IPEKULU 30 - Sumi Naga CL (Re-edited) Bible (BSI)

Tsüngqüikeu Ta Kiptia

¹ “Tsüngqüikeu ta kiptia mlalo; ti ye acacia sü pesü mlalo.

² Akushulau eno akijelau aulotikipshe 18, tipau ye ako bidi shilo, eno akiqhelau aulotikipshe 36 shilo. Tipau lo akiboqo ye ashipa lakhi lono shilo.

³ Tipau kütsüqa eno ako bidi ngo akiboqo lo ameshoyi kivi pesü küzüve lo. Eno ameshoyi no asheqo veho süvelo.

⁴ Eno tipau ghenguno ameshoyi pesü abocho kini mlalo. Akipesü xisü no xapuwu kepushi tiküma pesü ashe kile qholo hula hila medalo.

⁵ Akipesü ye acacia sü no mlalo eno ameshoyi no tipaqo küzüve lo.

⁶ Eno tipau pesü nhaqhiphi puloshoqhi bohu zülo akeu, akünha phivilo qhilo, tileno I no o sasü kushoni.

⁷ Eno tipau shou Aaron pelo axokütsüngü piti mlla pelo. Inaqhe atsütsü kughou pa no akulu küqüni keno axokütsüngü pitilo,

⁸ kughou pa no avelau akulu küqüni keno ti pitilo, ti ye tiqheli kümtsü lo Ampeu zülo alhokuthu axokütsüngü kümllagho ake.

⁹ Tipau lo lakha püakeu xokütsüngü, momu akipti kümllagho, athi kümllagho piti moni, eno atsaizü kümllagho tipau lo lepuku moni.

¹⁰ Aaron no ampe lo ghuthu lakhi akiboqo shikimtheni. Tiqheli kupuju lo axine shikimthe keu kümllagho ji pesü pa no ampe lo ghuthu lakhi tipau shikimtheni. Ti ye Ampeu lau ighono akimthe shimasa nani.”

Timi Kikihi Süqha

¹¹ Ampeu no Moses vilo pi,

¹² “Kughou nono Israelmi kikihi luni keno, milakhikhi no pa küxü xakipheme Ampeu tsülo, tishi aye kughou nono panoqo kihini keno kiu püsa mu nongu lau ighimo nani.

¹³ Khunoqo no akikihi lo süve akeno panongu ye hipau tsülo: achineki shekel kiqi lono shekel tüxa (shekel tüxa ye gram 6 ke), Ampeu lau shekel tüxa akümllagho shi tsülo.

¹⁴ Akikihi lo süve kemi, ti ye ampe muku nguno kunguu khunoqo kihisüni keno kümtsü no Ampeuw akümllagho tsüni.

¹⁵ Kughou nongu no nongu küxü shikimthe keu ghenguno Ampeu lau akümllagho tsüni keno, shekel tüxa nguno alau ye kinimi mu ala tsümoni, kumlhomi mu tülalo tsümoni.

¹⁶ Israelmi launo axine pevekütsü pisa luni eno ti ye kuposhukulu phiki kümlapu ghenguno tsüveni, tishino tipau no Ampeu zülo Israelmi kümsüchilelu keu shi nani, tishikeu lono nongu küxü shikimthe lunani.”

Alazayi Chithakhu

¹⁷ Ampeu no Moses vilo pi,

¹⁸ “Qhukimthe kepu chithakhu eno tipau ghokepu alazayi no mlalo. Tipau pesü kuposhukulu phiki ngo akiptia dolo qhilo eno azü ghope qhilo,

¹⁹ Aaron ngo pa nuliqo no tipau lono apukhu ngo au qhuni.

²⁰ Kughou panongu no kuposhukulu phiki lo iloni, momu Ampeu lau achine kümla shinike eno achuqupu kümllagho piti mllani ye ighini keno, panongu no azü pesü qhukimtheni, tishianguno panongu ye thimo nani.

²¹ Panongu no au ngo apukhu qhuveni, tishianguno panongu ye thimo nani. Hi ye tiqheli kupuju lo panoqo ghenguno eno pano tikughuko ghenguno alholo khuaye shini.”

Nukikishe Thazü ngo Axokütsüngü

²² Ampeu no Moses vilo pi,

²³ “Tsüngqüikeu ta akivi hipaqo lulo: müsüghüta ahu tsügho, aküsa ahu küthü, akhoyi tsüngqüi keu ahu küthü,

²⁴ achineki shekel kimghi kiqi lono cassia ahu tsügho, tipaqo gholo olive thazü ahu bidi,

²⁵ eno tipaqo pesü axokütsüngü lakhi shi thazü gholo lekite lo; tipau ye akimtheshi nukepu thazü shini.

²⁶ Tipau pesü kuposhukulu phiki ngo puloshoqhi bohu shepe nupe qhilo,

²⁷ aghulhu lüpa ngo tipau lo peitha chekeqo nali-kulholi, akulu kibepu, axokütsüngü kiptia,

²⁸ akipti kümlla khache eno tipau lo peitha chekeqo nhemgha, chithakhu eno tipau ghope qhikeu ishi nupe qhilo.

²⁹ Nono tipaqo kishekimthe lo, tishianguno tipaqo ye akimthe shi nani. Kiu kiumu tipaqo dilu keu ye akimthe shive nani.

³⁰ Aaron ngo pa nuliqo nukishe lo, eno panoqo kishekimthepe achinemi shi I qe peni.

³¹ Israelmi vilo pilo, ‘Now tiqheli kupuju ghenguno hi ye Iw akimthe nukikishe thazü ke.

³² Hi ye inapüghami shou lepuku moni eno hitoi lekite kungo ghi kütau mla moni. Hi ye akimthe ke, eno hi ye nongu ghenguno akimthe shini.

³³ Khukhumu hitoi keu thazü kimihi shi mlakeu momu hipau pesü ashoumi shou lepuku keu ye paw timi gholono hapheveni.’”

³⁴ Ampeu no Moses vilo pi, “Tsüngqüikeu xo, stacte, onycha, ngo galbanum, gholo müsüghüta kivi (lakhikhi aqhemi shi lulo),

³⁵ hipaqo peitha no axokütsüngü thazü pesü lekite no tsüngqüikeu-ta mlalo. Ti ye mqhamqhiyi eno akimthe shi kepushi amti sülo.

³⁶ Tipaqo hami pesü mukhumuno shi kubo no kitila ikhipe kuposhukulu phiki lo ashepe akeu, khilehi I no o sasü kushoni ye ani keno, tipa zülo qhilo. Ti ye nongu ghenguno ighono akimthe ke.

³⁷ Nongu no kiu pesü axokütsüngü mla keno tipaphi lono nongu ghenguno mla moni. Nongu ghenguno ti ye Ampeu lau akimthe ke.

³⁸ Khukhumu axokütsüngü titoi peithani ye tihutoi mlakeu ye paw timi gholono hapheveni.”