IPEKULU 32 - Sumi Naga CL (Re-edited) Bible (BSI)

Ameshoyi Mishitsü

¹ Kughou Moses no naghuto lono iqighini keu süpushu auve keu timiqo no ithive keno, panongu no Aaron lau hekütsü luve no pa vilo pi, “Ithulo, alhou khunono ni züu shi wunani keno, ningu ghenguno mla tsülo. Moses hipau, Egypt lono ni saipeghi keu ye pa lau kiu shive akeno ningu ye ithi movae.”

² Ikehu Aaron no panoqo vilo pi, “Nongu nipu, apu-angaqo kini lono ameshoyi nguthi xajope I lau süghilo.”

³ Ikehu kümtsü no panongu kini lo ameshoyi nguthi akeqo pesü Aaron lau ighi.

⁴ Pa no panoqo u lono ikhiluve no kogheküghü mla chekeu tinhemgha pesü ameshoyi mishitsü lakhi mlave. Timiqo no pi, “O Israel, hipaqo no nongu lhou, Egypt yeghi lono nongu saipeghi keqoe!”

⁵ Kughou Aaron no ti ithulu keno pa no tipau zülo akümlla-khache mlave. Eno pa no asheshu no pi, “Thoghiu ye Ampeu lau aghulhu lakhi shinie.”

⁶ Panongu no thanau itheno ithu akipti kümllagho mlla eno külakishi kümllagho süghi. Timiqo no chushoni ye iqa eno ithoizani ye puthughoe.

⁷ Ampeu no Moses vilo pi, “Iqilo, kughengu ow timi khunoqo nono Egypt yeghi lono saipeghi keno panongu ye pano ampi shikitiqevae.

⁸ Panongu ye I no azah tsükeu laghi lono paikhavi tsüghüvae. Panongu ye pano sala ameshoyi mishitsü lakhi mlave no ti mlla auvae eno tipau lau aghashi no pi, ‘O Israel, hipaqo no nongu lhou, Egypt lono nongu saipeghi keqoe!’”

⁹ Eno Ampeu no Moses vilo pi, “I no timi hipaqo ithuluvae, julo, panongu ye kuthovi kemie.

¹⁰ Tighenguno itehi I lakha kevilo, I loghu no shukuthui panoqo pitini cheni, tishikeu lono I no o pesü shiye kije shitsüni.”

¹¹ Ikemu Moses no Ampeu pa Lhou qhüiniju no pi, “O Ampeu, kushiye Ow timi, khunoqo Nono aküka kije eno akughushu u pesü Egypt yeghi lono saipeghi keno, panoqo shou O loghu no shukuthui piti amasa kea?

¹² Kushiye Egyptmi pelo, ‘Küsakügha kimji lono Pa no naghuto lono panoqo pithive eno ayeghi lono panoqo piti pühave niye saipeke,’ ipi apeni kea? O mlo kighide küghüqüve no Ow timi launo amhekiqi hipau süchileve lo.

¹³ Abraham, Isaac, eno Jacob, O qemi khunoqo lau O kutoshino tushoqhi no panoqo vilo, ‘I no atsütsü lo ayepuqo toi o ti kughuko tsüni, eno I no tushoqhive ketoi ayeghi hi kümtsü o tikughukomi tsüni eno panongu no alholo ti ighi luve nani’ ipi püakeu kümsülu lo.”

¹⁴ Ikehu Ampeu no Paw timi lau amhekiqi süghini pi akeu süchileve.

¹⁵ Tithiu Moses no tsüghüsü pa u lo ashepe tulupha kini pesü naghuto lono iqive, atulupha tiküma ye azüu eno athiu ghi putoputo yesü püae.

¹⁶ Atulupha tiküma ye Ampeu kümla ke, eno ti ye Ampeu no yekeu, tiküma lo kixi puku keu ke.

¹⁷ Kughou timiqo no igha akeu sütsa Joshua no chilu keno, pa no Moses vilo pi, “Aghazü lo aghüshi sütsa chilu anie.”

¹⁸ Ikemu pa no pi, “I no chilu akeu hi ye tokulu ghügha kumo, momu theqhi mlave keu ghügha kumoe, ikemu alekiphe ghüghae.”

¹⁹ Moses no aghazü kupunu ighi no amshiti julho eno ilhe aghi keu ithulu khavi pa xukighide iqü ipeghive, eno pa no pa u lono atulupha tiküma ikhipe naghuto boqha lono vephove.

²⁰ Panongu no amshiti mla püakeu pa no ikhipe ami lono pitive no mukhumuno shivetsü eno tipau pesü azü lo küzale süve no Israelmi pelo tipau zü yevepe.

²¹ Moses no Aaron vilo pi, “Timi hipaqo ye o lau kiu shivepi no ye hitoi keu xine kije panoqo shou süghive akea?”

²² Aaron no pi, “I mpeu xukighide tavelo. Nono timiqo ithi anike panongu ye küsakügha shinike kutope anie.

²³ Kughengu panongu no I vilo pi, ‘alhou khunoqo no ningu züu shi wunani keno ni sala mla tsülo. Moses hipau Egypt lono ni sasü ipeghi keu ye pa lau kiu shive akeno ningu ye mthavae.’

²⁴ Ikehu I no panoqo vilo pi, ‘Khukhumu ameshoyi aghikeu ye xaqhilo.’ Ikehu panongu no xape I tsü, eno I no ami lo vesü kelo amshiti hipau ipeghive.”

²⁵ Kughou timiqo kighileve aghi keu Moses no ithulu keno (kughengu aghümi zükukujopu shi Aaron no panoqo kighileve ke),

²⁶ Moses no aghazü khagho phivilo puthugho no pi, “Khuu no Ampeu küdau ani kea? I lau ighilo.” Ikelo Levi laghami kümtsü no pa vehomxa luve.

²⁷ Pa no panoqo vilo pi, “Israel Lhou Ampeu no ishi piani, ‘Milakhikhi no azütakikihi xipu luve lo, eno aghazü kümtsü lo khagho lakhi lono lakhi lo wuno nongu thiküzümi, aküsami, eno akisüghümi ghiqhilo.’”

²⁸ Levi laghami no Moses tsa kiqi lono tishie. Eno tipa tsalani kiptimi lakh küthü qhalo ikiqive.

²⁹ Moses no pi, “Ampeu kümla ghenguno ishi no nongu pesü kimkhivae, milakhikhi no pa nu eno pa thiküzüu ghiqhivae, tishianguno ishi tsala lo Pa pelo nongu shou kükümgha betsü peniye ke.”

³⁰ Thoghiu Moses no timiqo vilo pi, “Nongu ye axine kije shivae. Itehi I no Ampeu lau iqhoni; ishiake I no nongu xine pevetsü luvike.”

³¹ Ikehu Moses no Ampeu lau ideighi no pi, “Aha, timi hipaqo ye axine kije shivae. Panongu ye pano ghenguno ameshoyi lhouqo mlavae.

³² Ikemu itehi, Nono panoqo xine qhitsü aye ta—ikemu tishimo aye, kimiyeno Ow kaku khipau lo Nono yepüani keno tileno I je nuxave tsülo.”

³³ Ikemu Ampeu no Moses vilo pi, “Khunoqo no I lau axine shive akeno, I no Iw kaku lono nuxaveni.

³⁴ Ikemu itehi wulo, I no khipa-a o kiche püani keno tilau timiqo sawulo; julo, Iw kungumi no o züu shi wunani. Tishinamu, I no panoqo xuju ighike tsalani, I no panongu xine ghenguno panoqo ghime nani.”

³⁵ Tishino Ampeu no timiqo shou püsa puwu, kughengu panongu no amshiti mla ke, ti ye Aaron no mlakeu.