IPEKULU 33 - Sumi Naga CL (Re-edited) Bible (BSI)

Sinai Qhive peni keu Za

¹ Ampeu no Moses vilo pi, “No eno timi khunoqo nono Egypt yeghi lono saipeghi keno, hileno chevelo, eno I no Abraham, Isaac, ngo Jacob vilo, ‘O tikughukomi lau I no tsüni,’ ipi püakeu yeghi lo iqhove lo.

² I no kungumi o züu puwuni, eno Canaanmi, Amorimi, Hittimi, Perizimi, Hivimi, ngo Jebusimi hapheveni.

³ Akichhizü ngo akhingozü qowu akeu yeghi lo iqholo; ikemu Ni ye nongu gholo iqhomo nani, tikumo aye alaghi lono I no nongu pühave nosae, kughengu nongu ye kuthovi kemike.”

⁴ Kughou timiqo no atsa kümka hi chilu keno, panongu ye amlo ijuve eno khunomu achi nanu pepu move.

⁵ Kughengu Ampeu no Moses vilo pike, “Israelmi vilo pilo, ‘Nongu ye kuthovi kemie; tsala atüqhüdo lakhimu I no nongu gholo iqho kepushi aye, Ni ye nongu pühave nani. Ikehu itehi achi nanuqo xaqhive lo, tishino I no nongu lau kiu shikepu keno shini.’”

⁶ Tighenguno, Israelmi no Horeb Naghuto nguno hulau ye panow achi nanuqo xaqhive.

Kuposhukulu Phiki

⁷ Moses no aphiki pesü aghazü nguno khalau kushuo lo tshüpe qhiche, eno pa no tipau pesü kuposhukulu phiki kutsü. Ampeu phuni kemi kümtsü no aghazü khalau kuposhukulu phiki lo wuche.

⁸ Kughou Moses no aphiki lo wuni keno, timi kümtsü no puthughove che, eno milakhikhi no pa phiki hukikha lo puthugho che, eno Moses no aphiki alou ilo moke kutolo juche.

⁹ Kughou Moses no aphiki lo iloveni keno, khüngküsü tsükucho no aphiki kulaghi lo iqi ngove che, eno Ampeu no Moses pütsa che.

¹⁰ Kughou timi kümtsü no khüngküsü tsükucho no aphiki kulaghi lo ngokeu ithuluni keno, kümtsü no puthugho luve no pütüta phiki hukikha lono Ampeu mllache.

¹¹ Milakhi no pa küsau pütsa ketoi Ampeu no agi no agi kinheqhe ghi Moses pütsa che. Kughou Moses no aphiki lo iloni keno, pa kukuphuu apumi lakhi, Nun nu Joshua, no itha mono aphiki lo ngo che.

Moses no Qhüiniju

¹² Moses no Ampeu vilo pi, “Julo, Nono I vilo, ‘Timi hipaqo saghilo’ ipi, ikemu No ye khuu I gholo puwuni keno I pelo ithipe mphie. Ikeghi Nono, ‘I no akivishi no ithi ani, eno no ye I mlo kuchuu ke’ ipi.

¹³ Tighenguno itehi, tsala I no O mlo kuchuu shi aghi aye, kimiyeno O laghi I piyelo, tishianguno I no No ithilu eno O nhethe lo ghi kimiyeqhiyi ithulu nani. Shiye hipau ghi Ow timiqo kepi kümsü lulo.”

¹⁴ Ampeu no pi, “I no o gholo wunani, eno akulhokiqhi o tsü nani.”

¹⁵ Eno Moses no Pa vilo pi, “Nono I gholo wumo aye hileno ningu saiqho kevilo.

¹⁶ Kughengu ni eno Ow timiqo ye kishino O mlo chulu anipi ithini kea? Nono ningu gholo wuke ghenguno ni eno Ow timiqo ye ayeghi lo timi kütami launo ni kütake kumo keshea?”

¹⁷ Ampeu no Moses vilo pi, “Nono I vilo pivekeu I no tishini, kughengu no ye I nhethe lo kimiyeqhiyi keu ithuluvae, eno I no akivishi no ithi anie.”

¹⁸ Moses no pi, “Kimiyeno O juküvü I piyelo.”

¹⁹ Eno Pa no pi, “I no Iw akivi kümtsü pesü o zülono wupeni eno o zülono I je ‘Ampeu’ ipi sheshuni. I no khuu küpüqhiyini keno pa küpüqhiyi nani, eno khuu kimiyeqhiyini keno pa kimiyeqhiyi nani.

²⁰ Ikemu no ye I gi ithulumo nani, kughengu timi ye Ni ithulu kelo xümo nani.”

²¹ Ampeu no pi, “Julo, I phivilo a-a lakhi anike nono tile atuqu shou puthughoni,

²² eno I juküvü no hechewu kelo I no atu kighipe lo no ikhipe süveni, eno I no heche wuve moke kutolo I u pesü o küzü luveni.

²³ Tishino I no I u ikhiluve no nono I zübo ithulu nani ikemu I gi ye ithumla nani.”