⁰ Ampeu no pi, “Julo, I no puloshoqhi lakhi shi ani. Ayeghiqha kümtsü lo momu khuno shiye laumu shimo keu I no akümzapu ow timi kümtsü zülo shinie. Eno timi kümtsü no Ampeu kümla ithulu nani, kughengu I no akümzapu thime nongu gholo mla nani.

¹¹ “I no ishi azah nongu tsükeu pape lulo. Julo, I no nongu zülono Amorimi, Canaanmi, Hittimi, Perizimi, Hivimi eno Jebusimi hapheve nani.

¹² Jukuto lo, tikumo aye nongu no khilehi wuniye shi ani keno tipau yeghi lo küxümi sasü puloshoqhi shilu nosake, tishive aye tipau no nongu dolo kitime kepu lichhe shive nani.

¹³ Pano kümlla khache tulave tsü, atsükuchoqo kubove tsü eno Asherah julho loqhive tsülo

¹⁴ (kughengu nongu ye alhou kütau mllamo nani, kughengu Ampeu, khuu je Anhekushu keno, Pa ye anhekushu Lhou ke),

¹⁵ nongu no tishimo aye ayeghi tipau lo küghüna akeqo sasü puloshoqhi shive nosa, eno kughou panongu no pano lhou sasü kütüqha, eno pano lhouqo lau aghashi no nongu kusüni keno, nongu ye pano ghakishi lo chuve nosa,

¹⁶ nongu no pano ngaqo pesü nongu nuli nipu shi lutsü, eno anga tipaqo no pano lhouqo sasü kütüqha no nongu nuli pesü itaghi tipaphi shiuvepe nosae.

¹⁷ “Nongu ye ayi pesü kiukiu lhou mu mla moni.

¹⁸ “Nongu ye Kholaqhi sümokeu Sho Ghulhu pinilo. I no azah nongu tsüve ketoi nongu ye kihitha püakeu tüqhüdo Abib qhilo atsala tsüni kholaqhi sümo keu sho chuni, kughengu nongu ye Abib qhi lono Egypt lono ipeghi ke.

¹⁹ Atianuli dolo anoghiu, amishi, ambe eno pichepighi atsü atüghüu ye kümtsü Iw ke.

²⁰ Khurha piti tüghüu ye ambe lakhi pesü qhüchilelu nani, tsala nongu no tipau qhüchile lumo aye, tipau kuo hechheve tsülo. Nongu nu anoghiuqo ye qhüchile luve lo. Eno khukhumu I zülo au kümsa ighimo nani.

²¹ “Atsala tsügho nongu no mlalo, ikemu atsala akütsüniu ye ghisho momu ghile dolo shi aghi namu nongu ye akulho qhini.

²² Nongu ye ashothi amsüu ghile hukelo Ghile Ghulhu pinilo eno ampe shekha lo Apusho lo Ghulhu ikhilu lo.

²³ Nongu kiptimi kümtsü ampe lo ghuthu küthü Ampeu Alhou, Israel Lhou zülo ighilo.

²⁴ Kughengu I no shiyeqo nongu zülono haleve no nongu ghuthu pekhotsü nani; tithiu ye kughou nongu no ampe lo ghuthu küthü Ampeu nongu Lhou zülo ighini keno, khunomu nongu yeghi jumine monani.

²⁵ “Nongu ye I lau aghakishi shikeu ji gholo kiu kiumu kholaqhi sükeu pesü mlla moni, momu Hechekulu Ghulhu ghakishi pesü thanau inaqhe kutolo qhimoni.

²⁶ Ayeghi lo pekighi amsüu akiviu pesü Ampeu nongu Lhou kilo peighi lo. Nongu ye aneti pesü tipau paza kichhizü gholono lhomoni.”

²⁷ Ampeu no Moses vilo pi, “Atsa hipaqo yelo, kughengu hipau kiqi lono I no o sasü eno Israelmi sasü puloshoqhi shivae.”

²⁸ Ikehu Moses ye pucho tsala lhobidi eno putho tsala lhobidi Ampeu gholo ae. Pa ye asho mu chumo azü mu yemoe. Eno pa no atulupha kini lo puloshoqhi tsaqo, Ayezah Chighi yepukue.

Moses Gi Küvü

²⁹ Kughou Moses no Sinai Naghuto lono ashepe tulupha kini pa u lono pesü iqighi keno, pa ye Alhou sasü küptsa ake ghenguno pa gi yiko vüqai akeu ithimoe.

³⁰ Aaron eno Israelmi kümtsü no Moses ithulu, eno julo, pa gi yiko no vüae, eno panongu ye pa kupunu ighini ke msave.

³¹ Ikemu Moses no panoqo ku, eno Aaron ngo aqoaho lo sakiphemi kümtsü no pa lau tsüghü ighi, eno Moses no panoqo pütsae.

³² Ado hami thiu Israelmi kümtsü no kupunu ighi, eno pa no Sinai Naghuto lono Ampeu no pa vilo pikeqo tsa kümtsü pesü panoqo azah tsüe.

³³ Kughou Moses no panoqo pütsa tave keno, pa no agikünha no pa gi nhave.

³⁴ Kugho kughomu Moses no Ampeu pütsa nike Pa zülo ilo kelo pa no ipeghi moke kutolo pa ye agikünha ikhive che. Eno kughou pa no ipe Israelmi vilo azah pa tsükeqo pini keno,

³⁵ Israelmi no pa gi küvü ithulu che. Moses no Alhou sasü küptsa moke kutolo agikünha pesü pa gi nhave che.